Read KO E TOH TAPU KATOA TONGA KO SIOSIUA 8 Bible Online

KO SIOSIUA 8 - KO E TOH TAPU KATOA TONGA bible

KO SIOSIUA 8

¹PEA folofola ‘a Sihova kia Siosiua, ‘Oua te ke manavahē, pea ‘oua te ke tailiili: ‘ave ‘a e kakai kotoa ‘oku ‘i he tau, pea ke tu‘u hake, ‘o ‘alu ki ‘Ai: vakai kuo u tuku ki ho nima ‘a e Tu‘i ‘Ai, mo hono kakai, mo hono kolo, mo hono fonua:

²pea te ke fai ki ‘Ai mo hono tu‘i, ‘o hangē ko ho‘o fai ki Sielikō mo e tu‘i ‘o‘ona: ka ko hono koloa pē, mo hono monumanu, te ke vete ma‘amoutolu: fakatoka ha‘amou malumu ki he kolo mei hono feitu‘u ki ko.

³Ko ia na‘e tutu‘u ‘a Siosiua, mo e kakai kotoa na‘e ‘i he tau, ke ‘alu hake ki ‘Ai: pea fili ‘e Siosiua ha toko tolu mano ko e kau to‘a, ‘o ne tuku po‘uli atu kinautolu.

⁴Pea ne tu‘utu‘uni kiate kinautolu ‘o pehē; Vakai, te mou toka malumu kimautolu ki he kolo mei he potu ki kō: ‘oua te mou mama‘o fau mei he kolo, ka mou nofo talitali pē,

⁵pea ko au mo e kakai kotoa ‘oku ‘iate au te mau fakaofi ki he kolo: pea ka faifai ‘o nau hū ki tua‘ā ke fakafepaki mai, ‘o hangē ko ‘enau fai mu‘a, te mau hola meiate kinautolu:

⁶pea te nau ‘aukau mai ki tua‘ā homau tuli, pea te mau tohoaki kinautolu ke mama‘o mei he kolo:

⁷he te nau pehē, ‘Oku nau hola meiate kitautolu, ‘o hangē ko e fai mu‘a (‘io, pea te mau hola meiate kinautolu) pea ‘e toki hiki ho‘omou malumu, pea te mou kapa ‘a e kolo; pea ‘e tuku ia ki homou nima ‘e Sihova ko homou ‘Otua.

⁸Pea kuo mou ma‘u leva ‘a e kolo, pea te mou toki tutu ia ‘aki ‘a e afi: te mou fai pē ‘a e tu‘utu‘uni ‘a Sihova: vakai kuo u kouna kimoutolu. Pea na‘e tuku atu kinautolu ‘e Siosiua.

⁹Pea na‘a nau ‘alu ki honau toka‘anga malumu, ‘o nau nofo ‘i he vaha‘a ‘o Pēteli mo ‘Ai, ‘i he potu hihifo ‘o ‘Ai: ka ka toka ‘a Siosiua ‘i he pō ko ia ‘i he lotolotonga ‘o e kakai. Pea tu‘u hengihengi hake ‘a Siosiua.

¹⁰‘O ne fakatē ‘a e kakai, pea taki ‘e ia mo e kau mātu‘a ‘Isileli ‘i he ‘alu hake ‘a e kakai ki ‘Ai.

¹¹Pea ko e kakai kotoa, ‘a e kau tau na‘e ‘iate ia, na‘a nau ‘alu hake, ‘o fakaofi atu ‘o a‘u ki he hāngai ki he kolo, pea nau ‘apitanga ‘i he feitu‘u tokelau ‘o ‘Ai; pea na‘e ai ha tele‘a ‘i honau vaha‘a mo ‘Ai.

¹²Pea na‘a ne vahe mai ha toko nima afe nai, ‘o ne tuku ke nau toka malumu ‘i he vaha‘a ‘o Pēteli mo ‘Ai, ‘i he potu hihifo ‘o e kolo.

¹³Ko ia na‘a nau fokotu‘u ‘a e kakai, ‘a e hōsitē kotoa na‘e ‘i he potu tokelau ‘o e kolo, pea ko e kau toi ‘i he potu lulunga ‘o e kolo; pea hā‘ele ‘a Siosiua ‘i he pō ko ia ‘i he loto tele‘a.

¹⁴Pea ‘i he faifai pea sio ki ai ‘e he Tu‘i ‘Ai, na‘a nau tutu‘u vave hake ‘i he pongipongi, ‘a e kakai ‘o e kolo, ‘o nau hū ki tua‘ā ke fakafepaki ki ha‘a ‘Isileli ke tau, ‘a ia mo hono kakai kotoa, ki he potu kuo tu‘utu‘uni ki ai, ‘i he kamata‘anga ‘o e ‘Alapā, ka na‘e ‘ikai te ne ‘ilo kuo toka malumu kiate ia mei he tu‘a kolo.

¹⁵Pea fai ‘e Siosiua mo ‘Isileli kātoa ‘o hangē ‘oku nau vaivai kiate kinautolu, pea na‘a nau feholaki ‘i he hala toafa.

¹⁶Pea na‘e ui mai ‘a e kakai kotoa na‘e ‘i he kolo ke muia ‘a kinautolu; pea na‘a nau tuli kia Siosiua, pea na‘e tohoaki kinautolu ke mama‘o mei he kolo.

¹⁷Pea na‘e ‘ikai toe ha toko taha ‘i ‘Ai, pe Pēteli,[2] kuo nau hū mai kotoa ke muia ‘a ‘Isileli; pea na‘a nau tuku ava pē ‘a e kolo, ‘o nau tuli ki ha‘a ‘Isileli.

¹⁸Pea folofola ‘a Sihova kia Siosiua, Mafao atu ‘a e tao ‘oku ‘i ho nima ki ‘Ai; he te u tuku ia ki ho nima. Pea na‘e mafao atu ki he kolo ‘e Siosiua ‘a e tao na‘a ne to‘o.

¹⁹Pea langa leva ‘a e malumu mei he feitu‘u na‘a nau ‘i ai, pea ‘i he‘ene mafao atu hono nima na‘a nau lele ‘o hū ki he kolo, ‘o kapa ia; pea nau fakavave ‘o tutu ia ‘aki ‘a e afi.

²⁰Pea hanga ki tu‘a ‘a e kau ‘Ai, pea nau vakai, tā ‘oku ‘alu hake ki langi ‘a e kohu ‘o e kolo, pea ‘ikai leva hanau ivi ke hola ki hē pe ki hē: pea ko e kakai kuo hola ki he toafa na‘a nau tafoki ke fakafepaki ki he kau tulimui.

²¹Pea ‘i he vakai ‘e Siosiua mo ‘Isileli kātoa kuo kapa ‘a e kolo ‘e he malumu, pea ‘oku kohu hake ‘a e kolo, na‘a nau foki, ‘o taa‘i ‘a e kau ‘Ai.

²²Pea hū mai mei he kolo ‘a e malumu foki, ke fakafepaki kiate kinautolu; ko ia na‘a nau ‘ākilotoa ‘i ha‘a ‘Isileli, ‘i he vaha‘a ‘o kinautolu mei hē mo kinautolu mei hē:

²³pea na‘a nau taa‘i kinautolu, ‘o ‘ikai te nau tuku ha taha ke toe pē hola. Ka ko e Tu‘i ‘Ai na‘a nau puke mo‘ui, ‘o nau ‘omi ia kia Siosiua.

²⁴Pea ‘i he faifai pea ‘osi hono tāmate‘i ‘e ‘Isileli ‘a e kakai ‘o ‘Ai ‘i he vao, mo e toafa ‘a ia na‘a nau tuli ai kiate kinautolu, pea kuo nau tō kotoa ‘i he mata ‘o e heletā, ‘o ‘osi‘osingamālie, pea na‘e toki foki mai ‘a e kakai ‘Isileli kotoa ki ‘Ai, pea nau taa‘i ia ‘aki ‘a e mata ‘o e heletā.

²⁵Pea ko e lau ‘o e kakai na‘e tō ‘i he ‘aho ko ia, ‘a e tangata mo e fefine, ko e toko taha mano mā ua afe, ko e kakai kotoa ia ‘o ‘Ai.

²⁶He na‘e ‘ikai ke tuku mai ‘e Siosiua ‘a e nima na‘a ne puke ‘aki ‘a e tao kae‘oua ke faka‘auha ‘a e kau nofo ‘Ai kotoa pē.

²⁷Ngata pē ‘i he monumanu ‘o e kolo, ko ia mo hono koloa na‘e vete ‘e ‘Isileli ma‘anautolu, ‘o hangē ko e me‘a ‘a Sihova na‘a ne tu‘utu‘uni kia Siosiua.

²⁸Pea tutu ‘e Siosiua ‘a ‘Ai, ‘o ne ngaohi ia ko e tu‘unga ‘oto‘ota ‘o ta‘engata, ko e koto lusa pē ‘o a‘u ki he ‘aho ni.

²⁹Pea ko e Tu‘i ‘Ai na‘a ne tautau ‘i ha ‘akau ‘o a‘u ki he efiafi: pea ‘i he ‘alu hifo ‘a e la‘ā, na‘e fekau ‘e Siosiua, pea na‘a nau ‘ohifo hono ‘anga‘anga mei he ‘akau, ‘o nau lī ki he hū‘anga ‘o e matanikolo, ‘o nau fokotu‘u ai ha ‘esi maka lahi, ‘a ia ‘oku tu‘u ‘o a‘u ki he ‘aho ni.

³⁰‘I he taimi ko ia na‘e fokotu‘u ‘e Siosiua ha ‘ōlita kia Sihova ko e ‘Otua ‘o ‘Isileli ‘i he mo‘unga ko ‘Ēpale,

³¹‘o hangē ko e tu‘utu‘uni na‘e fai ki ha‘a ‘Isileli ‘e Mōsese ko e Sevāniti ‘a Sihova, ‘o hangē ko ia na‘e tu‘u ‘i he tohi lao ‘a Mōsese, ko e ‘ōlita maka tekanoa, ‘a ia kuo te‘eki ke apo ‘e ha tangata ha ukamea ki ai: pea na‘a nau feia ai ha ngaahi feilaulau-mōifua kia Sihova, ‘o nau tāmate‘i mo e ngaahi feilaulau-‘ofa.

³²Pea na‘a ne tohi ‘i he potu ko ia ‘i he ngaahi maka[3] ‘a e tatau ‘o e lao ‘a Mōsese, ‘a ia na‘a ne tohi ‘i he ‘ao ‘o e kakai ‘Isileli,

³³Pea ko ha‘a ‘Isileli kātoa mo honau kau mātu‘a, mo honau kau ‘ōfisa, mo honau kau fakamaau, na‘a nau tutu‘u ‘i he potu ko ē mo ē ‘o e ‘A‘ake, ‘o fehangahangai mo e kau Līvai taula‘eiki na‘e kauala ‘a e ‘A‘ake ‘o e Kovinānite ‘o Sihova, ‘o ‘i ai ‘a e tupu muli mo e tupu‘i fonua fakatou‘osi; ko hono vaeua na‘e ‘i he tafa‘aki mai ‘o Kelisimi, ka ko hono vaeua na‘e ‘i he tafa‘aki mai ‘o e mo‘unga ko ‘Īpale; ‘o hangē ko e tu‘utu‘uni ‘a Mōsese ko e Sevāniti ‘a Sihova ke fuofua tāpuaki ‘a e kakai ‘Isileli,

³⁴Pea hili ‘a e fai pehē, na‘a ne lau ‘a e ngaahi lea kotoa ‘o e lao, ‘a e tāpuaki mo e fakamala‘ia, ‘o hangē ko ia kotoa na‘e tu‘u ‘i he tohi lao.

³⁵Na‘e ‘ikai ha momo‘i lea ‘i he me‘a kotoa na‘e tu‘utu‘uni ‘e Mōsese ‘a ia na‘e ‘ikai ke ‘a‘au ‘e Siosiua ‘i he ‘ao ‘o e fakataha kotoa ‘o ‘Isileli, mo honau kau fefine, mo honau tamaiki, pea mo e muli na‘e felemofafo ‘iate kinautolu.