Read KO E TOH TAPU KATOA TONGA KO SIOSIUA 6 Bible Online

KO SIOSIUA 6 - KO E TOH TAPU KATOA TONGA bible

KO SIOSIUA 6

¹KA ko Sielikō na‘e songo ke masongo telia ‘a ha‘a ‘Isileli: na‘e ‘ikai ha taha ‘e hū kitua‘ā, pea ‘ikai ha taha ‘e hū mai.

²Pea folofola ‘a e ‘Eiki kia Siosiua; Vakai, kuo u tuku ki ho nima ‘a Sielikō, mo hono tu‘i, mo hono kau to‘a;

³pea te mou ‘alu fakatakamilo ki he kolo, ‘a e kau tau kotoa pē; te mou takai ia tu‘o taha. Te mou fai pehē ‘o ‘aho ono.

⁴Pea ko ha tu‘unga taula‘eiki ‘e toko fitu te nau to‘o ha talupite fakasiupeli ‘e fitu, pea te nau mu‘omu‘a ‘i he ‘A‘ake; pea ‘i hono fitu ‘o e ‘aho te mou fakatakamilo ki he kolo ‘o tātu‘ofitu, pea ‘e fai ‘e he kau taula‘eiki ‘enau ifi talupite.

⁵Pea ‘i he ‘iloange ‘oku ifi fakatangiloloa ‘a e talupite fakasiupeli, pea mou fanongo ki he lea ‘a e talupite, pea ‘e toki tūkuingata ‘a e kakai ‘enau kaila, pea ‘e holo hifo ‘a e ‘a ‘iate ia, kae ‘alu atu fakahangatonu ‘a e kakai ki ai.

⁶Pea ui ange ‘e Siosiua ko e foha ‘o Nuni ‘a e kau taula‘eiki, ‘o ne pehē kiate kinautolu, Mou kauala ‘a e ‘A‘ake ‘o e Kovinānite, pea ke to‘o ‘e ha taula‘eiki ‘e toko fitu ha talupite fakasiupeli ‘e fitu, ‘o mu‘omu‘a ki he ‘A‘ake ‘o Sihova.

⁷Pea na‘a nau pehē ki he kakai, Mou laka atu, ‘o ‘alu takai ki he kolo, pea ke mu‘omu‘a ‘i he ‘A‘ake ‘o Sihova ‘a kinautolu kuo ‘osi sāuni ki he tau.

⁸Pea ko ia, hangē ko e lea ‘a Siosiua ki he kakai, na‘e laka atu ‘i he ‘ao ‘o Sihova ha taula‘eiki ‘e toko fitu, ‘oku nau to‘o ‘a e ngaahi talupite fakasiupeli ‘e fitu, ‘o nau ifi ia, pea hoko mo kinautolu ‘a e ‘A‘ake ‘o e Kovinānite ‘o Sihova.

⁹Pea ko e kau tau ‘osi sauni na‘e hā‘ele mu‘omu‘a ‘i he kau taula‘eiki ifi talupite, pea ko e hōsitē na‘e muimui ki he ‘A‘ake, pea na‘a nau hā‘ele atu ‘oku fai ai pē ‘a e ifi talupite.

¹⁰Pea tu‘utu‘uni ‘e Siosiua ki he kakai, ‘o pehē, ‘E ‘ikai te mou kaila, pea ‘e ‘ikai ongo mai hamou le‘o, pea ‘e ‘ikai mapuna atu ha momo‘i lea mei homou ngutu, kae‘oua ke hoko ‘a e taimi te u tala ke mou kaila; pea te mou toki kaila.

¹¹Ko ia na‘a ne fakahā‘ele ‘a e ‘A‘ake ‘o Sihova ‘o takatakai ki he kolo, ‘o tā tu‘o taha: pea nau toki hū ki he ‘apitanga ‘o mohe ai.

¹²Pea tu‘u hengihengi hake ‘a Siosiua, pea hiki ‘e he kau taula‘eiki ‘a e ‘A‘ake ‘o Sihova.

¹³Pea ko e toko fitu‘i talupite fakasiupeli ‘i he ‘ao ‘o e ‘A‘ake ‘a Sihova, na‘a nau laka atu ‘o ifi talupite: pea ko e kau tau na‘e ‘osi sāuni na‘e ‘alu mu‘omu‘a ‘iate kinautolu, pea muimui ‘a e hōsitē ki he ‘A‘ake ‘o Sihova, pea nau laka atu ai pē ‘o ifi talupite.

¹⁴Pea ‘i hono ua ‘o e ‘aho na‘a nau ‘alu takai ki he kolo tu‘o taha, pea toki foki ki he ‘apitanga; pea nau fai pehē ‘o ‘aho ono.

¹⁵Pea ‘i he hoko hono ‘aho fitu, na‘a nau ‘a hengihengi ‘i he ma‘a ‘a e ‘aho, ‘o nau ‘alu takai ki he kolo, ‘i hono tu‘utu‘uni ko ia, ‘o tu‘o fitu; ko e ‘aho pē ko ia na‘e tu‘o fitu ‘enau fakatakamilo ‘a e kolo.

¹⁶Pea ‘i he faifai pea hoko hono tu‘o fitu, mo e ifi ‘e he kau taula‘eiki ‘enau talupite, pea toki pehē ‘e Siosiua ki he kakai, Mou kaila; he kuo tuku ‘e Sihova ‘a e kolo kiate kimoutolu.

¹⁷Pea ko e kolo, ‘e tapui ia, ‘a ia mo e me‘a kotoa pē ‘oku ‘i ‘ai, ma‘a Sihova: ngata pē ‘i he fefine fe‘auaki ko Lēhapi te ne mo‘ui, ‘a ia mo kinautolu ‘iate ia ‘i he fale, he na‘a ne fufū ‘a e ongo me‘a na‘a tau fekau atu.

¹⁸Pea sinoeme‘a ke mou ‘atā kimoutolu mei he me‘a kuo tapui, na‘a hili ho‘omou tapui ia, pea mou hanga ‘o to‘o ha me‘a mei ai; ‘o mou tuku ai ha mala ‘i he ‘apitanga ‘o ‘Isileli, ‘o mou fakamamahi‘i ia.

¹⁹Ka ko e siliva, mo e koula, mo e nāunau kotoa ‘oku kapa pe ‘aione, ‘oku tapu ia ki he ‘Eiki: ‘e fakahū ia ki he falekoloa ‘o Sihova.

²⁰Ko ia na‘e kaila ‘a e kakai, pea fai ‘a e ifi talupite: ‘io, ‘i he ‘iloange na‘e fanongo ‘e he kakai ki he lea ‘a e talupite, na‘a nau tūkuingata ‘enau kaila, pea holo ‘a e ‘a ‘iate ia, pea ‘alu hake ‘a e kakai ki he kolo, ‘o takitaha fai hangatonu atu pē; pea nau kapa ‘a e kolo.

²¹Pea na‘a nau faka‘auha ‘a ia kotoa pē na‘e ‘i he kolo, ‘a e tangata mo e fefine, ‘a e tamasi‘i mo e motu‘a, ‘a e pulu mo e sipi mo e ‘asi, ‘aki ‘a e mata ‘o e heletā.

²²Pea lea ‘a Siosiua ki he ongo me‘a na‘e ‘alu ke mataki‘i ‘a e fonua, Hū ki he fale ‘o e fefine fe‘auaki, ‘o ‘omi mei ai ‘a e fefine, mo ia kotoa pē ‘oku ‘iate ia, hangē ko e fuakava na‘a mo fai kiate ia.

²³Pea hū atu ‘a e ongo talavou mataki, ‘o na ‘omi mei ai ‘a Lēhapi, mo ‘ene tamai, mo ‘ene fa‘ē, mo hono ngaahi tuonga‘ane, mo ia kotoa pē na‘e ‘iate ia: ko hono ngaahi fāmili foki na‘a na fakahū mai; pea na‘a na tuku kinautolu ke nofo ‘i he tu‘a ‘apitanga ‘o ‘Isileli,

²⁴Pea na‘a nau tutu ‘a e kolo ‘aki ‘a e afi, mo e me‘a kotoa pē na‘e ‘i ai: ngata pē ‘i he siliva mo e koula, mo e nāunau na‘e kapa pe ‘aione, na‘a nau tuku ia ki he falekoloa ‘i he fale ‘o Sihova.

²⁵Pea ko Lēhapi ko e fefine fe‘auaki, pea mo e fale ‘o ‘ene tamai mo ia kotoa pē na‘e ‘iate ia, na‘e fakamo‘ui ‘e Siosiua; pea kuo ne nofo ‘i he lotolotonga ‘o ‘Isileli ‘o a‘u ki he ‘aho ni; koe‘uhi ko ‘ene fufū ‘a e ongo talafekau na‘e tuku atu ‘e Siosiua ke mataki‘i ‘a Sielikō.

²⁶Pea lea tuki ‘a Siosiua ‘i he taimi ko ia, ‘o pehē, Ke mala‘ia ‘i he ‘ao ‘o Sihova ‘a e tangata te ne hanga ‘o toe langa kolo ‘a Sielikō ni: Te ne fai‘aki hono ‘uluaki ‘a e tanupou, Pea te ne fokotu‘u ‘aki hono foha kimui ‘a e matanikolo.

²⁷Ko ia na‘e kau ‘a e ‘Eiki mo Siosiua, pea na‘e pavake hono ongoongo ki he fonua kotoa.