Read KO E TOH TAPU KATOA TONGA KO SIOSIUA 20 Bible Online

KO SIOSIUA 20 - KO E TOH TAPU KATOA TONGA bible

KO SIOSIUA 20

¹PEA folofola ‘a Sihova kia Siosiua.

²‘O pehē, Lea ki ha‘a ‘Isileli, ‘o pehē, Mou vahe‘i hamou ngaahi kolo hūfanga, ‘a ia na‘a ku lea ai kiate kimoutolu ‘ia Mōsese;

³koe‘uhi ke hola ki ai ‘a e tāmate kuo ne te‘ia ha taha ko e fāinoa mo e ta‘e‘ilo: ke ai hamou hūfanga mei he tongitoto.

⁴Pea te ne hola ki ha taha ‘o e ngaahi kolo ko ia, pea te ne tu‘u ‘i he matanikolo, ‘o fakamatala ‘ene me‘a ki he mātu‘a ‘o e kolo ko ia; pea te nau fakahoko ia ki he kolo, pea te nau tuku hano ‘api ke ne nofo mo kinautolu.

⁵Pea kapau ‘e tuli ‘e he tongitoto kiate ia, ka ‘e ‘ikai te nau tuku ia ki hono nima, ‘a e tangata tāmate, koe‘uhi ko ‘ene taa‘i ‘a e tangata ko ē ko e fāinoa, ka na‘e ‘ikai ko e fehi‘a fuoloa ki ai.

⁶Pea te ne nofo ‘i he kolo ko ia, ‘o a‘u ki he‘ene tu‘u ‘i he ‘ao ‘o e fakataha ke fai hono fakamaau, ‘o a‘u ki he pekia ‘o ia na‘e taula‘eiki-lahi ‘i he taimi ko ia: pea ‘e toki foki ‘a e tangata tāmate, ‘o ‘alu ki hono kolo mo hono fale, ‘a e kolo na‘a ne hola mei ai.

⁷Ko ia na‘a nau tapui ‘a Kētesi ‘i Kāleli, ‘i he fonua mo‘unga ‘o Nafitalai, mo Sikemi ‘i he fonua mo‘unga ‘o ‘Ifalemi, mo Kiliati-a‘apa ‘i he fonua mo‘unga ‘o Siuta (ko Hepeloni ia).

⁸Pea ‘i Tu‘a-Soatani fe‘unga mo Sielikō, ‘i hahake, na‘a nau tuku ‘a Pēseli, ‘a ia ‘oku tu‘u ‘i he toafa, ‘i he Misoa na‘e kau ki he matakali ‘o Lūpeni; pea mo Lemoti ‘i Kiliati ‘i he matakali ‘o Kata, pea mo Kōlani ‘i Pēsani mei he matakali ‘o Manase.

⁹Ko e ngaahi kolo tu‘utu‘uni ia ma‘a ha‘a ‘Isileli kotoa, mo e muli na‘e nonofo mo kinautolu, ke hola ki ai ha taha kuo ne te‘ia fāinoa ha taha, ke ‘oua na‘a mate ia ‘i he ngāue ‘a e tongi-toto, kae‘oua ke ne tu‘u ‘i he ‘ao ‘o e fakataha.