Read KO E TOH TAPU KATOA TONGA Taitusí 2 Bible Online

Taitusí 2 - KO E TOH TAPU KATOA TONGA bible

Taitusí 2

¹KA ko koe, ke ke lea‘aki ‘a e ngaahi me‘a ‘oku taau mo e akonaki haohaoa.

²‘O pehē, ko e me‘a ki he mātu‘a tangata ke nau faka‘ehi‘ehi mei he konā, ke nau anga maopo, ke nau anga fakama‘uma‘u, ke mo‘ui lelei ‘enau tui, ‘enau ‘ofa, ‘enau kātaki.

³Ke pehē foki mo e kau finemātutu‘a; ke ngali mā‘oni‘oni ‘enau anga, ‘o ‘oua ko e kau fakakovi, ‘uma‘ā ko ha ni‘ihi ‘oku pōpula ki he inu kava lahi;

⁴ka ko e ako‘anga me‘a lelei, koe‘uhi ke nau kiee‘i ‘a e kau fefine ‘oku mālōlō ke nau ‘ofa ki honau ngaahi husepāniti, pea ‘ofa ki he‘enau fānau.

⁵Ke nau anga fakapotopoto, ke nau angama‘a, ke nau ngāue ‘i ‘api, ke nau angalelei, ke nau anganofo ki honau ngaahi husepāniti na‘a lau‘ikovi ‘a e folofola ‘a e ‘Otua.

⁶Pehē foki ke ke enginaki ‘a e kau talavou ke nau anga fakama‘uma‘u.

⁷Pea ‘i he me‘a kotoa pē ke ke hā koe ko e fa‘ifa‘itakinga ngāue lelei: ‘i ho‘o akonaki ke ke hā ‘oku ke ta‘epopo mo anga maopo, pea haohaoa ho‘o lea, ‘o ‘ikai ala lau‘i;

⁸koe‘uhi ke mā ‘a ia ‘oku ‘i he fa‘ahi ‘e taha, ko e ‘ikai ha‘ane me‘a ke lau kiate kitautolu ‘oku kovi.

⁹Ke ke enginaki ke anganofo ‘a e kau tamaio‘eiki ki he ngaahi ‘eiki ‘anautolu, ‘o fai ke nau hōhō‘ia ‘i he me‘a kotoa pē, ‘o ‘oua ‘e fakatau‘itala;

¹⁰‘o ‘oua ‘e to‘oto‘onoa: ka nau mātu‘aki fai‘aki ‘a e lototō mo‘oni; koe‘uhi ke teunga‘ia ‘iate kinautolu ‘i he me‘a kotoa pē ‘a e tokāteline ‘a hotau ‘Otua Fakamo‘ui.

¹¹He kuo fakahā mai ‘a e kelesi ‘a e ‘Otua, ‘a e kelesi ‘oku ‘omi fakamo‘ui ki he kakai kotoa pē,

¹²‘oku ne ngaohia kitautolu ke tau fakafisi ki he faka‘otuamate, mo e ngaahi holi fakaemāmani; ka tau mo‘ui anga fakama‘uma‘u mo angatonu mo anga fakalotu ‘i he maama ko eni:

¹³he‘etau nofo‘aki tali ki he ‘amanaki mohu monū‘ia, ‘io, ko e fakahā mai ‘o e lāngilangi‘ia ‘o Sīsū Kalaisi, ko e ‘Otua Lahi pea ko hotau Fakamo‘ui.[2]

¹⁴‘A ia na‘a ne foaki ia ‘e ia koe‘uhi ko kitautolu; koe‘uhi ke ne huhu‘i kitautolu mei he maumau lao kotoa; pea fakama‘a ma‘ana hano kakai tonu ‘o‘ona, ha kakai ‘oku mamahi‘i ‘a e ngaahi ngāue lelei.

¹⁵Ko e ngaahi me‘a ni ke ke lea‘aki mo enginaki mo valoki ‘aki, ‘o fai fakapule ai pē. ‘Oua na‘a tuku ke ta‘etoka‘i koe ‘e ha taha.