Read KO E TOH TAPU KATOA TONGA Tīmoté 1 6 Bible Online

Tīmoté 1 6 - KO E TOH TAPU KATOA TONGA bible

Tīmoté 1 6

¹‘ILONGA kinautolu ‘oku mo‘ulaloa ‘o pōpula, ke nau lau ‘oku taau ke nau faka‘apa‘apa ‘aupito ki he‘enau ngaahi ‘eiki, na‘a lau‘ikovi ‘a e huafa ‘o e ‘Otua, mo ‘ene akonaki.

²Pea ko kinautolu ‘oku lotu ‘enau ngaahi ‘eiki, ke ‘oua te nau fakataau koe‘uhi kuo nau kāinga; kaekehe, ke ‘āsili ‘enau tauhi kiate kinautolu, koe‘uhi ko e kakai lotu mo ‘ofeina ia ‘a ia ‘oku ‘aonga ki ai ‘enau ngāue ‘ofa. Ko e ngaahi me‘a ko ia ke ke ako‘aki mo enginaki.

³Kapau ‘e nofo ha taha ke ako kehe, ‘o ‘ikai te ne hiki ki he lea ‘oku haohaoa, ‘io, ki he ngaahi folofola ‘a hotau ‘Eiki ko Sīsū Kalaisi, mo e akonaki ‘oku fakalotumo‘oni.

⁴‘Ā, ko e toko taha ia kuo ‘ao‘aofia hono loto ‘i he ‘afungi, ka tala‘ehai ‘oku ne ‘ilo ha me‘a; ka ‘oku ne mahaki ‘aki ‘a e ‘eke me‘a ta‘efa‘a ‘iloa, mo e fakakikihi‘i lea pē; ‘a ia ko e ngaahi me‘a ‘oku tupu mei ai ‘a e meheka, ‘a e fetu‘usi, ‘a e felau‘ikovi‘aki,

⁵‘a e femahalokovi‘aki, ‘a e fepaki ai pē ‘a e kakai kuo popo honau loto, kuo to‘o meiate kinautolu ‘a e ‘ilo totonu, ‘a e kakai ‘oku nau mahalo ko e lotu mo‘oni ko e me‘a fakatupu koloa pē.

⁶Ka ‘oku mo‘oni ko e me‘a fakakoloa ‘aupito ‘a e lotu mo‘oni, ‘oka ō mo e loto topono.

⁷He tala‘ehai na‘a tau ha‘u mo kitautolu ha me‘a ki māmani, koe‘uhi foki ‘e ‘ikai te tau lava ke ‘alu mo kitautolu ha momo‘i me‘a:

⁸pea ‘i he‘etau ma‘u ‘etau me‘akai mo e kofu, te tau fe‘unga pē ‘i he me‘a ko ia.

⁹Ka ko kinautolu kuo pau honau loto ke koloa‘ia, ‘oku nau tō ki he ‘ahi‘ahi, mo e tauhele, mo e ngaahi holi kehekehe, ‘a ia ‘oku fakasesele pea ko e me‘a ‘oku te lavea ai; ko e fa‘ahinga me‘a ‘oku nau lōmekina ‘a e kakai ki he ‘auha mo e mala‘ia.

¹⁰He ko e ‘ofa ki he pa‘anga ko e aka ‘oku tupu mei ai ‘a e ngaahi kovi kotoa pē, pea ko e ni‘ihi ‘i he‘enau ala ki he me‘a ko ia kuo nau hē mei he lotu, pea kuo nau hokohoka‘i ‘aki ‘a kinautolu ‘a e ngaahi mamahi lahi.

¹¹Ka ko koe, tangata ‘o e ‘Otua, hola mei he ngaahi me‘a pehē; ka ke tuli ki he faitotonu, ki he lotu mo‘oni, ki he tui, ki he ‘ofa, ki he kātaki, ki he anga vaivai.

¹²Tau ‘a e tau lelei ‘o e tui, puke ki he mo‘ui ta‘engata, ‘a ia ne ui koe ki ai, pea na‘a ke fai ‘a e tukupā lelei ‘i he ‘ao ‘o ha kau fakamo‘oni tokolahi.

¹³Ko e ‘Otua ē, ‘a ia ‘oku ne tauhi ‘a e mo‘ui ‘a e me‘a kotoa pē, mo Kalaisi Sīsū, ‘a ia na‘a ne fakamo‘oni ki he‘ene tukapā lelei ‘i he pule ‘a Ponitō Pailato.

¹⁴‘Oku ou na‘ina‘i atu ke ke tauhi ‘a e fekau ke ta‘emele mo ta‘efa‘a lau‘i, ‘o a‘u ki he fakahā mai ‘o hotau ‘Eiki ko Sīsū Kalaisi.

¹⁵‘A ia te ne fai ‘i hono ngaahi taimi totonu, ‘e he ‘Ene ‘Afio ko e Pule Mohu Monū‘ia mo Tāfataha; ko e Tu‘i ‘o kinautolu ‘oku tu‘i, mo e ‘Eiki ‘o kinautolu ‘oku ‘eiki.

¹⁶‘A ia ‘oku ‘a‘ana toko taha pē ‘a e ta‘efa‘amate, he‘ene ‘afio ‘i he maama ta‘efa‘a fotuaki; ‘a ia kuo te‘eki ke mātā ‘e ha tangata, pe te ne lava ke sio ki ai — ke ‘o ‘Ene ‘Afio ‘a e faka‘apa‘apa, pea mo e pule ta‘engata, ‘Ēmeni.

¹⁷Ke ke na‘ina‘i kiate kinautolu ‘oku koloa‘ia fakaemaama ko eni, ke ‘oua te nau anga hiki, ‘uma‘ā ke tu‘u ‘enau falala ki he koto ta‘ema‘u na ko e koloa; ka ki he ‘Otua, ‘a ia ‘oku ne ‘omi ‘a e me‘a kehekehe ‘o fu‘u lahi, ma‘atau fiemālie pē.

¹⁸Na‘ina‘i ke nau ngāue ‘aonga, ke nau koloa‘ia ‘i he ngāue lelei, ke nau nima homo ‘o anga fietokoni;

¹⁹‘o nau fa‘oaki ai ma‘anautolu ha tu‘unga lelei ki he ‘amui, koe‘uhi ke nau puke ki he mo‘ui mo‘oni.

²⁰‘E Tīmote, ke ke le‘ohi ‘a e me‘a kuo tuku kiate koe, ‘o ke fulitu‘a ki he ngaahi koto lau fakaetangata pē, mo e ngaahi fakakikihi ‘a e me‘a na ‘oku lau ko e ‘Ilo-loloto, ka ko e lau hala:

²¹‘a ia kuo ‘i ai ha ni‘ihi kuo nofo ki ai, ‘o nau le‘eia mei he tui totonu. ‘Ofa ke ‘iate kimoutolu ‘a e kelesi.