Read KO E TOH TAPU KATOA TONGA Tesalonaiká 2 2 Bible Online

Tesalonaiká 2 2 - KO E TOH TAPU KATOA TONGA bible

Tesalonaiká 2 2

¹PEA ko e me‘a ki he hoko mai ‘a hotau ‘Eiki ko Sīsū Kalaisi, mo hotau fakatahataha kiate ia, ‘oku mau kole atu, kāinga,

²ke ‘oua na‘a ue‘ingofua kimoutolu mei homou ‘alunga; kae‘uma‘ā ke ‘oua te mou puputu‘u ‘i ha palofisai, pe ‘i ha lea pe tohi, neongo te nau lau ‘oku meiate kimautolu ia; ‘o pehē kuo hokosia ‘a e ‘aho ‘o e ‘Eiki.

³Ke ‘oua na‘a fakahekea kimoutolu ‘e ha toko taha ‘i ha anga ‘e taha; he ‘oku ‘oua pē ia ke motu‘a hoko ‘a e fu‘u fakaholomui, pea mo e fakapū mai ‘a e tangata ko Malakilao, ko e Fanautama ‘a Mala, ko Fakafili;

⁴‘a ia ‘ilonga ha ‘Otua ‘oku lau ko e ‘Otua, pe ha me‘a ‘oku fai ki ai ‘a e lotu, pea ‘oku ne fakafekāke‘i hake ki ai; ‘io, ‘oku ne mātu‘aki hū ki he Potu Tapu ‘o e ‘Otua, ‘o ne nofo ai, ‘o ne fakahāhā ia ko e ‘Otua.

⁵‘Oku ‘ikai te mou manatu koā, na‘a ku tala ‘a e ngaahi me‘a ko ia ‘i he‘eku ‘iate kimoutolu mu‘a?

⁶Pea ko eni ‘oku mou ‘ilo ‘a e me‘a ‘oku pukepuke hono fakapū, kae‘oua ke hoko hono kuonga totonu.

⁷He na‘a mo eni ‘oku ngāngāue hono misiteli ‘o e Malakilao; ka ko e ‘oua pē ke hiki ‘a e toko taha ‘oku pukepuke, pea ‘e toki fakapū mai ‘a Malakilao:

⁸‘a ia ‘e tāmate‘i ‘e he ‘Eiki ko Sīsū ‘aki ‘a e mānava ‘o hono fofonga, pea faka‘auha ‘aki ‘a e fotuaki ‘o ‘ene hoko mai.

⁹Ka ko e hoko mai ‘a e toko taha ko ia ‘e fakatatau ki he fa‘a ngāue ‘a Sētane, he‘ene fai‘aki ‘a e ngaahi fa‘ahinga mana kehekehe, mo e me‘a faka‘ilonga mo e me‘a fakaofo, ka ko e koto loi pē;

¹⁰mo e fai‘aki ‘a e fa‘ahinga fakahekeheke kotoa pē ki he kakai, ka ko e koto kākā: ‘io, ‘o fai ki he kakai ‘oku fakatau ki mala, ko e totongi ‘o e ‘ikai te nau tali ‘a e ‘ofa ki he mo‘oni ka nau mo‘ui ai.

¹¹Pea ko hono ō ia ‘o e fekau atu kiate kinautolu ‘e he ‘Otua ha feinga fakahē, koe‘uhi ke nau tui ki he loi:

¹²kae faifai pea fakamaau ‘a kinautolu kotoa pē ‘oku ‘ikai tui ki he mo‘oni, ka ‘oku nau mālie‘ia ‘i he me‘a ‘oku hala.

¹³Ka ko kimautolu, ko ‘emau ngāue ke fai, ko e fakafeta‘i ma‘u ai pē ki he ‘Otua koe‘uhi ko kimoutolu, si‘i kāinga ‘ofeina ‘e he ‘Eiki, koe‘uhi ko e fili kimoutolu ‘e he ‘Otua mei he kamata‘anga,[2] ke mou ma‘u ‘a e fakamo‘ui, ‘i he fakamā‘oni‘oni‘i kimoutolu ‘e he Laumālie, pea ‘i ho‘omou tui ki he mo‘oni:

¹⁴‘a ia na‘e ui kimoutolu ki ai ‘e he‘emau Kōsipeli, ke mou lava‘i ‘a e lāngilangi ‘o hotau ‘Eiki ko Sīsū Kalaisi.

¹⁵‘Āua; ko ia, kāinga, ke mou tu‘u pē, pea puke ‘a e ngaahi tu‘utu‘uni na‘a mou ako ai ‘i he‘emau ngaahi lea mo e tohi.

¹⁶Pea ko e ‘Afio ‘a hotau ‘Eiki ko Sīsū Kalaisi, mo e ‘Otua ko ‘etau Tamai, ‘a ia ne ne ‘ofa‘i kitautolu, mo ne tuku mai ha tokoni ta‘engata mo ha ‘amanaki lelei ‘i he fai fakakelesi —

¹⁷‘ofa ke ne tokoni‘i ho‘omoutolu loto, pea ‘ilonga ha‘amou ngāue lelei, pe lea, ‘ofa ke ne poupou ai kimoutolu!