Read KO E TOH TAPU KATOA TONGA Filimoné 1 Bible Online

Filimoné 1 - KO E TOH TAPU KATOA TONGA bible

Filimoné 1

¹TŪ ko kimaua — ‘a Paula ko ha nofo pilīsone ‘a Sīsū Kalaisi, pea mo si‘i kāinga ko Tīmote — ko ‘ema tohi kia Filimone ko homa ‘ofa‘anga, mo e kaungā ngāue ‘omaua.

²Pea kia ‘Afia, ko si‘oma sisitā, pea kia ‘Ākipo, ko homa hoa tau, pea ki he siasi ‘oku ‘i ho ‘api.

³‘Ofa ke mou ma‘u kelesi mo e fiemālie mei he ‘Otua ko ‘etau Tamai mo e ‘Eiki ko Sīsū Kalaisi.

⁴‘Oku ou fakafeta‘i ma‘u ai pē ki hoku ‘Otua, ‘o u takua koe ‘i he‘eku ngaahi lotu;

⁵he‘eku fanongo ki ho‘o fai ‘ofa mo e tui ki he ‘Eiki ko Sīsū, pea mo e kau lotu kotoa pē:

⁶koe‘uhi ke ngāue mālohi ho‘o feohi fakalotu, ‘o taka ‘i he ‘ilo kānokano ‘o e me‘a lelei kehekehe ‘oku ‘iate kitautolu, ‘o hu‘u kia Kalaisi.

⁷He kuo lahi ‘eku fiefia mo ‘eku fiemālie ‘i ho‘o ‘ofa, koe‘uhi ‘oku nonga ‘a e loto ‘o e kāinga lotu ‘i ho‘o ngāue, ‘alā.

⁸Ko ia, neongo te u lava noa pē ‘ia Kalaisi ke tu‘utu‘uni ke ke fai ‘a e me‘a ‘oku totonu, ka ‘oku ou fie fai ko e kole pē, ‘o tu‘unga ‘i he ‘ofa.

⁹Pea ‘i hoto anga ko ia, ‘a kita Paula, ko e motu‘a, pea ‘i he taimi ni ko e nofo pilīsone foki ‘a Sīsū Kalaisi,

¹⁰‘oku te kole atu koe‘uhi ko si‘oku foha, ‘a ia kuo u ma‘u ‘i hoku ha‘isia, ‘io, ‘a ‘Onesema:

¹¹‘a ia na‘e ‘ikai ‘aonga kiate koe ‘i mu‘a, ka ‘i he taimi ni ‘oku ‘aonga kiate koe mo au, ‘a ia kuo u fakafoki atu.

¹²Ko e tangata ko ia, ‘a ia ‘oku tatau mo ha kakano ‘o hoku manava —

¹³‘ē, na‘a ku mei loto ke ta‘ofi ia mo‘oku, koe‘uhi ke ne fetongi koe ‘i hoku tauhi, lolotonga ‘oku ou mo‘u ha‘isia koe‘uhi ko e Kōsipeli.

¹⁴Ka na‘e ‘ikai te u fie fai ha me‘a ta‘e te te ma‘u ha‘o poa, na‘a hā ho‘o ‘ofa, ‘o hangē ha fakakoloto, ‘o ‘ikai ko e fai loto lelei.

¹⁵He na‘a ko hono ‘uhinga ia ‘o ho‘omo māvae fo‘i houa pē, koe‘uhi ke ke ma‘u mo‘ou ‘o ta‘engata;

¹⁶‘o ‘ikai kei hangē ko ha pōpula, kae makehe mo ha pōpula, ‘io, ko ha tokoua ‘ofeina — ‘oku ne mātu‘aki pehē kiate au, kae huanoa ha‘ane pehē kiate koe; he ‘oku ‘o‘ou ia ‘i he sino pea ‘i he lotu fakatou‘osi.

¹⁷Ko ia, kapau ‘oku ke lau au ko ho kaume‘a, pea ke tali ‘a e tangata ko ia ‘o hangē ko au.

¹⁸Ka ‘o kapau na‘a ne ngāue ta‘etotonu kiate koe ‘i ha me‘a, pe ‘oku ne mo‘ua, tohi ia kiate au.

¹⁹Ko au Paula, ‘oku ou tohi ‘aki hoku nima ‘o‘oku, te u totongi ia ‘e au (tuku kehe ho mo‘ua kiate au, ‘a ia foki ko ho kotoa).

²⁰‘Io, nga‘ata, taumaiā ke ke ‘aonga foki kiate au ‘i he ‘Eiki: fakafiemālie hoku loto ‘ia Kalaisi.

²¹Kuo u tohi atu ‘i he‘eku falala te ke talangofua mai, he‘eku ‘ilo ‘e hulu atu ho‘o fai ‘i he me‘a kuo u tala.

²²Kae‘uma‘ā foki, ke ke teuteu ha loki mo‘oku; he ‘oku te ‘amanaki ‘e tali ho‘omou ngaahi lotu, pea ‘e tuku atu au kiate kimoutolu.

²³‘Oku ‘ofa atu ‘a ‘Epafasi, ‘a ia ‘oku nofo pilīsone mo au ‘ia Kalaisi Sīsū:

²⁴mo si‘oku kaungā ngāue ko Ma‘ake, mo ‘Alisitako, mo Tīmasi mo Luke.

²⁵Ko e kelesi ‘a hotau ‘Eiki ko Sīsū Kalaisi, ‘ofa ke ‘i homou laumālie ia.