Read KO E TOH TAPU KATOA TONGA Taitusí 3 Bible Online

Taitusí 3 - KO E TOH TAPU KATOA TONGA bible

Taitusí 3

¹FAKAMANATU kiate kinautolu ke nau anganofo ki he ngaahi pule mā‘olunga, mo e ngaahi tu‘unga; ke nofo talangofua pē; ke nofo teu ki he ngāue lelei kotoa pē:

²ke ‘oua te nau lau‘ikovi ha taha: ke ‘oua na‘a ko e kau veipā, ka ko e kau faka‘atu‘i pē, ‘o mātu‘aki fai‘aki ‘a e anga kātaki ki he kakai kotoa pē.

³He ko kitautolu foki ‘i mu‘a, ko e kau ta‘eloto, talangata‘a, mo ‘alu hē; ‘o tau nofo pōpula ki he ngaahi holi mo e ngaahi mālie kehekehe; ‘o tau mo‘ui‘aki ‘a e fakama‘ito‘a, mo e meheka, ko e fehi‘anekina kitautolu pea tau fetāufehi‘a‘aki.

⁴Ka ‘i he faifai pea fakahā mai ‘a e angalelei ‘a hotau ‘Otua Fakamo‘ui, mo ‘ene ‘ofa ki he tangata,

⁵na‘e ‘ikai tupu ‘ene fakamo‘ui kitautolu mei ha ngaahi ngāue na‘a tau fai ‘i ha‘atau mā‘oni‘oni, ka ko e me‘a pē ‘i he‘ene ‘alo‘ofa na‘a ne fakamo‘ui kitautolu, ‘i he pālutu‘anga ‘o e fanau‘i fo‘ou, pea mo e fakafo‘ou ‘e he Laumālie Mā‘oni‘oni:

⁶‘a ia na‘a ne lilingi mai ‘o lahi kiate kitautolu ‘ia Sīsū Kalaisi ko hotau Fakamo‘ui;

⁷koe‘uhi ke fakatonuhia kitautolu ‘i he kelesi ‘a ‘Ene ‘Afio, ‘o tau hoko ai ko e ngaahi ‘ea ki he mo‘ui ta‘engata, kae ‘amanaki pē.

⁸‘Oku mo‘oni ‘a e lea ko ia, pea ko hoku loto ke ke fu‘u fakapapau ki he ngaahi me‘a pehē, koe‘uhi ke ‘ilonga kinautolu kuo tui ki he ‘Otua, ke nau tokanga ke nofo ki he ngaahi ngāue lelei. Ko e ngaahi me‘a pehē ‘oku lelei mo ‘aonga ki he kakai.

⁹Ka ko e ‘eke me‘a launoa, mo e ngaahi lau hokohoko, mo e ngaahi fetu‘usi, mo e ngaahi fakakikihi ‘i he Lao, ke ke faka‘ehi‘ehi mei ai, he ko e ngaahi me‘a ta‘e‘aonga ia mo ikunoa.

¹⁰Ko e tangata ‘oku fakatupu mavahevahe, ke ke tākitala‘i tu‘o taha, tu‘o ua, pea ke toki mavahe mei ai;

¹¹‘i ho‘o ‘ilo, ko e toko taha pehē kuo fulikivanu, pea ‘oku ne ‘ū angahala pē, neongo ‘oku tala ‘e hono loto ‘oku ne halaia.

¹²Ka u ka fekau atu ‘a ‘Ātema, pe ko Tikiko, ke ke fai feinga ke vave mai kiate au ki Naikopoli: he kuo u tu‘utu‘uni ke fa‘ahita‘u momoko ‘i he potu ko ia.

¹³Ko e me‘a kia Sena ko e tufungalao, mo ‘Āpolosi, ke ke nima mo e va‘e ‘a e tokonaki ‘o ‘ena fononga atu, ke ‘oua te na masiva ‘i ha me‘a.

¹⁴Kae‘uma‘ā ke ako ‘a e kakai ‘otautolu ‘i he fai ‘o e ngaahi ngāue lelei, he‘enau tokoni ki hona tokonaki, telia na‘a nau ta‘eha fua.

¹⁵‘Oku ‘ofa atu ‘a e kāinga kotoa pē ‘oku ‘iate au. Tala hoku ‘ofa ki he kakai kotoa pē ‘oku ‘ofa kiate kimautolu ‘i he lotu. ‘Ofa ke ‘iate kimoutolu kotoa pē ‘a e kelesi.