Read KO E TOH TAPU KATOA TONGA Tesalonaiká 2 1 Bible Online

Tesalonaiká 2 1 - KO E TOH TAPU KATOA TONGA bible

Tesalonaiká 2 1

¹TŪ ko kimautolu, ‘a Paula mo Silivenusi mo Tīmote, ko ‘emau tohi ki he siasi ko ia ‘o e kakai Tesalonaika, ‘a ia ‘oku ‘i he ‘Otua ko ‘etau Tamai pea mo e ‘Eiki ko Sīsū Kalaisi.

²‘Ofa ke mou ma‘u kelesi mo e fiemālie mei he ‘Otua ko ‘etau Tamai, mo e ‘Eiki ko Sīsū Kalaisi.

³Kāinga, ‘oku hā mai ko ‘emau ngāue ke fai, ko e fakafeta‘i ma‘u ai pē ki he ‘Otua koe‘uhi ko kimoutolu; ‘io, ko hono taau ia, koe‘uhi ko e fu‘u tupulekina ‘o ho‘omou tui, pea mo e fakalahi ‘o ho‘omou ‘ofa, ko e ‘ofa ‘a e taha ki he taha.

⁴Ko ia, na‘a mo kimautolu ‘oku mau pōlepole ‘iate kimoutolu ‘i he ngaahi siasi ‘o e ‘Otua, koe‘uhi ko ho‘omou kātaki mo ho‘omou tui; neongo e ngaahi fu‘u fakatanga ‘omoutolu, mo e ngaahi mamahi ‘oku mou lolotonga fetakai.

⁵‘A ia ko e fakamo‘oni ‘oku ‘i ai ha fakamaau totonu ‘a e ‘Otua, ke faifai pea fakahā ai ho‘omou taau mo e Pule‘anga ‘o e ‘Otua, ‘a ia foki ko e me‘a ‘oku tautekovia ai kimoutolu.

⁶‘O kapau leva ‘oku me‘a ‘a e ‘Otua ‘oku totonu ke tongi mamahi kiate kinautolu ‘oku fakamamahi‘i kimoutolu:

⁷pea ke totongi kiate kimoutolu kuo fakamamahi‘i ‘aki ha mālōlō, ‘a ia te mou ma‘u fakataha mo kimautolu, ‘oka fakapū mai ‘a e ‘Eiki ko Sīsū mei he langi ‘i ha uloafi, pea ha‘ofia ‘e hono lahi ko e kau ‘āngelo,

⁸he‘ene fai sauni ki he kau ta‘e‘ilo ‘Otua, pea ki he kau ta‘etalangofua ki he Kōsipeli ‘o hotau ‘Eiki ko Sīsū;

⁹ko e fa‘ahinga ia te nau kai hono nunu‘a ko e faka‘auha ta‘engata, ‘o mama‘o mo e fofonga ‘o e ‘Eiki, pea mama‘o mei he lāngilangi ‘o ‘ene māfimafi;

¹⁰‘i he ‘aho ko ia te ne hoko mai ke hā hono lāngilangi he‘ene ho‘ata ‘i hono kau mā‘oni‘oni, pea hā hono fakaofo he‘ene ho‘ata ‘i he kakai na‘e tui; (‘o hangē pē ko ho‘omou tui ki he fakamatala na‘a mau fai atu).

¹¹Pea koe‘uhi ke lava ‘a e me‘a ko ia, ko ia ‘oku mau hūfia foki kimoutolu ma‘u ai pē; koe‘uhi ke me‘a mo finangalo ‘e homau ‘Otua ‘oku mou taau mo e lakanga ne ui kimoutolu ki ai: pea ke ‘ilonga ha fakakaukau ‘o ho‘omou fie faitotonu, pea ke ‘ilonga ha feinga ‘o ho‘omou tui, ke ne fakaai ia ke tu‘u kaukaua;

¹²kae faifai pea hā ‘a e lāngilangi ‘o e huafa ‘o hotau ‘Eiki ko Sīsū, he‘ene ho‘ata ‘iate kimoutolu; pea ke hā homou lāngilangi he‘ene ho‘ata ‘iate ia: ‘o fakatatau ki he kelesi ‘a hotau ‘Otua, mo e ‘Eiki[1] ko Sīsū Kalaisi.