Read KO E TOH TAPU KATOA TONGA Tīmoté 1 5 Bible Online

Tīmoté 1 5 - KO E TOH TAPU KATOA TONGA bible

Tīmoté 1 5

¹‘OUA na‘a ha‘aki valoki‘i ha motu‘a, ka ke fai fakaoleole pē ‘o hangē ko ho‘o tamai; fai ki he kau talavou ‘o hangē ko ho tokoua.

²Ki he kau fine‘eiki ‘o hangē ko ho‘o fa‘ē; ki he kau finemui ‘o hangē ko ho tuofefine, ‘o mātu‘aki anga ma‘a.

³Tokanga‘i ‘a e kau fefine uitou ‘oku paea mo‘oni.

⁴Ka ‘o kapau ‘oku ma‘u fānau pe makapuna ‘e si‘i uitou, ‘oua mu‘a ke ako‘i kinautolu ke nau fai ‘a e tō‘onga totonu ki hoto fāmili, pea ke fai ‘a e totongi ki he‘enau mātu‘a: he ko e me‘a ia ‘e hāngai fofonga ki ai ‘a e ‘Otua.

⁵Pea ko eni, ko e uitou ‘oku paea mo‘oni pea tuku tuēnoa, kuo tu‘u ‘ene ‘amanaki ki he ‘Otua, pea ‘oku ne nofo ki he fai ‘o e ngaahi hū mo e lotu ‘i he pō mo e ‘aho.

⁶Ka ko e uitou ‘oku fakausousa, neongo ko e mo‘ui ka kuo mate.

⁷Ko e ngaahi me‘a ko ia foki ke ke tu‘utu‘uni ki ai koe‘uhi ke nau ta‘emele.

⁸Ka ‘oka ai ha taha ‘oku ‘ikai tokanga ki hono kāinga, kae‘uma‘ā hono fāmili, ‘oku ne faka‘ikai‘i ‘ene lotu, ‘io, ‘oku ne kovi ange ‘i ha hīteni.

⁹Ke ‘oua na‘a tu‘u ha taha ‘i he tohi ‘o e Kau Uitou, ‘oku si‘i hono ta‘u ‘i he onongofulu, ko e uaifi ‘o e tangata pē taha.[8]

¹⁰Ko e toko taha kuo fakaongolelei he‘ene ngaahi ngāue ‘aonga, ha‘ane tauhi ha fānau, ha‘ane fakaafe ha ‘āunofo, ha‘ane fufulu ‘a e va‘e ‘o e kau lotu, ha‘ane tokoni‘i ha kakai kuo mo‘ua ha mamahi, kapau na‘e ‘ilonga pē ha ngāue lelei pea ne feinga ki ai.

¹¹Ka ko e kau uitou ‘oku mālōlō ke ke fakafisi ki ai; he ka faifai pea mālohi ‘enau hoha‘a ‘ia Kalaisi, te nau tangi ke mali:

¹²‘o nau nofo mo kinautolu ‘enau hala, ‘a ‘eni, Kuo nau maumau ‘enau fuakava mu‘a.

¹³Kae‘uma‘ā te nau hoko ai ‘o fakapikopiko ‘i he‘enau ‘alu fano ‘i he ngaahi ‘api; ‘o ‘ikai ko e fakapikopiko pē, ka ko e fa‘a lau, mo kaunoa, ‘o talanoa ‘aki ‘a e ngaahi me‘a na‘e totonu ke ‘oua ‘e lau.

¹⁴Ko ia, ko hoku loto ki he kau uitou ‘oku mālōlō, ke nau toe mali, ke nau fanau, ke nau pule he fāmili, ‘o ‘oua ‘e ‘atu mo‘o e fili ha me‘a ke tu‘unganaki ‘aki ‘ene lau‘ikovi.

¹⁵He na‘a mo ‘eni kuo afe hanau ni‘ihi, ‘o muimui kia Sētane.

¹⁶Kapau ko ha kau uitou ‘oku kāinga mo ha fefine lotu, ke tokoni kiate kinautolu ‘e ia, ‘o ‘oua ‘e tuku ke mafasia ai ‘a e Siasi: kae ‘i he Siasi ke tokoni ki he kau uitou ‘oku paea mo‘oni.

¹⁷Ko e kau faifekau ‘oku pule lelei, ‘ē, ko honau taau ha tokoni lōua; kae‘uma‘ā ‘a kinautolu ‘oku fakafitefita‘a ‘i he malanga mo e faiako.

¹⁸He ‘oku lau ‘e he Tohitapu, Ko e pulu ‘oku ne ‘au‘au ‘a e koane ‘e ‘ikai te ke ha‘iha‘i hono ngutu. Mo eni, ‘Ilonga ha taha ‘oku ngāue, ‘oku taau ke ne ma‘u ha‘ane totongi.

¹⁹‘Oua te ke tali ha faka‘ilo ‘o ha faifekau, ka ‘i he ‘i ai ha fakamo‘oni ‘e toko ua pe toko tolu:

²⁰ka ko kinautolu ‘oku faihala ke ke valoki ‘i he ‘ao ‘o e kakai kotoa, koe‘uhi ke manavahē hono toe.

²¹Ko e ‘Otua ē, mo Kalaisi Sīsū, pea mo e kau ‘Āngelo Fili, ‘oku ou na‘ina‘i atu ke ke tauhi ‘a e ngaahi me‘a ni, ‘o ‘oua ‘e fua fakapapau ha me‘a, pe fai ‘i he filifilimānako.

²²‘Oua te ke hilifaki nima leva ki ha toko taha, ‘uma‘ā ha‘o kau ‘i he ngaahi angahala ‘a e kakai kehe: kehe ke ke tauhi KOE ke ma‘a.

²³Tuku ho‘o inu pē ‘a e vai, ka ke fai‘aki ha me‘i uaine, koe‘uhi ko ho fatu mo ho‘o fa‘a mahamahaki.

²⁴‘Oku fu‘u e‘a ‘a e angahala ‘a e kakai ni‘ihi, ‘o mu‘a ki he fakamaau, kae kimui ‘a e angahala ‘a e ni‘ihi.

²⁵Pehē foki ‘oku fu‘u e‘a ‘enau ngaahi ngāue lelei; pea ko e ngaahi ngāue ‘oku ‘ikai pehē, tala‘ehai ‘e lava ke fufū.