Read KO E TOH TAPU KATOA TONGA Tīmoté 1 3 Bible Online

Tīmoté 1 3 - KO E TOH TAPU KATOA TONGA bible

Tīmoté 1 3

¹OKU mo‘oni ‘a e lea — Ka feinga ‘e ha taha ke ma‘u ‘a e lakanga ‘o e faifekau pule, ko ‘ene holi ki ha ngāue lelei.

²Ko ia, ko hono tonu ‘o e faifekau pule ke ta‘emele, ko e husepāniti ‘o ha fefine pē taha,[3] ko e toko taha ‘oku faka‘ehi‘ehi mei he konā, ‘oku anga fakama‘uma‘u, ‘oku maau ‘ene tō‘onga, ‘oku fa‘a fakaafe ‘āunofo, ‘oku poto ‘i he faiako.

³Ko e toko taha ‘oku ‘ikai uaine‘ia; ko e toko taha ‘oku ‘ikai fa‘a tā, ka ‘oku anga kātaki; ‘oku ‘ikai fie fakakikihi, ‘oku ‘ikai ‘ofa ki he pa‘anga;

⁴Ko e toko taha ‘oku pule lelei ki hono fale ‘o‘ona, ‘oku mapule‘i ‘ene fānau ‘i he faka‘apa‘apa ai pē:

⁵(ka ‘o kapau ‘oku ‘ikai lava ‘e ha tangata ke pule ki hono fale ‘o‘ona, pea fēfē ha‘ane tauhi ‘a e Siasi ‘a e ‘Otua?)

⁶Ko e toko taha ‘oku ‘ikai ko e toki liliu; na‘a ‘ao‘aofia hono loto ‘i he ‘afungi, ‘o ne tō ai ki he tautea ‘o e Tēvolo.

⁷Kae‘uma‘ā ko hono tonu ke ne ongoongolelei mei he kakai ‘o tua‘ā, na‘a tō ia ki he laua, pea mo ha tauhele ‘a e Tēvolo.

⁸Pehē foki ko hono tonu ‘o e kau akonaki ke nau anga māopo, ‘o ‘oua ‘e ngutungutuua, ‘oua ‘e nofo ke inu kava lahi, ‘oua ‘e havala ki he pa‘anga ‘uli:

⁹ko e kakai ‘oku nau tauhi ‘a e misiteli ‘o e lotu ‘i he konisēnisi ma‘a.

¹⁰Pea ‘oua ke sivi foki kinautolu; pea ka ‘ikai ha lau ki ai, pea nau toki fai ‘a e ngāue ‘a e akonaki.

¹¹Pehē foki ko hono tonu ‘o e kau fefine[4] ke nau anga māopo, ‘o ‘oua ko e kau fakakovi; ko ha ni‘ihi ‘oku faka‘ehi‘ehi mei he konā, ‘o falala‘anga ‘i he me‘a kotoa pē.

¹²Ke ma‘u ‘e he kau akonaki ha uaifi pē taha,[5] ‘o nau pule‘i lelei ‘enau fānau, mo honau fale ‘onautolu.

¹³He ko kinautolu ne nau lava lelei ‘a e ngāue ‘a e akonaki, ‘oku nau ma‘u ai ma‘anautolu ha tu‘unga lelei, mo e fu‘u loto mālohi he‘enau tui, ko e tui kia Kalaisi Sīsū.

¹⁴Kuo u tohi atu ‘a e ngaahi me‘a ni, neongo ‘eku ‘amanaki ‘e vave ‘eku ‘alu atu.

¹⁵Koe‘uhi, ‘o kapau te u tuai atu, ke ke ‘ilo ‘a e anga ‘oku totonu ke fai‘aki ‘i he lotolotonga ‘o e Fale ‘o e ‘Otua, ‘a ia ko e Fakataha tonu ‘a e ‘Otua Mo‘ui, ko e pou mo e tu‘unga ‘o e Mo‘oni.

¹⁶‘Io, ko e mo‘oni ka ko ha mo‘oni, ko e me‘a taumama‘o ‘a e misiteli ‘o ‘ete lotu — ‘A ia Na‘e fakahā he kakano, Na‘e fakatonuhia he laumālie,[6] Na‘e mātā ‘e he kau ‘āngelo, Na‘e malangaekina ki he Senitaile, Na‘e tui ki ai ‘i māmani, Na‘e ‘ohake ‘o ‘afio he lāngilangi.