Read KO E TOH TAPU KATOA TONGA KO SIOSIUA 5 Bible Online

KO SIOSIUA 5 - KO E TOH TAPU KATOA TONGA bible

KO SIOSIUA 5

¹PEA ‘i he fanongo ‘e he ngaahi tu‘i ‘Āmoli na‘e nofo ‘i he feitu‘u ‘o Soatani ki lulunga, pea mo e ngaahi tu‘i Kēnani na‘e nofo ki tahi, ‘i he‘enau fanongo ki he fakamātu‘u ‘e Sihova ‘a e vai ‘o Soatani ‘i he ‘ao ‘o ha‘a ‘Isileli, kae‘oua ke ‘osi ‘enau a‘a mai, na‘e vai honau loto, pea na‘e ‘ikai kei hanau loto koe‘uhi ko ha‘a ‘Isileli.

²‘I he taimi ko ia na‘e folofola ‘a Sihova kia Siosiua, ‘o pehē, Ngaohi hele maka mai, ‘o toe kamu ‘a ‘Isileli, hono tu‘o ua.

³Pea ngaohi mai ‘e Siosiua ha ngaahi hele maka, ‘o ne kamu ‘a ha‘a ‘Isileli ‘i Kīpate-ha-‘alalote.

⁴Pea ko hono ‘uhinga eni ‘o e fai ‘e Siosiua ‘a e kamu: ko e kakai kotoa na‘e ha‘u mei ‘Isipite, ‘a kinautolu na‘e tangata, ‘a e kakai na‘e ‘i he tau, na‘a nau pekia ‘i he Toafa ‘i he fononga, hili ‘enau ha‘u mei ‘Isipite.

⁵He ko e kakai na‘e ha‘u mei ai kuo nau ‘osi kamu kotoa, ka ko kinautolu kotoa na‘e fā‘ele‘i ‘i he Toafa ‘i he fononga hili ‘enau ha‘u mei ‘Isipite na‘e ‘ikai kamu kinautolu.

⁶He na‘e fāngofulu ta‘u ‘a e ‘alu ‘a ha‘a ‘Isileli ‘i he Toafa, kae‘oua ke ‘osi‘osingamālie ‘a e pule‘anga, ‘a kinautolu na‘e ha‘u mei ‘Isipite ‘oku nau ‘i he tau; koe‘uhi na‘e ‘ikai te nau tokanga ki he le‘o ‘o Sihova: ‘a e ā ne fuakava ai ‘e Sihova kiate kinautolu ‘e ‘ikai te ne tuku ke nau mamata ki he fonua, ‘a ia na‘a ne fuakava ki he‘enau ngaahi kui te ne foaki ia kiate kitautolu, ko e fonua ‘oku mahutafea. ‘i he hu‘akau mo e honi.

⁷Pea ko ‘enau fānau, ‘a ia na‘a ne fokotu‘u ke fetongi kinautolu, ko kinautolu na‘e kamu‘i ‘e Siosiua, he na‘a nau ta‘ekamu; he na‘e ‘ikai te nau kamu kinautolu ‘i he fononga.

⁸Pea ‘i he faifai pea ‘osi ‘a e pule‘anga hono kamu, pea nau nofo ai pe ‘i honau ngaahi tangutu‘anga ‘i he ‘apitanga, kae‘oua ke nau mā‘u‘ui.

⁹Pea folofola ‘a e ‘Eiki kia Siosiua, Ko e ‘aho ni kuo u fakateka meiate kimoutolu ‘a e ma‘anga faka-‘Isipite. Ko ia na‘e ui ai ‘a e hingoa ‘o e feitu‘u ko ia ko Kilikali (Teka) ‘o a‘u ki he ‘aho ni.

¹⁰Pea nofo tēniti ‘a ha‘a ‘Isileli ‘i Kilikali, pea na‘a nau fai ‘a e Pāsova ‘i hono ‘aho hongofulu mā fā ‘o e māhina, efiafi, ‘i he ‘Alapā ‘o Sielikō.

¹¹Pea ko e pongipongi hili ‘a e Pāsova na‘a nau kamata kai ‘a e ta‘u ‘o e fonua, ko e ngaahi keke ta‘elēvani, mo e me‘a tunu, ‘io, ‘i he ‘aho leva ko ia.

¹²Pea ‘i he pongipongi, hili ‘enau kai ‘a e ta‘u ‘o e fonua, na‘e tuku ‘a e mana, pea talu ai pē; pea na‘e ‘ikai ke toe ma‘u ‘e ha‘a ‘Isileli ha mana, ka na‘a nau kai ‘a e fua ‘o Kēnani ‘i he ta‘u ko ia.

¹³Pea ‘i he ‘iloange na‘e tu‘u ‘a Siosiua ofi ki Sielikō, pea ne hanga hake ‘o vakai, tā ko e tangata ena ‘oku tu‘u ‘o hangatonu mai kiate ia, pea kuo unuhi ‘ene heletā ‘o to‘o: pea laka atu ‘a Siosiua kiate ia, ‘o ne pehē ki ai, ‘Oku ke kau mo kimautolu, pe mo homau ngaahi fili?

¹⁴Pea ne pehē, ‘Ikai: ka ko ‘eku ha‘u ni ko e Kapiteni ‘o e Tau ‘a Sihova. Pea tō fo‘ohifo ‘a Siosiua ki he kelekele, ‘o ne hū kiate ia, ‘o ne pehē ki ai, Ko e hā ‘a e me‘a ‘a e Feitu‘u na ki ho‘o tamaio‘eiki ko au?

¹⁵Pea folofola mai ‘a e Kapiteni ‘o e Tau ‘a Sihova kia Siosiua, Vete ho sū mei ho va‘e, he ko e potu ‘oku ke tu‘u ai ko e potu tapu. Pea fai ‘e Siosiua.