Read KO E TOH TAPU KATOA TONGA KO SIOSIUA 9 Bible Online

KO SIOSIUA 9 - KO E TOH TAPU KATOA TONGA bible

KO SIOSIUA 9

¹PEA ‘i he fanongo ‘e he ngaahi tu‘i ‘i he feitu‘u ko ē ‘o Soatani, ‘a kinautolu na‘e nofo ‘i he fonua mo‘unga, mo kinautolu ‘i he Sēfela‘a, mo kinautolu ‘i he matāfonua e Tahi Lahi ‘i he tafa‘aki ‘o Lepanoni, ‘a e Heti, mo e ‘Āmoli, mo e Kēnani, mo e Pēlisi, mo e Hevi, pea mo e Siepusi,

²pea na‘a nau toki fakatahataha, ‘o nau alea ke fai tau mo Siosiua mo ‘Isileli.

³Ka ‘i he fanongo ‘e he kakai Kipione ki he me‘a kuo fai ‘e Siosiua ki Sielikō mo ‘Ai,

⁴na‘e hanga ai ‘e kinautolu foki, ‘o nau fai fakaoloolo, ‘o nau ‘alu ‘o hangē ko ha kau fakafofonga, ‘o nau fakaheka ki he‘enau fanga ‘asi ha ngaahi tangai kuo motu‘a, mo e ngaahi ‘ainga uaine leta kuo motu‘a mo mahaehae mo no‘ono‘o;

⁵pea nau ‘ai ‘a e ngaahi sū kuo motu‘a, mo ‘oposi, ‘o nau tui ‘a e ngaahi kofu kuo motu‘a; pea ko e mā kotoa ‘o honau ‘oho kuo mōmoa, pea tu‘unga-fulufulua.

⁶Pea na‘a nau ‘alu kia Siosiua ki he ‘apitanga ‘i Kilikali, pea na‘a nau lea kiate ia mo e kau ‘Isileli, ‘o pehē, Ko ‘emau omi e mei ha fonua mama‘o; pea ko eni ke tau talite mu‘a.

⁷Pea tala ‘e he kau ‘Isileli ki ha‘a Hevi, Na‘a ‘oku mou nofo ofi mai; pea te mau talite fēfē mo kimoutolu?

⁸Pea na‘a nau pehē kia Siosiua, Ko ho‘o kau tamaio‘eiki kimautolu. Pea pehē ‘e Siosiua kiate kinautolu, Ko hai kimoutolu, pea ko e omi mei fē?

⁹Pea na‘a nau pehē kiate ia, Ko e fonua mama‘o ‘aupito kuo omi mei ai ‘a ho‘o kau tamaio‘eiki, koe‘uhiā ko e huafa ‘o Sihova ko ho ‘Otua:

¹⁰he kuo pavake mai hono ongoongo, mo ia kotoa pē na‘a ne fai ‘i ‘Isipite, mo ia kotoa pē na‘a ne fai ki he ongo tu‘i ‘Āmoli ‘i he potu ki kō ‘o Soatani, kia Sīhoni ko e Tu‘i Hesiponi, pea mo ‘Oki ko e Tu‘i Pēsani ‘a ia na‘e nofo ‘i ‘Asiteloti.

¹¹Pea na‘e lea mai kiate kimautolu ‘e homau kau mātu‘a mo e kakai kotoa ‘o homau fonua, ‘o pehē, ‘Ave ha ‘oho ki he fononga, pea mou ‘alu ‘o fakafetaulaki kiate kinautolu, ‘o mou pehē ki ai, Ko ho‘omou tamaio‘eiki kimautolu; ko ia fai mu‘a ha talite mo kimautolu.

¹²Ko si‘emau me‘akai e na‘a mau ‘omi māfana mei fale ma‘amau ‘oho ‘i he ‘aho na‘a mau hū mai ke ha‘u kiate kimoutolu; pea vakai ā, kuo mōmoa mo tu‘unga-fulufulua:

¹³pea ko e ngaahi ‘ainga uaine e na‘a mau fakafonu na‘e fo‘ou, kae vakai kuo mahaehae; pea ko si‘omau ngaahi kofu mo e sū kuo motu‘a ‘i he mama‘o fau ‘a e fononga.

¹⁴Pea to‘o ‘e he kau tangata ha me‘a mei honau ‘oho, ‘o ‘ikai te nau huhū ki he fofonga ‘o Sihova.

¹⁵Pea na‘e alea melino ‘a Siosiua mo kinautolu, ‘o ne fai ha talite mo kinautolu ke nau mo‘ui: pea na‘e fuakava kiate kinautolu ‘e he hou‘eiki ‘o e fakataha.

¹⁶Pea ‘i he ‘osi ha ‘aho ‘e tolu, hili ‘enau fai talite mo kinautolu, na‘a nau fanongo ta ko e fa‘ahinga ko ia ‘oku nau taufonua mo kinautolu, pea ‘oku nau mātu‘aki nofo ofi mai.

¹⁷Pea na‘e hiki ‘o fononga ‘a ha‘a ‘Isileli, ‘o nau a‘u ki honau ngaahi kolo ‘i hono tolu ‘o e ‘aho. Pea ho honau ngaahi kolo eni, ko Kipione, mo Kēfila, mo Piheloti, pea mo Kolovao.

¹⁸Pea na‘e ‘ikai taa‘i kinautolu ‘e ha‘a ‘Isileli, koe‘uhi kuo fuakava kiate kinautolu ‘e he hou‘eiki ‘o e fakataha ‘ia Sihova ko e ‘Otua ‘o ‘Isileli, pea na‘e lāunga ‘a e fakataha kotoa ki he hou‘eiki.

¹⁹Ka ka tali ‘e he hou‘eiki ki he fakataha, Kuo mau fuakava kiate kinautolu ‘ia Sihova ko e ‘Otua ‘o ‘Isileli: ko ia foki ‘e ‘ikai lava ha‘atau ala ki ai.

²⁰Ko eni ‘a e me‘a te tau fai kiate kinautolu, kae tuku ke nau mo‘ui; ke ‘oua na‘a tō mai ha houhau koe‘uhi ko e fuakava na‘a mau fai kiate kinautolu.

²¹Ko ia na‘e lea kiate kinautolu ‘a e hou‘eiki, Ke nau mo‘ui: pea na‘a nau hoko ko e kau tā fefie mo e kau ‘utuvai ki he fakataha kātoa; ‘o hangē ko e lea ‘a e hou‘eiki.

²²Pea ui ange kinautolu ‘e Siosiua, ‘o ne lea ki ai, ‘o pehē, Ko e hā na‘a mou fakahekeheke‘i ai kimautolu, ho‘omou pehē, Ko e kakai mama‘o ‘aupito kimautolu; ‘osi, ‘oku tau nonofo vāofi?

²³Pea ko eni ‘oku mou mala‘ia, pea ‘e ‘ikai tuku ‘a e nofo pōpula homou ni‘ihi ke tā fefie mo ‘utuvai ki he fale ‘o hoku ‘Otua.

²⁴Pea na‘a nau tali kia Siosiua, ‘o pehē, Koe‘uhi ā na‘e mātu‘aki tala ki ho‘o kau tamaio‘eiki ko kimautolu ‘a e me‘a kuo tu‘utu‘uni ‘e Sihova ko homou ‘Otua ki he‘ene Sevāniti ko Mōsese, ke ‘atu ‘a e fonua ni kotoa, pea ke faka‘auha ‘i homou ‘ao ‘a e kakai kotoa ‘oku nofo ‘i he fonua ni; ko ia na‘a mau manavahē lahi telia ‘emau mo‘ui, koe‘uhi ko kimoutolu, pea mau fai ‘a e me‘a ko ia.

²⁵Pea ko e nō ‘oku ma‘u ‘i ho nima; fai pe ha me‘a kiate kimautolu ‘oku hā lelei mo totonu kiate koe ke fai.

²⁶Pea ne fai pehē kiate kinautolu, ‘o ne fakahaofi mei he nima ‘o e kakai ‘Isileli, ko ia na‘e ‘ikai te nau tāmate‘i kinautolu. Pea na‘e tu‘utu‘uni ‘e Siosiua ‘i he ‘aho ko ia ke nau nofo ko e kau tā fefie mo ‘utuvai ki he fakataha mo e ‘ōlita ‘o Sihova; pea ‘oku fai ki ai ‘o a‘u ki he ‘aho ni, ‘i he potu ‘oku ne fili ki ai.