Read KO E TOH TAPU KATOA TONGA KO SIOSIUA 3 Bible Online

KO SIOSIUA 3 - KO E TOH TAPU KATOA TONGA bible

KO SIOSIUA 3

¹PEA tu‘u hengihengi hake ‘a Siosiua, ‘o nau hiki mei Sītimi, ‘o nau a‘u ki Soatani, ‘a ia mo ha‘a ‘Isileli kātoa; pea nau ‘apitanga ai ‘i he‘enau teu a‘a atu.

²Pea hili ‘a e ‘aho ‘e tolu na‘e ‘alu atu ‘a e kau ‘ōfisa ‘i he loto ‘apitanga;

³‘o nau fanongonongo ki he kakai, ‘o pehē, Ka mou ka sio ki he ‘A‘ake ‘o e Kovinānite ‘o Sihova ko homou ‘Otua, ‘oku kauala ia ‘e he kau Līvai taula‘eiki, pea te mou toki hiki mei homou ngaahi feitu‘u, ‘o muimui atu.

⁴Ka te mou tuku hamou vaha‘a mo ia, ‘o fe‘unga nai hono fua mo e kiupite ‘e ua afe: ‘oua te mou ofi ki ai, koe‘uhi ke mou ‘ilo ‘a e hala te mou fou ai; he kuo te‘eki ke mou laka ‘i he hala ko ē ha taimi.

⁵Pea lea ‘a Siosiua ki he kakai, ‘o pehē, Mou tapui kimoutolu, he ko e ‘apongipongi ‘e fai mana ‘e Sihova ‘i homou lotolotonga.

⁶Pea lea ‘a Siosiua ki he kau taula‘eiki ‘o pehē, Hiki ‘a e ‘A‘ake ‘o e Kovinānite, ‘o laka atu ‘i he ‘ao ‘o e kakai. Pea na‘a nau hiki ‘a e ‘A‘ake ‘o e Kovinānite, ‘o nau laka atu ‘i he ‘ao ‘o e kakai.

⁷Pea folofola ‘a Sihova kia Siosiua, Ko e ‘aho ni te u kamata ke hākeaki‘i koe ‘i he ‘ao ‘o ‘Isileli kātoa, koe‘uhi ke nau ‘ilo, hangē na‘a ku ‘ia Mōsese, ‘e pehē ‘eku ‘iate koe.

⁸Pea te ke tu‘utu‘uni ki he kau taula‘eiki ‘oku ha‘amo ‘a e ‘A‘ake ‘o e Kovinānite, ‘o pehē, Ka mou ka a‘u ki he ngutuvai ‘o Soatani, te mou tu‘u ma‘u pē ‘i Soatani.

⁹Pea lea ‘a Siosiua ki ha‘a ‘Isileli, ‘Unu‘unu mai ki heni ke fanongo ki he ngaahi folofola ‘a Sihova ko homou ‘Otua.

¹⁰Pea pehē ‘e Siosiua, Ko e me‘a ko ia te mou ‘ilo ai ‘oku ‘i homou lotolotonga ‘a e ‘Otua Mo‘ui, pea te ne mātu‘aki kapusi mei homou ‘ao ‘a ha‘a Kēnani, mo ha‘a Heti, mo ha‘a Hevi, mo ha‘a Pēlisi, mo ha‘a Keakesa, mo ha‘a ‘Āmoli, mo ha‘a Siepusi.

¹¹Vakai, ko e ‘A‘ake ‘o e Kovinānite ‘o e ‘Eiki ‘o māmani kātoa ‘oku ‘alu mu‘omu‘a ‘iate kimoutolu ki loto Soatani.

¹²Pea ko eni, mou vahe mai ha toko hongofulu mā ua mei he ngaahi matakali ‘o ‘Isileli, ‘o takitaha ‘a e matakali ha tangata ‘e toko taha.

¹³Pea ka faifai pea ma‘u ‘enau tu‘u ‘i he vai ‘o Soatani, ‘a e ‘aofiva‘e ‘o e kau taula‘eiki ‘oku kauala ‘a e ‘A‘ake ‘o Sihova ko e ‘Eiki ‘o māmani kātoa, pea ‘e toki motuhi ‘a e vai ‘o Soatani, ‘a ia ‘oku tafe hifo mei he matavai, pea ‘e tu‘u hangē ha fu‘u ‘esi.

¹⁴Pea ‘i he hiki ‘a e kakai mei honau ngaahi tēniti ke laka atu ‘i Soatani, ‘oku fotu atu ‘a e kau taula‘eiki ‘enau kauala ‘a e ‘A‘ake ‘o e Kovinānite,

¹⁵pea ‘i he a‘u ki Soatani ‘a e kau ha‘amo ‘o e ‘A‘ake, pea lave ‘i he ngutuvai ‘a e va‘e ‘o e kau taula‘eiki na‘e kauala ‘a e ‘A‘ake (he ko e anga ‘o Soatani ‘oku ne mahua mai, ‘o lōmekina hono ngaahi ngutuvai kotoa pē lolotonga ‘a e ututa‘u),

¹⁶pea na‘e toki tu‘u hake ‘a e vai ‘o Soatani, ‘a e feitu‘u ki he matavai, ‘o fokotu‘utu‘u hangē ha fu‘u ‘esi, mei he mama‘o ‘aupito, fe‘unga mo ‘Ātama, ko ha kolo ‘oku ‘i he tafa‘aki ‘o Saletani: pea ko e muivai na‘e tafe ki he tahi ‘o e ‘Alapā, ‘a ia ko e Tahi Māsima, na‘e maha ‘aupito: pea na‘e a‘a atu ‘a e kakai, ‘o hangatonu ki Sielikō.

¹⁷Pea ko e kau taula‘eiki na‘a nau kauala ‘a e ‘A‘ake ‘o e Kovinānite ‘o Sihova na‘a nau tu‘u ma‘u ‘i he mōmoa ‘i loto Soatani, pea na‘e a‘a atu ‘a ‘Isileli kātoa ‘i he mōmoa, kae‘oua ke ‘osi‘osingamālie ‘a e pule‘anga ‘enau a‘a atu ‘i Soatani.