Read KO E TOH TAPU KATOA TONGA Tīmoté 1 2 Bible Online

Tīmoté 1 2 - KO E TOH TAPU KATOA TONGA bible

Tīmoté 1 2

¹KO IA, ‘oku ou fuofua enginaki ‘a e fai ‘o e ngaahi hū, mo e lotu, mo e hufekina, mo e fakafeta‘i, koe‘uhi ko e kakai kotoa pē.

²Koe‘uhi ko e ngaahi tu‘i, mo kinautolu kotoa pē ‘oku mā‘olunga, koe‘uhi pē ke malu ‘etau mo‘ui, mo fiemālie, ‘o tau mātu‘aki fai fakalotu mo anga māopo.

³Ko e me‘a lelei ia, pea ko e me‘a ‘e hāngai fofonga ki ai ‘a e ‘Otua ko hotau Fakamo‘ui;

⁴‘a ‘Ene ‘Afio ‘oku ne finangalo ke ma‘u mo‘ui ‘e he kakai kotoa pē, pea ke nau a‘usia ‘a e ‘ilo kānokano ki he mo‘oni.

⁵He ‘oku taha pē ‘a e ‘Otua, taha foki ‘a e Fakalaloa ‘i he vaha‘a ‘o e ‘Otua mo e tangata, ko Kalaisi Sīsū ko e tangata.

⁶‘A ia na‘a ne foaki ia ‘e ia ko e fetongi huhu‘i ‘o e kakai kotoa pē, kae toki fai hono fakamatala ‘i hono ngaahi kuonga totonu.

⁷‘A ia ko e me‘a na‘e fokotu‘u au ki ai, ko e malanga mo e ‘aposetolo; (ko ‘eku lea mo‘oni ‘oku ‘ikai ko ‘eku loi) ‘io, ko e faiako ‘a e Senitaile ‘i he lotu mo e mo‘oni.

⁸Ko ia, ko hoku loto ke fai lotu ‘e he kau tangata ‘i he potu kehekehe, ‘o hiki hake ‘a e nima ma‘a, ‘o ta‘eha ‘ita pe ha tāla‘a.

⁹Pehē foki, ko hoku loto ki he kau fefine, ke nau teu ‘aki kinautolu ‘a e kofu ‘oku ngali ke ‘ai, pea ō mo e anga mā mo e anga fakama‘uma‘u: ‘o ‘oua ‘e fai‘aki ‘a e fafatu ‘o e lou‘ulu, pe ko e koula mo e mata‘itofe mo e kofu mahu‘inga.

¹⁰Ka nau fai ke teunga‘ia ‘i he ngaahi ngāue lelei, ‘a ia ko e me‘a ‘oku taau mo e kau fefine ‘oku nau lāvutu ke tauhi ki he ‘Otua.

¹¹Ko e me‘a ‘a e fefine ke tali pē ‘a e akonaki, ‘o fakalongo pē mo fakavaivai ai pē.

¹²Ka ko e fai akonaki, ‘oku ‘ikai te u tuku ki he fefine; ‘uma‘ā ‘a e pule ki he tangata; ka ke nofo fakalongo pē.

¹³He ko ‘Ātama na‘e fua ngaohi, kae kimui ‘a ‘Ivi.

¹⁴Kae‘uma‘ā na‘e ‘ikai oloa ‘a ‘Ātama, ka ko e ‘ū kākā‘ia ‘a e fefine, ‘o ne tō ai ki he faihala.

¹⁵Ka ko hono hala ki he mo‘ui ‘oku fou ‘i he fai fanau;[1] ‘o kapau te nau[2] nofo ma‘u ‘i he tui mo e ‘ofa mo e mā‘oni‘oni, ō mo e fakama‘uma‘u.