Read KO E TOH TAPU KATOA TONGA Tīmoté 2 3 Bible Online

Tīmoté 2 3 - KO E TOH TAPU KATOA TONGA bible

Tīmoté 2 3

¹KA ko eni ‘a e me‘a ke ke sinaki ‘ilo ki ai; ka hokosia ‘a e kuonga fakamui, ‘e ai ha ngaahi taimi faingata‘a.

²He ko hono kakai te nau ‘ofa kiate kinautolu pē, te nau ‘ofa ki he pa‘anga, te nau fielahi, te nau anga ta‘etoka‘i, te nau lea fie‘otua, te nau talangata‘a ki he mātu‘a; ko e kau ta‘ehounga, ko e kau anga ta‘emolumalu,

³ko e kau ta‘e-‘ofa-ki-ho‘ota, ko e kau ta‘efakamolemole, ko e kau fakakovi, ko e kau ta‘efakama‘uma‘u, ko e kau anga fakamanu, ko e kau ta‘e‘ofa ki he lelei,

⁴ko e kau lavaki, ko e kau ‘ohonoa, ko e kau loto ‘ao‘aofia ‘i he ‘afungi, ko e kau ‘ofa ki he mālie ‘o ‘ikai ‘ofa ki he ‘Otua,

⁵ko e kakai ‘oku ma‘u ‘a e nge‘esi ‘o e lotu, ka kuo nau li‘aki hono kakano: ke ke fulitu‘a ki he kakai pehē foki.

⁶He ‘oku ‘i he fa‘ahinga ko ia ‘a e kakai ‘oku totolo ki he ngaahi fale, pea taki pōpula ha longolonga‘i fefine kuo mafasia ‘i he ngaahi angahala, pea ‘oku tākiekina ‘e he ngaahi holi;

⁷‘o nau ako ai pē, ka tala‘ehai ‘oku nau lava ke a‘usia ‘a e ‘ilo‘i totonu ‘o e mo‘oni.

⁸Pea hangē ko e tu‘u ‘a Siani mo Siamepi kia Mōsese, ‘oku pehē foki mo e tu‘u ‘a e fa‘ahinga ni ki he mo‘oni: ko e kakai kuo popo honau loto, pea ‘i he lau ki he lotu ‘oku ‘ikai ha‘anau momo‘i sia‘a.

⁹Ka tala‘ehai te nau faka‘a‘au atu: he ko ‘enau vale, ‘e faifai pea mātu‘aki e‘a ki he kakai kotoa, ‘o hangē tofu pē ko e vale ‘anaua.

¹⁰Ka ko koe, na‘a ke ma‘u mo‘ao fa‘ifa‘itaki‘anga ‘a e faiako ‘a‘aku, ‘a ‘eku tō‘onga, ‘a ‘eku tu‘utu‘uni pau, ‘a ‘eku tui, ‘a ‘eku anga mokomoko, ‘a ‘eku ‘ofa, ‘a ‘eku kātaki;

¹¹‘a hoku fa‘a fakatanga‘i, ‘a e ngaahi fu‘u mamahi na‘e tō kiate au ‘i ‘Aniteoke mo ‘Aikoniume mo Līsita, ‘a e ngaahi fu‘u fakatanga ko ia na‘a ku mo‘ua ai: ka na‘e hamusi au mei ai kotoa ‘e he ‘Eiki.

¹²‘Io, pea ko kinautolu kotoa pē ‘oku loto ke lotu mo‘oni ‘ia Kalaisi Sīsū ‘e fakatanga‘i kinautolu foki.

¹³Ka ko e kakai kovi mo fakahekeheke te nau faka‘a‘au atu mei he kovi ki he kovi, he‘enau kākaa‘i ‘a e kakai kehe, pea kākaa‘i mo kinautolu.

¹⁴Ka ko koe, ke ke nofo ‘i he ngaahi me‘a na‘a ke ako ai, ‘a ia na‘e fakamahino atu, ko ho‘o ‘ilo ki he anga ‘o e kakai na‘a ke ako mei ai.

¹⁵Pea mo e talu ho‘o valevale kuo ke maheni mo e Tohitapu, ‘a ia ‘oku ne mafai ke fakapoto koe ke ma‘u ‘a e fakamo‘ui ‘i he tui ‘oku ‘ia Kalaisi Sīsū.

¹⁶Ko e potu Folofola kotoa pē ne fakamānava mei he ‘Otua, ‘oku ‘aonga[2] foki ki he akonaki, ki he faka‘ilo hala, ki he fakatonutonu, ki he ngaohia ke mā‘oni‘oni:

¹⁷koe‘uhi ā ke tu‘u kakato ‘a e tangata faka‘otua, kuo ‘osi sāuni ki he ngāue lelei fuli pē.