Read KO E TOH TAPU KATOA TONGA KO SIOSIUA 22 Bible Online

KO SIOSIUA 22 - KO E TOH TAPU KATOA TONGA bible

KO SIOSIUA 22

¹KO E taimi ko ia na‘e ui ange ‘e Siosiua ‘a ha‘a Lūpeni mo ha‘a Kata, mo e vaeua ‘o e matakali ‘o Manase, ‘o ne pehē kiate kinautolu.

²Kuo mou tauhi ‘a e ngaahi tu‘utu‘uni kotoa pē na‘e ‘atu kiate kimoutolu ‘e Mōsese ko e Sevāniti ‘a Sihova, pea kuo mou tali ‘eku lea ‘i he fekau kotoa pē kuo u fai atu.

³Ko futu mo e ‘ikai te mou li‘aki homou kāinga ‘o a‘u ki he ‘aho ni; pea kuo mou tauhi homau vaha‘angatae, ‘a ia na‘e tu‘utu‘uni ‘e Sihova ko homou ‘Otua.

⁴Pea ko eni kuo tuku ‘e he ‘Eiki ko homou ‘Otua ke mālōlō homou kāinga, ‘o hangē ko ‘ene folofola kiate kimoutolu: ko ia mou foki atu ki homou ngaahi tēniti, ki he fonua ‘oku mou tofi‘a ‘aki, ‘a ia na‘e ‘atu ‘e Mōsese ko e Sevāniti ‘a Sihova ‘i he potu ki kō ‘o Soatani.

⁵Kae sinoeme‘a ke mou mātu‘aki tokanga ke fai ki he tu‘utu‘uni mo e lao, ‘a ia na‘e fekau atu ‘e Mōsese ko e sevāniti ‘a e ‘Eiki; ke ‘ofa kia Sihova ko homou ‘Otua, pea ke fou ‘i hono ngaahi founga kotoa pē, pea ke tauhi ‘ene ngaahi fekau, pea ke pīkitai kiate ia, mo tauhi ia ‘aki homou loto kotoa, pea mo homou laumālie kotoa.

⁶Pea na‘e tāpuaki‘i kinautolu ‘e Siosiua, ‘o ne tukuange: pea na‘a nau ‘alu ki honau ngaahi tēniti.

⁷Pea kuo vahe tofi‘a ‘e Mōsese ki he vaeua ‘o e matakali ‘o Manase ‘i Pēsani, ka ki hono vaeua ‘e taha na‘e ‘ange ‘e Siosiua fakataha mo honau kāinga ‘i he feitu‘u ‘o Soatani ki lulunga.

⁸Kae‘uma‘ā ‘i he tukuange kinautolu ‘e Siosiua ke ‘alu ki honau ngaahi tēniti, na‘a ne tāpuaki‘i kinautolu: ‘io, na‘a ne lea kiate kinautolu, ‘o pehē, Foki ā ki homou ngaahi tēniti mo e koloa lahi, mo e monumanu tokolahi, mo e siliva mo e koula, mo e kapa mo e ‘aione, mo e ngaahi kofu lahi ‘aupito: mou tufa fakataha mo homou kāinga ‘a e vete ‘o homou ngaahi fili.

⁹Ko ia na‘e foki ai ‘a ha‘a Lūpeni mo ha‘a Kata mo e vaeua ‘o e matakali ‘o Manase, ‘o nau mahu‘i mei ha‘a ‘Isileli ‘i Sailo, ‘a ia ‘oku ‘i he fonua ko Kēnani, ko ‘enau ‘alu ki Kiliati, ki he fonua kuo nau tofi‘a ‘aki, ‘a ia kuo tō kiate kinautolu ‘i he fekau ‘a Sihova na‘e fakafai ‘ia Mōsese.

¹⁰Pea ‘i he‘enau a‘u ki he feitu‘u ‘o Soatani, ‘i he fonua ai pe ko Kēnani,[12] na‘e hanga ai ‘a ha‘a Lūpeni mo ha‘a Kata mo e vaeua ‘o e matakali ‘o Manase, ‘o nau fokotu‘u ai ha ‘ōlita ofi ki Soatani, ko e ‘ōlita na‘e fu‘u ‘ilonga.

¹¹Pea fanongo ‘e ha‘a ‘Isileli, ‘o pehē, Ta kuo hanga ‘a ha‘a Lūpeni mo ha‘a Kata mo e vaeua ‘o e matakali ‘o Manase, pea kuo nau fokotu‘u ha ‘ōlita ‘i he ngata‘anga ‘o e fonua ko Kēnani, ‘i he tafafonua ‘o Soatani, ‘i he feitu‘u mai ‘o ha‘a ‘Isileli,

¹²Pea ‘i he fanongo ki ai ‘a ha‘a ‘Isileli, na‘e tānaki mai ki Sailo ‘a e fakataha kotoa ‘o ha‘a ‘Isileli, ke nau ‘alu atu ‘o tau‘i kinautolu.

¹³Pea fekau atu ‘e ha‘a ‘Isileli ki ha‘a Lūpeni mo ha‘a Kata mo e vaeua ‘o e matakali ‘o Manase, ki Kiliati, ‘a Finiasi ko e foha ‘o ‘Eliesa ko e Taula‘eiki.

¹⁴Pea na‘e ō mo ia ha hou‘eiki ‘e toko hongofulu, ko ha ‘ulumotu‘a ki he matakali takitaha ‘o ‘Isileli; na‘a nau takitaha ‘eiki ‘i hono fāmili ‘i he nofo ‘a e ngaahi toko afe ‘o ‘Isileli,

¹⁵Pea na‘a nau a‘u ki Kiliati ki ha‘a Lūpeni mo ha‘a Kata mo e vaeua ‘o e matakali ‘o Manase, pea nau lea kiate kinautolu, ‘o pehē,

¹⁶Ko eni ‘a e lea ‘a e fakataha kotoa ‘a Sihova, Ko e angahala ha ‘eni kuo mou fai ki he ‘Otua ‘o ‘Isileli? Ho‘omou afe leva mei he muimui kia Sihova ‘i ho‘omou fokotu‘u hamou ‘ōlita ke angatu‘u leva kia Sihova?

¹⁷Na‘e si‘i ‘apē ‘a e angahala ‘a Peoli, ‘a ia kuo te‘eki ke tau ma‘a mei ai ‘o a‘u ki he ‘aho ni, neongo na‘e tō mai ha mahaki faka‘auha ki he fakataha ‘a e ‘Eiki?

¹⁸Ko hono ‘uhinga ia koā ‘oku mou fie afe ai he ‘aho ni mei he muimui kia Sihova? Pea ko hono ō ē ‘o ho‘omou angatu‘u leva ki he ‘Eiki, te ne tuputāmaki ‘apongipongi ki he fakataha kotoa ‘o ‘Isileli,

¹⁹Ka ‘o kapau ‘oku ta‘ema‘a ‘a e kelekele ‘o homou tofi‘a, pea mou hiki mai mu‘a ki he tofi‘a ‘o Sihova, ‘a ia ‘oku nofo ai ‘a e Tāpanekale ‘o e ‘Eiki, ‘o ma‘u tofi‘a fakataha mo kimautolu: kae ‘oua te mou angatu‘u kia Sihova, pea ‘oua te mou angatu‘u kiate kimautolu, ke langa hamou ‘ōlita ke ua‘aki ‘a e ‘ōlita ‘o Sihova ko hotau ‘Otua.

²⁰‘Ikai na‘e hia ‘a ‘Ākani, ko e hako ‘o Sala, ‘i he me‘a na‘e tapui, pea hoko ‘a e houhau ki he fakataha kātoa ‘o ‘Isileli? Pea tala‘ehai na‘e mole toko taha pē ‘a e tangata ko ia ‘i he‘ene hia.

²¹Pea tali ‘e ha‘a Lūpeni mo ha‘a Kata mo e vaeua ‘o e matakali ‘o Manase, ‘o nau pehē ki he hou‘eiki ‘o e ngaahi toko afe ‘o ‘Isileli,

²²Ko ‘Ela ‘Elohimi Sihova, ko e ‘Eiki ko e ‘Otua ‘o e ngaahi ‘otua, ‘oku ‘afio‘i ‘e ia, pea ke ‘ilo mo ‘Isileli foki; kapau kuo mau fai ko e angatu‘u, pe ko e angahala kia Sihova, ‘a ‘emau langa ‘ōlita, ke afe mei he muimui kia Sihova — ke ‘oua ‘e fakamo‘ui kimautolu ‘e he ‘Afiona he ‘aho ni!

²³Pea ka ko e pehē ke fai ai ha feilaulau mōifua, pe ha feilaulau-me‘akai, pe ke ‘atu ai ha ngaahi feilaulau-‘ofa; ke ‘eke ia ‘e Sihova ‘e ia.

²⁴Kaekehe, na‘a mau fai ko ‘emau manavahē ki ha me‘a, pea ai ‘emau fakakaukau; he na‘a mau pehē, Na‘a lea mai ho‘omou fānau ‘amui ki he‘emau fānau, ‘o pehē, Ko e hā ha‘amou kau kia Sihova ko e ‘Otua ‘o ‘Isileli?

²⁵He kuo ‘ai ‘e he ‘Eiki ha kau‘ā ‘i hotau vaha‘a mo kimoutolu, ha‘a Lūpeni mo ha‘a Kata, ‘a Soatani; ‘oku ‘ikai hamou kaunga kia Sihova: pea ko ho‘omou fānau te nau ta‘ofi ‘emau fānau mei he tauhi kia Sihova.

²⁶Ko ia na‘a mau pehē, Tau hanga mu‘a ‘o fokotu‘u hatau ‘ōlita, ‘o ‘ikai ke tutu ai ha me‘a, pea ‘ikai ke fai ai ha feilaulau;

²⁷ka ke tu‘u ko e fakamo‘oni ‘i hotau vaha‘a, pea ‘i he vaha‘a ‘o hotau ngaahi to‘utangata ‘amui; koe‘uhi ke fai ‘a e fatongia ‘o Sihova ‘i hono ‘ao ‘aki ‘emau ngaahi feilaulau-mōifua, mo ‘emau ngaahi feilaulau manu, mo ‘emau ngaahi feilaulau-‘ofa; pea ke ‘oua na‘a lea ho‘omou fānau ‘amui ki he‘emau fānau, ‘o pehē, ‘Oku ‘ikai hamou kaunga kia Sihova.

²⁸Ko ia na‘a mau pehē, ka faifai pea fai ha lea pehē kiate kimautolu, pe ki hamau hako ‘amui, pea te mau toki tali; Vakai, ko e tatau ē ‘o e ‘ōlita ‘o Sihova, ‘a ia na‘e ngaohi ‘e he‘emau ngaahi tamai, kae ‘ikai ke tutu ai ha me‘a, pe fai ha feilaulau ai; ka ko e fakamo‘oni ia ‘i hotau vaha‘a mo kimoutolu.

²⁹Molekemama‘o ha‘amau angatu‘u kia Sihova, ke afe leva mei he muimui ki he ‘Eiki, ke fokotu‘u ha ‘ōlita ke tutu ai ha me‘a, pe ke ‘atu me‘akai, pe ke fai feilaulau ai, ke ua‘aki ‘a e ‘ōlita ‘o Sihova ko hotau ‘Otua, ‘a ia ‘oku tu‘u ‘i hono mata Tāpanekale.

³⁰Pea ko Finiasi ko e taula‘eiki, mo e hou‘eiki ‘o e fakataha, ‘io, ‘a e ngaahi ‘ulumotu‘a ‘o e ngaahi toko afe ‘o ‘Isileli, ‘a ia na‘a nau omi mo ia, ‘i he‘enau fanongo ki he ngaahi lea ko ia na‘e fai ‘e ha‘a Lūpeni mo ha‘a Kata mo ha‘a Manase, na‘a nau matamatalelei‘ia ai.

³¹Pea lea ‘a Finiasi ko e foha ‘o ‘Eliesa ko e taula‘eiki ki ha‘a Lūpeni mo ha‘a Kata mo ha‘a Manase, Ko e ‘aho ni ‘oku mau ‘ilo ‘oku ‘iate kitautolu ‘a e ‘Eiki, ko e ‘ikai te mou fai ‘a e angahala ko ē kia Sihova: ta ko ē, kuo mou fakahaofi ‘a ha‘a ‘Isileli mei he nima ‘o Sihova.

³²Pea ko Finiasi ko e foha ‘o ‘Eliesa ko e taula‘eiki, pea mo e hou‘eiki, na‘a nau foki mei ha‘a Lūpeni mo ha‘a Kata, ‘o nau ‘alu mei Kiliati ki Kēnani ki ha‘a ‘Isileli, ‘o nau ‘ange kiate kinautolu ‘a e tali ‘o e me‘a.

³³Pea na‘e matamatalelei‘ia ‘a ha‘a ‘Isileli ‘i he me‘a, pea nau fai ‘enau fakafeta‘i ki he ‘Otua, ‘o ‘ikai te nau kei lau ke ‘alu ke tau‘i kinautolu, mo maumau ‘a e fonua ‘a ia na‘e nofo ai ‘a ha‘a Lūpeni mo ha‘a Kata.

³⁴Pea na‘e fakahingoa ‘a e ‘ōlita ‘e ha‘a Lūpeni mo ha‘a Kata, ‘o pehē, Ko e fakamo‘oni eni ‘i hotau vaha‘a ko Sihova ko e ‘Otua.