Read KO E TOH TAPU KATOA TONGA Hepelū 11 Bible Online

Hepelū 11 - KO E TOH TAPU KATOA TONGA bible

Hepelū 11

¹PEA ko eni, ko e anga ‘o tui, ‘oku ne fakasino ‘a e ngaahi me‘a ‘oku ‘amanekina, ‘oku ne mafakamo‘oni ‘a e ngaahi me‘a ‘oku ‘ikai hā.

²He vakai, ko eni ia ‘a e me‘a na‘e ma‘u ai ‘e he kau Mātu‘a ‘enau ongoongolelei.

³Ko tui ‘oku tau ‘utangi ai, ne langa ‘a e ngaahi ‘ūnivēsi ‘e he folofola ‘a e ‘Otua; ‘o pehē, kuo ‘ikai tupu ‘a e me‘a ‘oku tau sio ki ai mei ha ngaahi me‘a ‘oku hā.

⁴Ko tui na‘e ‘atu ki he ‘Otua ‘e ‘Ēpeli ha feilaulau, ‘o lelei hake ‘i ha‘a Keini; ‘io, ko ia ia na‘e fakamo‘oni ai ma‘ana ‘oku ne mā‘oni‘oni he na‘e fakamo‘oni ‘e he ‘Otua ‘i he funga ‘o e ngaahi me‘a na‘a ne ‘omi: pea ko ia ia ‘oku ne kei lea ai, neongo kuo pekia.

⁵Ko tui na‘e hiki ai ‘a ‘Īnoke, ke ‘oua te ne mamata ki he mate; pea na‘e ‘ikai ‘iloa, koe‘uhi kuo hiki ia ‘e he ‘Otua: he ‘i he te‘eki ke hiki ia ne fakamo‘oni ma‘ana, kuo ne fakahōifua ‘a e ‘Otua.

⁶Ka ‘oka ta‘ekau ‘a e tui, ‘oku ‘ikai momo‘i lava ha‘ate fakahōifua ia: he ko ia ‘oku ‘unu‘unu ki he ‘Otua, kuo pau ‘oku ne tui ‘oku ‘i ai ia, pea te ne hanga ‘o totongi kiate kinautolu ‘oku kumi hakili kiate ia.

⁷Ko tui na‘e ngāue ai ‘a Noa, ‘i hono valokia ki ha ngaahi me‘a kuo te‘eki hā mai; pea ‘i he‘ene manavahē ki ai, na‘a ne fa‘u ‘a e ‘A‘ake mo‘o fakamo‘ui hono ‘api: ‘io, ko ia ia na‘a ne fakahalaia ai ‘a māmani, ‘o ne hoko ko e ‘ea ki he mā‘oni‘oni fakatui.

⁸Ko tui na‘e talangofua ai ‘a ‘Epalahame ‘i hono ui, ‘o ne ‘alu atu mei hono fonua ki ha potu te ne toki ma‘u mōno tofi‘a; ‘io, na‘a ne ‘alu atu, ‘o ‘ikai te ne ‘ilo pe ko ‘ene ‘alu ki fē.

⁹Ko tui na‘a ne hanga ‘o ‘āunofo ai ki he Fonua ‘o e Tala‘ofa, ‘o hangē ko e nofo muli; ‘o ne fale ‘aki ‘a e tēniti pē, fakataha mo ‘Aisake mo Sēkope, ‘a ia na‘a nau kaungā‘ea ki he tala‘ofa ko ia.

¹⁰He na‘a ne nofo ‘amanaki ki he kolo ‘oku ‘o‘ona ‘a e ngaahi tu‘unga, ‘a ia ko hono fakafuofua mo hono tufunga lahi ko e ‘Otua.

¹¹Ko tui na‘e ma‘u mālohi ai ‘a Sela foki ke tu‘itu‘ia, ‘io, neongo kuo ne tauhili mo e taimi ko ia, ko e me‘a ‘i he‘ene lau[12] ko e toko taha ia ‘oku fai ki he‘ene lea ‘a ia kuo ne tala‘ofa.

¹²Ko ia ai, foki na‘e tupu mei ha toko taha, pea na‘a mo ia ko e koto mate pē, ‘io, na‘e tupu meiate ia ha kakai ke hangē ko e fetu‘u ‘o e langi hono tokolahi, pea hangē ko e ‘one‘one ‘i he matātahi ‘a ia ‘oku ‘ikai malau.

¹³Ko kinautolu ni kotoa pē na‘a nau pekia tui pē, kuo ‘ikai te nau lava‘i ‘a e ngaahi tala‘ofa; ka kuo nau sio ki ai mei he mama‘o, pea kuo nau fetapa ki ai, pea kuo nau fakahā, ko e ‘āunofo mo e muli kinautolu ‘i māmani.

¹⁴He ka pehē ha lea ‘a ha ni‘ihi, ‘oku hā mahino mei ai ‘oku nau ha‘ao hanau fonua tonu.

¹⁵Seuke, ka ne nau manatu ki he fonua ko ia na‘a nau ha‘u mei ai, na‘a nau ma‘u ai pē ha faingamālie ke nau foki.

¹⁶Ka ‘i hono anga ko eni, ko e fonua lelei hake ‘oku nau holi ki ai, ko hono ‘uhinga ko e fonua fakalangi: ko ia, ‘oku ‘ikai maa‘i kinautolu ‘e he ‘Otua ke ui ia ko honau ‘Otua, he na‘a ne teuteu mo‘onautolu ha kolo.

¹⁷Ko tui ne feilaulau ‘aki ai ‘e ‘Epalahame ‘a ‘Aisake ‘i hono ‘ahi‘ahi na‘e fai; ‘io, ko ia kuo ne tali ‘a e ngaahi tala‘ofa na‘e kamata ‘e ia ke feia hono foha tofu pē taha;

¹⁸‘io, ‘e ia na‘e folofola ki ai, ‘E ngata ‘ia ‘Aisake ‘a e lau ko ho hako.

¹⁹He na‘a ne pehē, Na‘a mo e pekia, ka ‘oku mafai ‘e he ‘Otua ke fokotu‘u mei ai; ‘io, na‘a ne toe ma‘u foki ia mei ai ‘i he lau fakatātā.

²⁰Ko tui ne tāpuaki ai ‘e ‘Aisake ‘a Sēkope mo ‘Īsoa, ‘o ne lau ki he ngaahi me‘a kaha‘u foki.

²¹Ko tui na‘e tāpuaki‘i ai ‘e Sēkope ‘a e ongo foha ‘o Siosifa tāutaha, ‘i he‘ene teu pekia, pea ne hūfaki ki hono ‘ulu‘i tokotoko.

²²Ko tui na‘e lau ai ‘e Siosifa ki he ‘Ekisoto ‘a ha‘a ‘Isileli, ‘i he‘ene teu pekia, ‘o ne fai tu‘utu‘uni ki hono ‘anga‘anga.

²³Ko tui na‘e fufū ai ‘a Mōsese ‘e he‘ene mātu‘a ‘i hono fanau‘i, ‘o māhina tolu, koe‘uhi na‘a na vakai ko e tama faka‘ofo‘ofa ia; ‘io, na‘e ‘ikai te na manavahē ki he fekau ‘a e tu‘i.

²⁴Ko tui na‘e fakatale‘i ai ‘e Mōsese ‘i he‘ene tangata hono lau ko e tama ‘a e ‘ōfefine ‘o Felo;

²⁵he‘ene fili mu‘a ke kaungā ngaohikovia mo e kakai ‘a e ‘Otua, ‘i ha‘ane ma‘u fakataimi pē ha mālie tu‘u he angahala;

²⁶he na‘a ne lau ‘a e manuki‘i ‘o Kalaisi ko e koloa na‘e hulu atu ‘i he ngaahi fokotu‘unga koloa ‘o ‘Isipite: he na‘a ne sio fakamama‘u atu ki he totongi.

²⁷Ko tui na‘a ne li‘aki ai ‘a ‘Isipite, ‘o ‘ikai te ne manavahē ki he tuputāmaki ‘a e tu‘i: he na‘a ne kītaki he‘ene sio ki he Tu‘i Ta‘ehāmai.

²⁸Ko tui na‘a ne fai ai ‘a e Pāsova mo e afuhi ‘aki ‘a e toto, koe‘uhi ke ‘oua na‘a ala kiate kinautolu ‘e ia ‘oku faka‘auha ‘a e ngaahi ‘uluaki.

²⁹Ko tui na‘a nau ‘asi atu ai ‘i he Tahi Kulokula, ‘o hangē ko e ‘alu ‘i he mōmoa; ‘a ia ‘i he ‘ahi‘ahi ki ai ‘e he kakai ‘Isipite na‘e fōngia ai kinautolu.

³⁰Ko tui na‘e holo ai ‘a e ngaahi ‘ā ‘o Sielikō, ‘i he hili hono ‘alu takai‘i ‘o ‘aho fitu.

³¹Ko tui na‘e ‘ikai ‘auha ai ‘a Lēhapi fe‘auaki, fakataha mo e kau talangata‘a; he kuo ne tali lelei ‘a e ongo mataki.

³²Pea ko ‘eku toe lea atu ke hā? he ‘oku si‘i ‘a e taimi ke fakamatala kia Kitione mo Pēlaki mo Samisoni mo Sēfita, kia Tēvita foki mo Sāmiuela mo e kau palōfita;

³³‘a e fa‘ahinga, ‘a ia ‘i he fai‘aki ‘o tui na‘a nau ikuna ‘a e ngaahi pule‘anga, na‘a nau feia e mā‘oni‘oni, na‘a nau lava‘i ‘a e ngaahi tala‘ofa, na‘a nau tāpuni ‘a e ngutu ‘o e fanga laione,

³⁴na‘a nau tāmate‘i ‘a e mālohi ‘o e afi, na‘a nau hao mei he mata ‘o e heletā, na‘e fakaake mālohi mei he vavai, na‘a nau hoko ‘o to‘a ‘i he tau, na‘a nau tulia ‘a e ngaahi matatau ‘o e muli.

³⁵Ma‘u ai ‘eni fafine honau pekia kuo toetu‘u; ka ka fakamamahi‘i ‘a e tu‘unga me‘a ni‘ihi, ‘o ‘ikai te nau fie tali ‘a e lau fakahaofi, koe‘uhi ke nau lava‘i ‘a e toetu‘u lelei hake.

³⁶Pea na‘e ‘ahi‘ahi‘i ‘aki ha ni‘ihi ‘a e ngaahi manuki fakamamahi, mo e haha, kae‘uma‘ā ‘a e nofo ha‘isia mo e pilīsone.

³⁷Na‘e tolomaka‘i ha ni‘ihi, na‘e kilisi ua,[13] na‘e fakapoongi heletaa‘i; na‘a nau hēhētu‘u, ‘o kofu kili‘i sipi mo kili‘i kosi, he kuo nau masiva mo fakatanga‘i mo ngaohikovia;

³⁸(ka ko e fa‘ahinga na‘e ‘ikai ke taau mo kinautolu ‘a e maama ko eni) na‘a nau nofo holo ‘i he ngaahi toafa mo e ngaahi mo‘unga mo e ngaahi ‘ana ‘o e fonua.

³⁹‘Io, ko kinautolu ni, neongo na‘a nau ma‘u kotoa pē ha ongoongolelei ‘i he‘enau tui, ka na‘e ‘ikai te nau lava‘i ‘a e Tala‘ofa:

⁴⁰koe‘uhi kuo tokonaki ‘e he ‘Otua ha me‘a lelei hake ma‘atautolu, pea koe‘uhi ke ‘oua na‘a fakahaohaoa ‘a kinautolu ta‘e te tau kau ai.