Read KO E TOH TAPU KATOA TONGA Hepelū 1 Bible Online

Hepelū 1 - KO E TOH TAPU KATOA TONGA bible

Hepelū 1

¹NA‘E fakakongokonga mo anga kehekehe ‘a e fai mu‘a ‘e he ‘Otua ‘ene folofola ki he Mātu‘a ‘i he kau Palōfita, ka ‘i he faka‘osi ‘o ono‘aho na‘a ne folofola kiate kitautolu ‘i ha ‘Alo;

²‘a e Toko Taha na‘a ne tu‘utu‘uni ko e ‘ea ‘e ‘o‘ona ‘a e me‘a kotoa pē, ‘a ia foki na‘e fou ai ‘ene ngaohi ‘a e ngaahi ‘univeesi;

³ko e Toko Taha ‘a ia ko e ulo atu ‘o Hono lāngilangi, mo e ‘īmisi ‘o ko ne ‘Afio mo‘oni, mo ne pou pē ‘a e ‘univeesi ‘aki ‘a e folofola ‘a ‘Ene Māfimafi, pea ‘i he hili ‘ene feia ‘a e fakama‘a angahala, na‘a ne nofo hifo mei he to‘omata‘u ‘o ‘Ene ‘Afio ‘i ‘olunga;

⁴kuo ne hoko ‘o fu‘u mā‘olunga ‘i he kau ‘āngelo, ke hoa mo e fu‘u hulu atu ‘o e huafa kuo tō mo‘ona ‘i ho‘onautolu.

⁵He ko hai ‘i he kau ‘āngelo ne folofola ki ai ‘i ha taimi, ‘o pehē, Ko hoku ‘Alo koe, Kuo u fakatupu koe he ‘aho ni? Mo ne toe folofola, Te u nofo au ko ‘ene Tamai, Pea ‘e nofo ia ko hoku Foha.

⁶Kae‘uma‘a, ‘oka ne ka toe ‘omi ‘a e Ta‘okete ki māmani, ‘Oku ne me‘a, Pea ke hū ā kiate ia ‘a e kau ‘āngelo fua pē ‘a e ‘Otua.

⁷Pea ‘i he‘ene lau foki ki he kau ‘āngelo, ‘oku ne me‘a ‘o pehē, ‘A ia ‘oku ne ngaohi ‘ene kau ‘āngelo ko e ngaahi matangi, Pea ko ‘ene kau ngāue ko e ulo‘i afi.

⁸Ka ko ‘ene lau ki he ‘Alo ‘oku pehē, ‘E ‘Otua, ko ho taloni ‘oku ne a‘usia ‘a e kuonga ‘o ‘ītāniti:[1] Pea ko e sēpita ‘a Faitotonu, Ko ha sēpita ia ‘o hono[2] pule‘anga.

⁹Ne ke manako ki he faitotonu, Ka ke fehi‘a ki he maumau lao; Ko ia ko e ‘Otua, ‘io, ko ho ‘Otua Na‘a ne pani ‘aki koe ‘aki ‘a e lolo ‘o e fiefia, ‘O lahi hake ‘i ho ngaahi kaungāme‘a.

¹⁰Mo ‘eni, Ko koe, ‘Eiki, ‘i he kamata‘anga na‘a ke tanu pou ‘a māmani; Pea ko e ngāue ‘a ho nima ‘a e ngaahi langi.

¹¹‘E ‘auha ia; ka ke tu‘u ai pē koe; ‘Io, te nau faka‘au kotoa ke motu‘a ‘o hangē ko ha kofu;

¹²Pea te ke fatufatu ia ‘o hangē ko ha pulupulu; ‘Io, ‘e fetongi ia hangē ha kofu: Ka ka pehē pehē ai pē ‘a e ‘Afiona Pea ko ho ngaahi ta‘u ‘e ‘ikai ngata.

¹³Kae‘uma‘ā ko hai ‘i he kau ‘āngelo kuo ne folofola ai ‘i ha taimi, Nofo koe mei hoku to‘omata‘u, Kae‘oua ke u ngaohi ho ngaahi fili ko ho tu‘ungava‘e.

¹⁴‘Ikai ko e kau laumālie ngāue ‘a kinautolu fua pē, ‘oku kouna atu ke fai ha lakanga, koe‘uhi ko kinautolu te nau hokosi ‘a e fakamo‘ui?