Read KO E TOH TAPU KATOA TONGA KO SIOSIUA 4 Bible Online

KO SIOSIUA 4 - KO E TOH TAPU KATOA TONGA bible

KO SIOSIUA 4

¹PEA ‘i he ‘osi‘osingamālie leva ‘a e pule‘anga ‘enau a‘a atu ‘i Soatani, na‘e folofola ‘a Sihova kia Siosiua, ‘o pehē,

²Vahe mai mei he kakai ha tu‘unga me‘a ‘e hongofulu mā ua, ko e toko taha mei he matakali takitaha,

³pea mou tu‘utu‘uni kiate kinautolu, ‘o pehē, To‘o ma‘amoutolu mei hē ha maka ‘e hongofulu mā ua, mei loto Soatani, ‘a e potu na‘e tu‘u ma‘u ai ‘a e va‘e ‘o e kau taula‘eiki, pea ō atu mo kimoutolu ki he kauvai, ‘o tuku hifo ‘i he potu te mou ‘apitanga ai ‘i he pō ‘anai.

⁴Pea ui ange ‘e Siosiua ‘a e kau tangata ‘e hongofulu mā ua ‘a ia kuo ne teuteu ki ai mei ha‘a ‘Isileli, ko e toko taha mei he matakali takitaha:

⁵pea lea ‘a Siosiua kiate kinautolu, Mou laka atu ‘i he ‘ao ‘o e ‘A‘ake ‘o Sihova ko homou ‘Otua ki loto Soatani, pea to‘o hake takitaha ha maka, ‘o hilifaki ki hono uma, ‘o fakatatau ki he lau ‘o e ngaahi matakali ‘o ha‘a ‘Isileli,

⁶koe‘uhi ke hoko ia ko e faka‘ilonga ‘i homou lotolotonga, ‘oka faifai pea ‘eke ‘e ho‘omou fānau ‘amui, ‘o pehē, Ko e hā ‘a e ‘uhinga ‘o e ngaahi maka ni?

⁷Pea te mou toki tali kiate kinautolu, Ko hono ‘uhinga na‘e motuhi ‘a e vai ‘o Soatani ‘i he ‘ao ‘o e ‘A‘ake ‘o e Kovinānite ‘o Sihova: ‘i he‘ene a‘a atu ‘i Soatani na‘e motuhi ‘a e ngaahi vai ‘o Soatani: ko ia ‘e hoko ‘a e ngaahi maka ni ko e me‘a fakamanatu ki ha‘a ‘Isileli ‘o lauikuonga.

⁸Pea fai ‘e ha‘a ‘Isileli ‘o hangē ko e tu‘utu‘uni ‘a Siosiua, ‘o nau ‘ohake ha maka ‘e hongofulu mā ua mei loto Soatani, ‘o hangē ko e folofola ‘a Sihova na‘e fai kia Siosiua, ke fe‘unga mo e lau ‘o e ngaahi matakali ‘o ha‘a ‘Isileli; ‘o nau ō atu mo kinautolu ki honau ‘apitanga, ‘o tuku hifo ai.

⁹Na‘e fokotu‘u foki ‘e Siosiua ha maka ‘e hongofulu mā ua ‘i loto Soatani, ‘i he potu na‘e tu‘u ai ‘a e va‘e ‘o e kau taula‘eiki na‘e kauala ‘a e ‘A‘ake ‘o e Kovinānite: pea ‘oku nau ‘i he potu ko ia ‘o a‘u ki he ‘aho ni.

¹⁰He ko e kau taula‘eiki na‘e kauala ‘a e ‘A‘ake na‘a nau tu‘u ‘i loto Soatani, kae‘oua ke ‘osi‘osingamālie ‘a e ngaahi me‘a na‘e fekau ‘e Sihova kia Siosiua ke tala ki he kakai, ‘o hangē ko ia kotoa na‘e fekau ‘e Mōsese kia Siosiua; pea na‘e fakavave ‘a e kakai ‘enau a‘a atu.

¹¹Pea ‘i he faifai pea ‘osi atu ‘a e kakai kotoa, pea na‘e toki ‘alu atu ‘a e ‘A‘ake ‘o Sihova mo e kau taula‘eiki ‘i he ‘ao ‘o e kakai.

¹²Pea na‘e a‘a atu ‘a ha‘a Lūpeni mo ha‘a Kata mo e vaeua ‘o e matakali ‘o Manase, ‘o fakakongakau ‘enau ‘alu, ‘i he ‘ao ‘o ha‘a ‘Isileli, ‘o hangē ko e me‘a ‘a Mōsese kiate kinautolu:

¹³ko e toko fā mano nai kuo ‘osi sāuni ki he tau, na‘a nau laka ‘i he ‘ao ‘o Sihova ki he ‘Alapā ‘o Sielikō ke fai ‘a e tau.

¹⁴‘I he ‘aho ko ia na‘e hākeaki‘i ‘a Siosiua ‘e Sihova ‘i he ‘ao ‘o ‘Isileli kātoa, pea na‘a nau ‘apasia kiate ia, ‘o hangē ko ‘enau ‘apasia kia Mōsese ‘i he ‘aho kotoa ‘o ‘ene mo‘ui.

¹⁵Pea folofola ‘a Sihova kia Siosiua, ‘o pehē,

¹⁶Fekau ki he kau taula‘eiki ‘oku ha‘amo ‘a e ‘A‘ake Fakamo‘oni‘anga, ke nau ‘alu hake mei Soatani.

¹⁷Pea fekau ‘e Siosiua ki he kau taula‘eiki, ‘o pehē, Mou hake mai mei Soatani.

¹⁸Pea ‘i he ‘iloange na‘e ‘alu hake mei loto Soatani ‘a e kau taula‘eiki na‘e kauala ‘a e ‘A‘ake ‘o e Kovinānite ‘o Sihova — kuo ta‘aki ‘a e ‘aofiva‘e ‘a e kau taula‘eiki, ‘o tu‘u ki he kelekele mōmoa — pea na‘e toki foki mai ‘a e vai ‘o Soatani ki hono ‘alunga, ‘o ne lōmaki‘i hono ngaahi ngutuvai kotoa ‘o hangē ko ia ‘i mu‘a.

¹⁹Pea ko e ‘alu hake ‘a e kakai mei Soatani na‘e fai ‘i hono ‘aho hongofulu ‘o e ‘uluaki māhina, pea na‘a nau fokotu‘u tēniti ‘i Kilikali, ‘i he tafa‘aki fonua ‘o Sielikō ki hahake.

²⁰Pea ko e maka ‘e hongofulu-mā-ua ko ē, ‘a ia kuo nau to‘o mei loto Soatani, na‘e fokotu‘u ‘e Siosiua ‘i Kilikali.

²¹Pea ne lea ki ha‘a ‘Isileli, ‘o pehē, Ka ‘eke ‘e ho‘omou fānau ‘amui ki he‘enau ngaahi tamai, ‘o pehē, Ko e hā ‘a e ngaahi maka ni?

²²Pea te mou fakahinohino ho‘omou fānau, ‘o pehē, Na‘e a‘a mātu‘u pē ‘a ‘Isileli ‘i he Soatani ko ē.

²³He na‘e fakamātu‘u ‘e Sihova ko homou ‘Otua ‘a e vai ‘o Soatani ‘i homou ‘ao, kae‘oua ke ‘osi ho‘omou laka mai, ‘o hangē ko ia na‘e fai ‘e Sihova ko homou ‘Otua ki he Tahi Kulokula, ‘a ia na‘a ne fakamātu‘u ‘i homau ‘ao, kae‘oua ke ‘osi ‘emau a‘a atu.

²⁴Koe‘uhiā ke ‘ilo ‘e he ngaahi kakai fua pē ‘o māmani, ko e nima ‘o Sihova ko e nima mālohi ia; ka mou ‘apasia ki homou ‘Otua, ‘o lauikuonga.