Read KO E TOH TAPU KATOA TONGA Hepelū 12 Bible Online

Hepelū 12 - KO E TOH TAPU KATOA TONGA bible

Hepelū 12

¹‘AUA, pea ko e me‘a ‘i he kāpui ‘a kitautolu ‘e ha ‘ao kau fakamo‘oni ‘oku fu‘u pehē fau, ko ia ke tau hu‘ihu‘i ‘a e fakamamafa kotoa pē, mo e angahala ‘oku tau mo‘uangofua ki ai, pea tau kītaki atu ‘etau lele he fakapuepue kuo tala humaki mai kiate kitautolu;

²‘o tau sio fakamama‘u atu ki he Takimu‘a ‘i he tui mo hono Fakaa‘u, ‘io, ‘a Sīsū; ‘a ia, ko e me‘a ke ne ma‘u ‘a e fiefia na‘e tala humaki kiate ia, ko ia na‘a ne kātaki ‘a e mate kalusefai, na‘e ‘ikai te ne toka‘i hono fakamaa‘i, pea kuo ne nofo hifo foki mei he to‘omata‘u ‘o e taloni ‘o e ‘Otua.

³Seuke, mou fua kimoutolu mo e Toko Taha na‘a ne kātaki ‘a e fu‘u angatu‘u pehē fau ko ia ‘a e koto angahala kiate kinautolu, telia na‘a mou mafasia he po‘epo‘ea homou laumālie.

⁴Kuo te‘eki ke mou talitu‘u ke toto ‘i ho‘omou fuhu mo e angahala.

⁵Pea kuo ngalo ‘aupito ‘iate kimoutolu ‘a e enginaki ‘a ia ‘oku ne lea kiate kimoutolu ‘o hangē ha fānau, Si‘oku foha, ‘oua te ke ta‘etokanga‘i ‘a e kini ‘oku fai ‘e he ‘Eiki, ‘uma‘ā ha‘o vaivai ‘i ho valoki‘i ‘e ia.

⁶He ko ia ia ‘oku ‘ofa ki ai ‘a e ‘Eiki, ‘a ia ‘oku ne kinisi; ‘io, ‘oku ne taa‘i ‘a e foha takitaha ‘oku ne ma‘u.

⁷Ko homou kinisi ia ‘oku mou kātaki na: ko e ngaohi ‘o e fānau ia ‘oku fai ‘e he ‘Otua kiate kimoutolu; he ko e fe‘ia ha foha ‘a ia ‘oku ‘ikai ke kinisi ‘e he‘ene tamai?

⁸He kapau leva ‘oku mou ‘ata‘atā mei he kinisi, ‘a ia kuo ‘inasi ai kotoa pē, pea tā ko e koto tupu fe‘auaki kimoutolu, pea ‘oku ‘ikai ko e fānau.

⁹Kae‘uma‘ā, na‘a tau ma‘u mu‘a ke kinisi kitautolu ‘a e ngaahi tamai ‘a hotau kakano, pea na‘a tau faka‘apa‘apa ki ai; hono ‘ikai taau ange noa pē ‘etau anganofo ki he Tamai ‘a e ngaahi laumālie, ka tau mo‘ui?

¹⁰‘Io, ko e fa‘ahinga ko ē foki na‘a nau kinisi kitautolu ‘o ‘aho si‘i pē, ‘o fakatatau ki he me‘a na‘e hā lelei kiate kinautolu; ka ko e toko taha ko ē, ko e fai ke ‘aonga mo‘oni, koe‘uhiā ke tau kau ‘i he mā‘oni‘oni ‘a‘ana.

¹¹Pea ko eni, ka fai ha kinisi, tala‘ehai ‘oku tau ongo‘i leva ko e me‘a fakafiefia ia, kaekehe, ko e me‘a fakamamahi; ka ‘e faifai pea tupu ai kiate kinautolu kuo ‘osi ‘a ako ai, ha fua ‘oku hoa mo e melino, ko e koto mā‘oni‘oni.

¹²Ko ia, mou ‘ai ke mafao ‘a e ngaahi nima ‘oku tāupe, mo e ngaahi tui ‘oku mate;

¹³pea tofa ‘aki homou topuva‘e ha ngaahi ‘alunga totonu, koe‘uhi ke ‘oua na‘a fasi ‘a si‘i ketu, kaekehe ke ne mo‘ui.

¹⁴Tuli ke mou melino mo e kakai kotoa pē; pea ki he mā‘oni‘oni, ‘a ia ka ‘ikai ma‘u, ‘e ‘ikai mamata ‘e ha taha ki he ‘Eiki.

¹⁵‘O mou vakavakai lelei, na‘a ai ha taha kuo ne kamata fakatōtōmui mei he kelesi ‘a e ‘Otua; ‘io, na‘a ai ha aka kona ‘oku tupu hake ‘o fakafiu‘i kimoutolu, pea pihia ai hono kotoa;

¹⁶‘io, na‘a ‘oku ‘i ai ha taha fe‘auaki, pe ha taha ‘oku fakaetangata pē, hangē ko ‘Īsoa, ‘a ia na‘a ne fakatau ki ha fo‘i me‘akai pē taha ‘a e tu‘unga hoko na‘e ‘o‘ona.

¹⁷He ‘oku mou ‘ilo, ‘i he faifai pea ne loto mo ia foki ke tō ma‘ana ‘a e tāpuaki, ka na‘e li‘aki pē; ‘io, na‘e ‘ikai te ne ‘ilo ha ava ki he‘ene fakamatala, neongo na‘a ne kumi hakili ki ai, mo tangi lo‘imata.[14]

¹⁸He tala‘ehai kuo mou ‘unu‘unu ki he me‘a ‘oku faa‘i, mo e afi kuo tutu, pe ki he loa mo e fakapo‘uli mo e afā, pe ki he le‘o ‘o e talupite mo e ongo mai ha ngaahi fo‘i folofola;

¹⁹‘a ia ‘i he fanongo ki ai ‘a e kakai na‘a nau fakafisi, ke ‘oua na‘a toe fai ha lea kiate kinautolu:

²⁰he na‘e ‘ikai te nau kātaki ‘a e me‘a na‘e tu‘utu‘uni, pea neongo ko ha manu pē ‘e lave ki he mo‘unga, ka ‘e tolomaka‘i.

²¹‘Io, na‘e pehē hono fakailifia ‘o e me‘a na‘e hā, ko ia na‘e pehē ai ‘e Mōsese, ‘Oku ou manavahē ‘aupito mo tetetete.

²²Ka kuo mou ‘unu‘unu ki he mo‘unga ko Saione, mo e kolo ‘o e ‘Otua Mo‘ui ko Selusalema fakalangi, pea ki he ngaahi toko mano ‘āngelo.

²³Ko e kātoanga mo fakataha ‘o e ngaahi ‘uluaki foha kuo tohi ‘i langi, pea ki he ‘Otua ko e Fakamaau ‘o e kakai kotoa pē, pea ki he ngaahi laumālie ‘o e kau angatonu kuo fakahaohaoa.

²⁴Pea kia Sīsū ko e Fakalaloa ‘o e Fuakava Fo‘ou, pea ki he ta‘ata‘a luluku, ‘a ia ‘oku ne lea ‘o lelei hake ‘ia ‘Ēpeli.

²⁵‘Ē, vakai ke ‘oua te mou fakafisi ‘a e toko taha ‘oku lea ni. He kapau na‘e ‘ikai hao ‘e kinautolu, he‘enau fakafisi kiate ia na‘e folofola mai ‘i māmani, huanoa kitaua, ‘o kapau te ta fulitu‘a kiate ia ‘oku folofola mei langi:

²⁶‘a ‘Ene ‘Afio na‘e lulu‘i ‘e hono le‘o ‘a māmani ‘i he taimi ko ia, ka ‘i he taimi ni kuo ne tala‘ofa ‘o pehē, ‘Oku toe tu‘o taha pē ‘eku lulu, ‘a ia ‘e ‘ikai fai ki māmani pē, ka ki he langi foki.

²⁷Pea ko eni ko e lea ko ia, ‘Oku toe tu‘o taha pē, ‘oku ne fakahā ‘a e ‘ave ‘o e ngaahi me‘a ‘oku lulu‘i, he ko e ngaahi me‘a kuo ngaohi; koe‘uhiā ke tu‘u ai pē ‘a e ngaahi me‘a mata‘elulu‘i.

²⁸Ko ia ko e me‘a ‘i he‘etau ma‘u ha pule‘anga, ‘a ia ‘e ‘ikai fa‘a lulu‘i, ke tau fakafeta‘i mu‘a, pea ke tau fai ai ki he ‘Otua ha ngāue te ne hōhō‘ia ai, fai mo e faka‘apa‘apa mo e manavahē,

²⁹he ko hotau ‘Otua ko e afi faka‘auha.