Read KO E TOH TAPU KATOA TONGA Tesalonaiká 2 3 Bible Online

Tesalonaiká 2 3 - KO E TOH TAPU KATOA TONGA bible

Tesalonaiká 2 3

¹KO hono faka‘osi ‘eni. Kāinga, mou hūfia kimautolu, koe‘uhi ā ke lele atu ‘a e folofola ‘a e ‘Eiki, pea fakahīkihiki‘i, ‘o hangē hono fai ‘iate kimoutolu foki.

²Pea koe‘uhi ā ke fakahaofi kimautolu mei he kakai angakehe mo pau‘u: he tala‘ehai ‘oku lotu kotoa pē.

³Ka ko e ‘Eiki ko e toko taha ia ‘oku fai ki he‘ene lea, pea te ne poupou kimoutolu, ‘o le‘ohi mei he Fili.

⁴‘Io, ‘oku mau falala ‘i he ‘Eiki ‘oku mou fai, pea te mou fai, ‘a e ngaahi me‘a ‘oku mau fekau atu.

⁵Pea ‘ofa ke taki tonu ‘e he ‘Eiki homou loto ki he ‘ofa ‘a e ‘Otua, mo e kātaki ‘a Kalaisi.

⁶Pea ko eni, kāinga, ‘oku mau fekau atu ‘i he huafa ‘o e ‘Eiki ko Sīsū Kalaisi, ke ‘ilonga ha kāinga ‘e laka hala, ‘o makehe mo e tu‘utu‘uni na‘a nau ma‘u meiate kimautolu, pea mou fake‘ehi‘ehi mei ai.

⁷He ‘oku mou lāu‘ilo ‘a e me‘a ‘oku totonu ke mou fai ‘i ho‘omou fa‘ifa‘itaki kiate kimautolu. He tala‘ehai na‘a mau laka hala ‘i he‘emau ‘iate kimoutolu;

⁸‘uma‘ā ha‘amau kai mā mofisi pē, kaekehe na‘a mau kai ‘i he ongosia mo e fitefita‘a, he na‘a mau ngāue ‘i he ‘aho mo e pō ke ‘oua na‘a mafasia hamou toko taha.

⁹‘Oku ‘ikai ko ‘eku pehē na‘e tapu, ka koe‘uhi ke mau hoko ko e taipe kiate kimoutolu ke mou fa‘ifa‘itaki mai.

¹⁰Kae ‘uma‘ā, lolotonga ‘emau ‘iate kimoutolu, ko eni ‘a e fekau na‘a mau tuku atu, Ka ‘ikai fie ngāue ha taha, pea ‘oua foki na‘a ne kai.

¹¹He ko eni kuo mau fanongo ‘oku ‘i ai hamou ni‘ihi ‘oku laka hala, ‘o ‘ikai te nau momo‘i ngāue ma‘anautolu, ka nau makaka noa.

¹²Ka ‘oku mau fekau mo enginaki ‘i he ‘eiki ko Sīsū Kalaisi ki he alā kakai pehē, ke nau ngāue haunoa ke kai si‘anau mā totonu.

¹³Pea ko e me‘a kiate kimoutolu, kāinga, ‘oua te mou fiu ‘i he fai lelei.

¹⁴Pea ka ai ha taha ‘oku ‘ikai ke talangofua ki he‘emau lea ‘i he ‘ipiseli ni, ‘ai ke ‘ilonga ‘a e tangata ko ia, pea fakakehekehe mo ia mōno fakamaa‘i.

¹⁵Kae ‘oua ‘e lau ia ko e fili, kae tākitala‘i ia hangē ko e tokoua.

¹⁶Pea ko e ‘Afio ‘a e ‘Eiki, ‘a ia ‘oku ‘a‘ana ‘a e nonga, ‘ofa ke ne ‘atu ‘a e nonga ‘i he taimi kotoa pē mo e me‘a kotoa pē! ‘Ofa ke ‘iate kimoutolu kotoa pē ‘a e ‘Eiki!

¹⁷Ko e fetapa ‘eni ‘oku fai‘aki ‘a e nima ‘o‘oku Paula; ‘a ia ko e faka‘ilonga ‘i he‘eku ‘Ipiseli kotoa pē: ko e anga ‘eni ‘o ‘eku mata‘itohi.

¹⁸Ko e kelesi ‘a hotau ‘Eiki ko Sīsū Kalaisi, ‘ofa ke ‘iate kimoutolu kotoa pē ia.