Read KO E TOH TAPU KATOA TONGA Tīmoté 1 4 Bible Online

Tīmoté 1 4 - KO E TOH TAPU KATOA TONGA bible

Tīmoté 1 4

¹KA ‘oku folofola fakapatonu mai ‘e he Laumālie, ‘o pehē, ‘E hiki ha ni‘ihi mei he totonu ‘o e lotu ‘i he ngaahi kuonga ‘amui, he‘enau nofo ki he ngaahi fa‘ahikehe fakahala, mo e ngaahi tokāteline ‘a e kau tēvolo:

²ko e me‘a ‘i he fakamatamatalelei ‘a e kakai ‘oku lea loi, ‘a e kakai kuo tā faka‘ilonga ho‘onautolu konisēnisi,

³‘a e kakai ‘oku nau tapui ‘a e mali, ‘o fekau ke faka‘ehi‘ehi mei he ngaahi fa‘ahinga me‘akai, ‘a ia ko e ngaahi me‘a na‘e ngaohi ‘e he ‘Otua ma‘a e kakai ‘oku tui mo ‘ilo kānokano ki he mo‘oni, ke nau kai mo e fakafeta‘i.

⁴He ‘ilonga ha me‘a kuo ngaohi ‘e ke ‘Otua ‘oku lelei ia, pea ‘oku ‘ikai ha me‘a ke li‘aki, kapau ‘e ma‘u mo e fakafeta‘i:

⁵koe‘uhi kuo hoko ko e me‘a mā‘oni‘oni he folofola ‘a e ‘Otua mo e hūfia.

⁶Kapau te ke enginaki ‘a e ngaahi me‘a ni ki he kāinga, te ke hoko ko e faifekau lelei ‘a Kalaisi Sīsū, ‘i ho‘o fakamaheni ai pē koe ‘i he ngaahi tala fakalotu, pea mo e ngaahi fakamatala ‘o e tokāteline lelei na‘a ke ako fakatotolo ki ai.

⁷Ka ko e ngaahi tala tupu‘a fakaetangata na mo fakafinemātu‘a, fakafisi koe ki ai: ka ke ngaohi koe ke anga ki he lotu mo‘oni.

⁸He ko e ngaohi ‘o e sino ‘oku ‘aonga ki ha me‘a si‘i pē, ka ko e lotu mo‘oni ‘oku ‘aonga ki he me‘a kotoa pē; he ‘oku ne ma‘u tala‘ofa ki he mo‘ui ko eni, pea mo ia ka hoko mai.

⁹‘Oku mo‘oni ‘a e lea pea taau ke tali ‘e he loto kotoa.

¹⁰He ko e me‘a ia ‘oku tau fakafitefita‘a ki ai mo tau,[7] koe‘uhi kuo tu‘u ‘etau falala ki he ‘Otua Mo‘ui, ‘a ia ko e Fakamo‘ui ‘o e kakai kotoa pē, kae lahi kiate kinautolu ‘oku tui.

¹¹Ke ke tu‘utu‘uni ‘a e ngaahi me‘a ni mo ako‘aki.

¹²‘Oua na‘a tuku ke fakasīkaka‘i koe ‘e ha taha ko ho‘o talavou; kaekehe ke ke hoko ko e toko taha ke fa‘ifa‘itaki ki ai ‘e he kakai lotu, ‘i he lea, ‘i he ‘ulungāanga, ‘i he ‘ofa, ‘i he tui, ‘i he anga ma‘a.

¹³Nofo ki he lau lēsoni, mo e fai ha tokoni, mo e faiako, kae‘oua ke u ‘alu atu.

¹⁴‘Oua na‘a ke tuku noa pē ‘a e mafai ‘oku ‘iate koe, ‘a ia na‘e foaki kiate koe ‘i he palofisai mo e hilifaki nima ‘e he kau Faifekau.

¹⁵Ke ke mamafa ki he ngaahi me‘a ko ia; ke ke ngāue ki he ngaahi me‘a ko ia; koe‘uhi ke hā ki he kakai kotoa ho‘o laka ki mu‘a.

¹⁶Lamalama kiate koe mo e me‘a ‘oku ke ako‘aki: ke ke nofo‘aki fai ‘a e ongo me‘a ko ia; he ‘i ho‘o fai pehē, te ke fakamo‘ui koe mo kinautolu foki ‘oku fanongo kiate koe.