Read KO E TOH TAPU KATOA TONGA Tīmoté 2 4 Bible Online

Tīmoté 2 4 - KO E TOH TAPU KATOA TONGA bible

Tīmoté 2 4

¹KO E ‘Otua ē, mo Kalaisi Sīsū, ‘a ia ‘oku ne ene ke fakamaau ‘a e mo‘ui mo e pekia — ‘io, ‘oku ou na‘ina‘i ‘aki foki ‘ene hā mai, pea ‘aki hono pule‘anga —

²ke ke malanga‘aki ‘a e folofola, fa‘a fai pē ‘i he faingamālie mo e ‘ikai ha faingamālie, faka‘ilo hala, valoki, enginaki ‘i he anga kātaki ‘aupito, pea ‘aki ‘a e fa‘ahinga ako kehekehe.

³Koe‘uhi ‘e faifai pea hoko ha kuonga, ‘a ia ‘e ‘ikai te nau kātaki ai ‘a e tokāteline haohaoa; ka te nau fokotu‘uniu hanau kau akonaki, ‘o fakatatau ki he ngaahi holi ‘anautolu, he veli honau telinga:

⁴pea te nau le‘ei honau telinga mei he mo‘oni, ka nau tafoki ki he ngaahi talatupu‘a.

⁵Ka ko koe, ke ke faka‘ehi‘ehi mei he konā ‘i he me‘a kotoa pē; kātaki e ngaohikovia, fai ‘a e ngāue faka‘evangeliō, fai hono kotoa ‘o ho lakanga.

⁶He ko e me‘a kia au kuo kamata lilingi hoku toto ko e kava ‘o e feilaulau; pea ‘oku tu‘unuku mai ‘a e taimi ‘o ‘eku hiki.

⁷Kuo u tau ‘a e tau lelei, kuo u lava‘i ‘a e fakapuepue, kuo u tauhi mai ‘a e tui totonu.[3]

⁸Hili ‘eni kuo tuku tauhi ma‘aku ‘a e pale ‘o e mā‘oni‘oni, ‘a ia ‘e toki ‘omi kiate au ‘i he ‘aho ko ē ‘e he ‘Eiki ko e Fakamaau totonu; ‘o ‘ikai kiate au pē, ka kiate kinautolu kotoa pē foki kuo ‘ofa ki ha‘ane hā mai.

⁹Ke ke feinga ke ha‘u vave kiate au:

¹⁰he kuo li‘aki au ‘e Tīmasi, he‘ene ‘ofa ki he maama ko eni; pea kuo ne ‘alu ia ki Tesalonaika, mo Kilisiki ki Kalētia, mo Taitusi ki Talamati.

¹¹Ko Luke pē toko taha ‘oku ‘iate au. Fakaheka ‘a Ma‘ake ‘o mo omi mo koe: he ‘oku ne ‘aonga kiate au ke tokoni ‘i he Ngāue.

¹²Ka ko Tikiko, na‘a ku fekau ia ki ‘Efesō.

¹³Ke ke ha‘u mo koe ‘a e pulupulu na‘a ku tuku ‘ia Ka‘apo ‘i Taloasi; pea mo e ngaahi tohi, kae‘uma‘ā ‘a e ngaahi tohi kili‘i manu.

¹⁴Ko ‘Ālekisānita, ko e tuki ukamea, na‘e lahi ‘a e kovi na‘a ne fai kiate au: ‘e totongi ‘e he ‘Eiki kiate ia ‘o hangē ko ‘ene ngaahi ngāue.

¹⁵Ke ke vakavakai foki ‘e koe ki he toko taha ko ia, he na‘e lahi ‘ene tau‘i ‘emau ngaahi lea.

¹⁶‘I he‘eku fuofua fakamatala na‘e ‘ikai ha toko taha ‘e poupou au, ka ka li‘aki au ‘e kinautolu kotoa pē: ‘ofa ke ‘oua na‘a lau ia kiate kinautolu.

¹⁷Ka ko e ‘Eiki, na‘a ne ofi mai, mo ne fakamālohi‘i hoku loto, koe‘uhi ke kakato ‘iate au ‘a e tala ‘o e Kōsipeli, pea fanongo ki ai ‘a e Senitaile kātoa: pea na‘e hamusi au mei he ngutu ‘o e laione.

¹⁸‘Io, ‘e hamusi au ‘e he ‘Eiki mei he ngāue kovi kotoa pē, pea te ne fakamo‘ui au, ‘o a‘u ki he‘ene fakahū au ki hono pule‘anga fakalangi — ke ‘o ‘Ene ‘Afio ‘a e kolōlia ‘o lauikuonga pea ta‘engata. ‘Ēmeni.

¹⁹Tala hoku ofa kia Pisa[4] mo ‘Akuila, pea mo e fāmili ‘o ‘Onesifolo.

²⁰Ko ‘Elasito, na‘a ne nofo ‘i Kolinitō; ka na‘a ku tuku ‘a Talofima ‘i Mileto ‘oku mahaki.

²¹Feinga pē ke ke ha‘u ‘i he te‘eki ke hoko ‘a e momoko. ‘Oku ‘ofa atu ‘a ‘Iupulo, mo Piutena, mo Laino, mo Kalōtia, pea mo e kāinga kotoa pē.

²²‘Ofa ke ‘i ho laumālie ‘a e ‘Eiki. ‘Ofa ke ‘iate kimoutolu ‘a e kelesi.