Read KO E TOH TAPU KATOA TONGA KO SIOSIUA 7 Bible Online

KO SIOSIUA 7 - KO E TOH TAPU KATOA TONGA bible

KO SIOSIUA 7

¹KA na‘e fai kākā ‘a ha‘a ‘Isileli ‘i he me‘a kuo tapui: he ko ‘Ākani, ko e foha ‘o Kālimi, ko e foha ‘o Sāpiti, ko e foha ‘o Sala, ‘i he matakali ‘o Siuta, na‘a ne ala ki he me‘a kuo tapui; pea na‘e langa ai ‘a e houhau ‘o Sihova ki ha‘a ‘Isileli.

²Pea fekau atu ‘e Siosiua mei Sielikō ha tu‘unga me‘a ke ‘alu ki ‘Ai, ‘a ia na‘e tu‘u ofi ki Peteaveni, ‘i he feitu‘u ‘o Pēteli ki hahake, ‘o ne lea kiate kinautolu, ‘o pehē, ‘Alu hake ‘o asiasi ‘a e fonua. Pea na‘e ‘alu hake ‘a e tu‘unga me‘a, ‘o fai ‘enau asiasi ki ai.

³Pea nau foki kia Siosiua, ‘o nau pehē kiate ia, Ke ‘oua na‘a ‘alu hake ‘a e kakai kotoa, ka ke ‘alu hake ha toko ua afe pe tolu afe nai ke taa‘i ‘a ‘Ai; ke ‘oua na‘a ongosia hake ‘a e kakai kotoa; he ‘oku nau toko si‘i.

⁴Ko ia na‘e ‘alu ki ai ha ni‘ihi pē ‘o e kakai, fe‘unga nai mo e toko tolu afe: ka na‘a nau hola mei he ‘ao ‘o e kau ‘Ai.

⁵Pea na‘e taa‘i ‘e he kau ‘Ai honau ni‘ihi, ko e toko tolungofulu mā toko ono nai: pea na‘a nau tuli kinautolu mei he matanikolo, ‘o a‘u ki he ngaahi tā‘anga maka, pea nau taa‘i kinautolu ‘i he hifonga, pea na‘e vaivai ‘a e loto ‘o e kakai, ‘o mātu‘aki vai.

⁶Pea hae ‘e Siosiua hono kofu, ‘o ne tō fo‘ohifo ki he kelekele ‘i he ‘ao ‘o e ‘A‘ake ‘o Sihova, ‘o a‘u ki he‘ene efiafi, ‘a ia mo e kau mātu‘a ‘o ‘Isileli; pea na‘a nau laku efu ki honau ‘ulu.

⁷Pea pehē e Siosiua, ‘Oiauē, ‘Eiki Sihova, ko e hā na‘a ke hanga ai ‘o fakalaka mai ‘a e kakai ni ‘i Soatani, ke tuku kinautolu ki he nima ‘o e kau

⁸‘Āmoli, ke mau ‘auha? Taumaiā na‘a mau fiemālie ke nofo ‘i he potu ki kō ‘o Soatani! ‘Ātonai ē, ko e hā ai ha‘aku lea ‘e fai, ka kuo sītu‘a ‘a ‘Isileli ki honau ngaahi fili?

⁹Pea ‘e fanongo ki ai ‘a ha‘a Kēnani, pea mo e nofo fonua kotoa pē, pea te nau ha‘ofia kimautolu, ‘o tāmate‘i homau hingoa mei māmani: pea ko e hā ai ‘au ‘e fai ki ho huafa lahi na?

¹⁰Pea folofola ‘a e ‘Eiki kia Siosiua, Tu‘u hake mu‘a; ko e hā ‘oku ke fo‘ohifo pehē ai?

¹¹Kuo hia ‘a ‘Isileli, pea kuo nau maumau‘i foki ‘eku kovinānite ‘a ia na‘a ku tu‘utu‘uni kiate kinautolu: kuo nau ala foki ki he me‘a na‘a ku pehē ‘e tuku li‘aki; pea kuo nau kaiha‘asi foki, pea kuo nau fufū foki, ‘io, pea kuo nau ‘ai fakataha mo ‘enau koloa.

¹²Ko hono ‘uhinga ia na‘e ‘ikai lava ai ‘e ha‘a ‘Isileli ke tu‘u ‘i he ‘ao ‘o honau ngaahi fili; ‘oku nau sītu‘a ki honau ngaahi fili koe‘uhi kuo nau hoko kinautolu ko e me‘a tuku li‘aki: ‘e ‘ikai te u toe ‘iate kimoutolu, ‘o kapau ‘e ‘ikai te mou faka‘auha mei homou lotolotonga ‘a e me‘a na‘e tuku li‘aki.

¹³Tu‘u, fakatāpui ‘a e kakai, mo ke pehē, Mou tapui kimoutolu ki he ‘apongipongi: he ko ‘eni ‘a e folofola ‘a Sihova ko e ‘Otua ‘o ‘Isileli, ‘E ‘Isileli, ‘oku ‘i ho lotolotonga ha me‘a kuo tapui: ‘e ‘ikai te ke lava ke tu‘u ‘i he ‘ao ‘o ho ngaahi fili, kae‘oua ke mou hu‘ihu‘i mei homou lotolotonga ‘a e me‘a kuo tapui.

¹⁴Ko ia ‘e fakaofi mai kimoutolu ‘apongipongi, ‘o fakafo‘i-matakali: pea ko e matakali ‘e tonu ki ai ‘a e sivi ‘a Sihova ‘e fakaofi ia ‘o fakafo‘i-fa‘ahinga: pea ko e fa‘ahinga ‘e tonu ki ai ‘a e sivi ‘a Sihova ‘e fakaofi ia ‘o fakafo‘i-fāmili: pea ko e fāmili ko ia ‘e tonu ki ai ‘a e sivi ‘a Sihova ‘e fakaofi ia ‘o fakafo‘i-tangata.

¹⁵Pea ko ia ‘e ma‘u ki ai ‘a e me‘a ne tapui ‘e tutu ‘aki ‘a e afi, ‘a ia mo ia kotoa pē ‘oku ‘iate ia: koe‘uhi kuo ne maumau‘i ‘a e kovinānite ‘o Sihova; pea koe‘uhi kuo ne fai fakalielia ‘i ‘Isileli.

¹⁶Pea ‘a hengihengi hake ‘a Siosiua, ‘o ne fakaofi ‘a ‘Isileli, ‘o fakafo‘i-matakali; pea na‘e tonu ki he matakali ‘o Siuta:

¹⁷pea ne fakaofi ‘a e fāmili ‘o Siuta, ‘o ne ma‘u ‘a ha‘a Sala; pea na‘a ne fakaofi ‘a e fāmili ‘o ha‘a Sala, fakafo‘i-tangata, pea na‘e tonu kia Sāpiti:

¹⁸pea na‘a ne fakaofi hono fāmili, fakafo‘i-tangata; pea na‘e tonu kia ‘Ākani ko e foha ‘o Kālimi, ko e foha ‘o Sāpiti, ko e foha ‘o Sala, ‘i he matakali ‘o Siuta.

¹⁹Pea lea ‘a Siosiua kia ‘Ākani, Tama, ke ke tuku kolōlia mu‘a kia Sihova ko e ‘Otua ‘o ‘Isileli, pea ke fakamo‘oni kiate e ia; pea ke tala mai mu‘a kiate au ‘a e me‘a na‘a ke fai; ‘oua te ke fufū meiate au.

²⁰Pea tali ‘e ‘Ākani kia Siosiua, ‘o pehē, Ko e mo‘oni kuo u fai angahala kia Sihova, pea na‘e pehē mo pehē ‘eku fai.

²¹Na‘a ku mamata ‘i he vete ki ha pulupulu faka-Pāpilone ‘e taha na‘e fungani, pea mo ha sikeli siliva ‘e uangeau, pea mo ha ‘elelo koula na‘e nimangofulu sikeli hono mamafa; pea u mānumanu ki ai, pea u to‘o: pea ko eni kuo tuku fufū ia ‘i he kelekele ‘i hoku loto tēniti, pea ko e siliva ‘oku ‘i lalo.

²²Pea kouna atu ‘e Siosiua ha kau talafekau ke nau lele ki he tēniti, pea tā kuo tuku fufū ia ‘i hono tēniti, pea ko e siliva na‘e ‘i lalo.

²³Pea na‘a nau to‘o mei he tēniti, ‘o ‘omi kia Siosiua, pea ki ha‘a ‘Isileli kātoa; pea nau folahi ia ‘i he ‘ao ‘o Sihova.

²⁴Pea puke ‘e Siosiua ‘a ‘Ākani ko e foha ‘o Sala, pea mo e siliva, mo e pulupulu, mo e ‘elelo koula, mo hono ngaahi foha, mo hono ngaahi ‘ōfefine, mo ‘ene fanga pulu, mo ‘ene fanga ‘asi, mo ‘ene fanga sipi, mo hono tēniti, mo ia kotoa pē na‘e ‘iate ia; pea na‘e ō mo ia ‘a ‘Isileli kotoa, ‘o nau ‘ohake kinautolu ki he tele‘a ko ‘Ākoli.

²⁵Pea lea hake ‘a Siosiua, Ko e hā kuo ke fakamamahi‘i ai kimautolu? ‘E fakamamahi‘i koe ‘e Sihova he ‘aho ni. Pea na‘e tolomaka‘i ia ‘e ‘Isileli kātoa; pea na‘a nau tutu kinautolu ‘aki ‘a e afi, pea na‘a nau toki lī maka kiate kinautolu.

²⁶Pea na‘a nau tokotu‘u kiate ia ha fu‘u ‘esi maka, ‘a ia ‘oku tu‘u ‘o a‘u ki he ‘aho ni: pea na‘e toki foki ‘a Sihova mei he kakaha ‘o ‘ene houhau. Ko ia na‘e hingoa ai ‘a e potu ko ia, Ko Tele‘a ‘Ākoli (Fakamamahi) ‘o a‘u ki he ‘aho ni.