Read KO E TOH TAPU KATOA TONGA Tīmoté 2 2 Bible Online

Tīmoté 2 2 - KO E TOH TAPU KATOA TONGA bible

Tīmoté 2 2

¹KA ko koe, nga‘ata, ke ke hoko ‘o kaukaua ‘i he kelesi ‘oku ‘ia Kalaisi Sīsū.

²Pea ko e ngaahi me‘a na‘a ke fanongo meiate au ‘i he ‘ao ‘o e kau fakamo‘oni tokolahi, ke ke tuku ia ki ha kau tangata ala falala‘anga ke tauhi, ko ha ni‘ihi te nau mafai ke ako‘aki ki ha kakai kehe foki.

³Kai pē ho ‘inasi ‘i he mamahi, ‘o taau mo e sōtia lelei ‘a Kalaisi Sīsū.

⁴Ka ko ha sōtia ‘oku mo‘ua ‘i he tau, tala‘ehai te ne tuku ke ne fihia ‘i he ngaahi mo‘ua ‘o e mo‘ui ni, koe‘uhi ke hōhō‘ia ‘iate ia ‘a e ‘eiki na‘e fokotu‘u ia ki he tau.

⁵Kae‘uma‘ā, ka ko ha taha ‘oku kau ‘i ha fe‘auhi, tala‘ehai ‘oku fakapale‘i ia ‘o kapau ‘oku ‘ikai te ne fai ‘o hangē ko e lao.

⁶Ka ko hā kau fa‘a, ko ia pē ‘oku fakaongosia ‘oku ‘a‘ana ke motu‘a ‘inasi ‘i he fua ‘o e ngoue.

⁷Feinga ke ma‘u ‘a e ‘uhinga ‘o ‘eku lea, koe‘uhi ‘e ‘atu ‘e he ‘Eiki ‘a e poto ‘i he me‘a kotoa pē.

⁸Manatu ai pē kia Sīsū Kalaisi, hono fokotu‘u mei he pekia, ‘ene tupu mei he hako ‘o Tēvita — ‘o hangē ko ‘eku kōsipeli,

⁹‘a ia ‘oku ngaohikovia au ‘i hono fai, ‘io, ‘o a‘u ki hoto ha‘isia ‘o hangē ko ha angahala; ka tala‘ehai ‘oku ha‘isia ‘a e folofola ‘a e ‘Otua.

¹⁰Ka ko hono ‘uhinga ‘eni ‘o ‘eku kātaki ‘a e me‘a kehekehe ma‘a e kakai fili, koe‘uhi ā ke ta‘imālie fakamo‘ui ‘a kinautolu foki, ‘a e fakamo‘ui ‘oku ‘ia Kalaisi Sīsū, pea ō mo ia ‘a e kolōlia ta‘engata.

¹¹‘Oku mo‘oni pē ‘a e lea, He kapau na‘a tau mate mo ia, te tau mo‘ui mo ia; kapau ‘oku tau kātaki, te tau kaungā tu‘i foki mo ia;

¹²kapau te tau fakafisinga ia, pea ‘e fakafisinga ‘a kitautolu ‘e ia;

¹³kapau ‘oku tau li‘aki ‘etau tui, ka ‘oku ne piki ai pē ‘e ia ki he‘ene lea; he tala‘ehai ‘oku ne lava ke faka‘ikai‘i ‘a ‘Ene ‘Afio.

¹⁴Ko e ngaahi me‘a ni ke ke fakamanatu ki he kakai, ‘o fakamamafa ‘aki ‘a e ‘Eiki, ke ‘oua te nau fakakikihi ‘i ha lea pē, ‘a ia ‘oku ‘ikai hano ‘aonga, ka ki he fakalusa pē ‘o e kakai ‘oku fanongo.

¹⁵Ka ko koe, ke ke feinga ke fakahā koe ki he ‘Otua ‘oku ke tu‘u mo e lau; ko e tangata ngāue ‘oku ‘ikai mā, ko ho‘o tofa totonu ‘a e folofola ‘o e mo‘oni.

¹⁶Ka ke faka‘ehi‘ehi mei he ngaahi koto lau fakaetangata; he ko e kakai ko ia, ‘e fakautuutu ‘enau makehe mo e lotu:

¹⁷pea ko ‘enau lea, te ne keina ‘o hangē ha kainiloto. ‘Oku ‘i he fa‘ahinga ko ia ‘a ‘Aiminia mo Failito;

¹⁸ko e ongo me‘a ne le‘eia mei he mo‘oni, he‘ena pehē, ko e me‘a ki he toetu‘u kuo hoko ia: pea ‘oku nau fakahinga ai ‘a e lotu ‘a e ni‘ihi.

¹⁹Ka neongo ia, ka ‘oku tu‘u pē ‘a e tu‘unga ma‘uma‘uluta ‘a e ‘Otua, he pulusi ai ‘a e sila ko eni, ‘Oku ‘ilo ‘e he ‘Eiki ‘a kinautolu ‘oku ‘o‘ona: mo eni, ‘Ilonga ‘a ia ‘oku ne hu‘ekina ‘a e huafa ‘o e ‘Eiki, ke ne faka‘ehi‘ehi mei he faihala.

²⁰Ka ‘ilonga ha fale lahi, ‘oku ‘ikai ke ngata ‘i he ngaahi ipu koula mo siliva, ka ‘oku ‘i ai foki mo e ngaahi ipu ‘akau mo ‘umea, pea ko e ni‘ihi ke kinokinoifie, ka ko e ni‘ihi ke palakū.

²¹Pea ka ai ha taha te ne fakama‘a ia ke matanga mei he fa‘ahinga ko ia, te ne hoko ko e ipu ke kinokinoifie, ko e ipu kuo fakatāpui, ko e ipu ‘oku ‘aonga ki he Tangata‘eiki, kuo teu ki he ngāue lelei kotoa pē.

²²Ka ko e ngaahi holi fakatalavou ke ke hola mei ai; ka ke tuli ki he mā‘oni‘oni, ki he tui, ki he ‘ofa, pea ki he fe‘ofo‘ofani mo e kakai ‘oku lotu ki he ‘Eiki mei he loto ma‘a.

²³Ka ko e fa‘a ‘eke me‘a, ‘a ia ko e koto launoa pea ‘ikai ha poto ‘i ai, ke ke fakafisi ki ai, ko ho‘o ‘ilo ‘oku tupunga fakakikihi.

²⁴Ka ko e tamaio‘eiki ‘a e ‘Eiki ‘oku ‘ikai taau ke ne fakakikihi, kaekehe ke ne angalelei ki he kakai kotoa pē, ke ne poto ‘i he faiako, ke ne makātaki ‘a e kovi:

²⁵ke ne fai anga malū ‘ene tautea ‘a kinautolu ‘oku fakatau‘ilea, hei‘ilo ‘e faifai pea ‘ange ‘e he ‘Eiki ‘a e fakatomala ke nau tafoki ki he ‘ilo‘i totonu ‘o e mo‘oni;

²⁶pea ke nau ‘ā mei he‘enau konā ke fai hono finangalo, ‘o hao mei he tauhele ‘a e tēvolo, ‘a ia kuo ne pō kinautolu.