Read KO E TOH TAPU KATOA TONGA Hepelū 10 Bible Online

Hepelū 10 - KO E TOH TAPU KATOA TONGA bible

Hepelū 10

¹HE ko e me‘a ‘i he ma‘u ‘e he Lao ‘a e ‘ata pē ‘o e ngaahi lelei ka hoko, ‘o ‘ikai ko e ‘īmisi totonu ‘o e ngaahi me‘a, ko ia ‘i he fai hokohoko ta‘u ‘aki ‘a e ngaahi feilaulau pē ko ia, ‘a ia ‘oku nau ‘atu ‘o ‘ikai ngata, ‘oku ‘ikai te nau momo‘i lava ke fakahaohaoa ai ‘a e kakai ‘oku ha‘u ki he ‘Otua.

²He ka ne pehē, ‘ikai ‘e tuku hono ‘atu? koe‘uhi ko e ‘ikai ke kei ongo‘i ha angahala ‘e he kakai ‘oku lotu ‘aki ia, ‘o kapau kuo ‘osi ‘a fakama‘a kinautolu.

³Ka ‘i he fai ‘o e ngaahi feilaulau ko ia, ‘oku ‘i ai ha fakamanatu angahala ‘i he ta‘u kotoa pē.

⁴Seuke, he ‘oku ‘ikai malava ke ‘ave angahala ‘e he toto ‘o e fanga pulu mo e fanga kosi.

⁵Ko ia ai, ‘i he hoko ‘a ‘Ene ‘Afio ki māmani, ‘oku ne me‘a, Na‘e ‘ikai te ke tangi ki ha feilaulau pe ha foaki, Ka kuo ke teuteu ha sino mo‘oku:

⁶Ko e ngaahi feilaulau li‘aki, Mo e ngaahi feilaulau he angahala na‘e ‘ikai te ke hōhō‘ia ai.

⁷Pea u toki pehē, Ko eni kuo u ha‘u (‘I he takainga tohi kuo tohi kia au) Ke fai ho‘o tu‘utu‘uni, ‘e ‘Otua.

⁸Na‘a ne pehē ‘anenai, Ko e ngaahi feilaulau, mo e ngaahi foaki, mo e ngaahi feilaulau li‘aki, mo e ngaahi feilaulau he angahala, na‘e ‘ikai te ke tangi ki ai, ‘uma‘ā ha‘o hōhō‘ia ai, ‘a e ngaahi fa‘ahinga me‘a ‘oku ‘atu ‘i he tu‘utu‘uni fakalao.

⁹Ka ‘oku ne pehē ‘eni, Ko eni kuo u ha‘u ke fai ho‘o tu‘utu‘uni. Tā ‘oku ne ‘ave ‘a e ‘uluaki koe‘uhi ke ne fokotu‘u ‘a hono ua.

¹⁰Pea ‘i he tu‘utu‘uni ko ia kuo ‘osi tapui kitautolu, ko e me‘a ‘i he ‘oatu ‘o e sino ‘o Kalaisi ke tātu‘otaha pē.

¹¹Pea ‘ilonga ha taula‘eiki, ‘oku ne tu‘u ‘o hokohoko ‘aho pē he fai ‘ene ngāue, ‘io, he ‘atu tātu‘olahi ‘a e ngaahi feilaulau tatau ai pē, ‘a ia ko e ngaahi feilaulau ‘e ‘ikai si‘i lava ‘i ha taimi ke ‘ave ‘aupito ‘a e angahala.

¹²Ka ko e Toko Taha ni, hili ‘ene ‘atu koe‘uhi ko e angahala ha fo‘i feilaulau tofu pē taha ‘o ta‘engata, na‘a ne nofo hifo mei he to‘omata‘u ‘o e ‘Otua.

¹³Pea tālunga ia mo ‘ene nofo‘aki tali kae‘oua ke ngaohi hono ngaahi fili ko hono tu‘unga va‘e.

¹⁴He ‘i he ‘oatu feilaulau tātu‘otaha ko ia, kuo ne fakahaohaoa ‘o ta‘engata ‘a kinautolu kuo tapui.

¹⁵Kae‘uma‘ā ‘oku fakahā ia kiate kimautolu ‘e he Laumālie Mā‘oni‘oni foki:

¹⁶he hili ‘ene pehē ‘Oku folofola ‘a e ‘Eiki, Ko eni ia ‘a e fuakava te u fai ma‘anautolu hili ‘a e taimi ko ia, Te u ‘ai ‘eku ngaahi lao ki honau loto, pea te u tohi tongi ia ‘i honau ‘atamai; hili ia ‘oku ne toki pehē,

¹⁷Pea ko ‘enau ngaahi angahala, pea mo ‘enau ngaahi maumau lao, ‘e ‘ikai te u toe manatua.

¹⁸Pea ka ai leva ha fakamolemole ‘o e ngaahi me‘a ko ia, pea ‘oku ‘ikai ā ha toe ‘atu feilaulau koe‘uhi ko e angahala.

¹⁹Ko ia, kāinga, ko e me‘a ‘i he‘etau ma‘u ‘a e lotolahi ‘i he ta‘ata‘a ‘o Sīsū, ke hū ki he Potu Toputapu;

²⁰‘i he hala fo‘ou mo mo‘ui ne ne tofa mo‘otautolu, he‘ene ‘asi atu ‘i he tatau, ‘a ia ko hono kakano;

²¹pea ‘i he‘etau ma‘u ha taula‘eiki ‘oku fungani, ‘a ia ‘oku pule ki he ‘api ‘o e ‘Otua;

²²ko ia ke tau ‘unu‘unu atu mo e loto mo‘oni, kuo ma‘uma‘uluta ‘etau tui, kuo luluku hotau loto ‘o fakama‘a mei he konisēnisi kovi, pea kuo pālutu hotau sino ‘i he vai fakama‘a.

²³Ke tau kuku ma‘u, ta‘engaue, ‘a e fai fakahā ‘o ‘etau fakatu‘amelie, (seuke, ko ia na‘a ne tala ‘a e ngaahi palōmesi ko e toko taha ‘oku fai ki he‘ene lea).

²⁴Pea ke tau fetokanga‘aki, ke fefaka‘ai‘ai‘aki ‘a kitautolu ki he fe‘ofa‘aki mo e ngāue lelei:

²⁵‘o ‘oua na‘a tau li‘aki ‘etau ngaahi fakataha, ‘o hangē ko e anga ‘o e ni‘ihi; ka mou feenginaki‘aki, pea ‘āsili he ‘oku mou sio ki he fakaofiofi mai ‘a e ‘aho.

²⁶He kapau ‘oku tau angahala fie angahala hili ‘etau ‘ilo kānokano ki he mo‘oni, ‘oku ‘ikai kei toe ha feilaulau koe‘uhi ko e angahala.

²⁷Ka ‘oku toe pē ‘ete nofo‘aki tali ilifia ki he fakamaau, pea ‘oku toe pē ‘a e fua‘a ‘a ha afi, ‘a ia te ne keina ‘a e kakai ‘oku angatu‘u.

²⁸Ka ta‘etoka‘i ‘e ha taha ‘a e lao ‘a Mōsese, na‘e ‘ikai felave ha ‘ofa; ka ‘oka ai ha fakamo‘oni ‘e toko ua, pe toko tolu, ‘oku ne mate tāmate‘i.

²⁹Mou faka‘uta ki he kovi ange ‘ānoa ‘o e tautea ‘e lau ‘oku tuha mo ia kuo ne mala ‘i he ‘Alo ‘o e ‘Otua, pea kuo ne lau ‘a e ta‘ata‘a fuakava ko e me‘a noa pē, ‘a e ta‘ata‘a ne fakatāpui ai ia, pea kuo ne pā‘usi‘i ‘a e Laumālie ‘oku mei ai ‘ete kelesi!

³⁰He ‘oku tau ‘ilo ‘a e anga ‘o e Toko Taha ko ia ‘oku ne pehē, ‘Oku ‘a‘aku ‘a e sauni, Ko au te u ‘atu hono tuha — Ko e folofola ē ‘a Sihova. Mo ne toe pehē ‘E fakamaau ‘e he ‘Eiki hono kakai.

³¹‘Ē, ko e me‘a fakailifia ke te tō ki he nima ‘o e ‘Otua ‘oku Mo‘ui.

³²Ka mou fakamanatu hake ‘a e ngaahi ‘aho mu‘a, ‘a ia, hili homou fakamaama, na‘a mou fai kītaki pē ‘a e fu‘u fefa‘uhi, ‘a ia ko e koto fakamamahi pē.

³³Ko e me‘a ni‘ihi ‘i he fakatakataka ‘aki kimoutolu he ngaahi manuki mo e fakatanga; pea ko e me‘a ni‘ihi ‘i ho‘omou hoko ‘o kaungāme‘a mo kinautolu na‘e mo‘ui ‘aki ‘a e me‘a ko ia.

³⁴He na‘e ‘ikai ngata pē ‘i ho‘omou kaungā mamahi mo kinautolu na‘e nofo pilīsone; ka na‘a mou tali fiefia foki ‘a e fa‘aoa ‘o ho‘omou nga‘oto‘ota, ko ho‘omou ‘ilo ‘oku ‘i ai ha‘amou koloa ‘oku lelei hake pea tolonga.

³⁵Ko ia, ‘oua te mou li‘aki ho‘omou lotolahi; he ko e me‘a ia ‘oku lahi hono fakakoloa, he ‘oku tuha mo kimoutolu ‘a e kītaki;

³⁶koe‘uhi ke mou fai ke ‘osi ‘a e finangalo ‘o e ‘Otua, ‘o mou lava‘i ‘a e tala‘ofa.

³⁷He ‘oku toe pē ha ki‘i momo‘i taimi, pea ha‘u ‘a Tu‘unukumai; ‘io, ‘e ‘ikai te ne fakatotoka.

³⁸Ka ko e tangata mā‘oni‘oni ‘a‘aku, te ne mo‘ui ‘i he tui: ka ‘o kapau te ne holomui, ‘e ‘ikai hōifua hoku laumālie ‘iate ia.

³⁹Ka ko kitaua ‘oku ‘ikai ko e ha‘a holomui ‘oku tō ki mala, ka ko e ha‘a tui ai pē ke ma‘u mai hota laumālie.