Read KO E TOH TAPU KATOA TONGA Hepelū 13 Bible Online

Hepelū 13 - KO E TOH TAPU KATOA TONGA bible

Hepelū 13

¹KE tu‘u ma‘u ho‘omou fe‘ofa‘aki fakalotu.

²‘Oua te mou loto ngalongalo he fakaafe ‘āunofo: he ‘i he fai ‘a e me‘a ko ia, kuo tali ‘e ha ni‘ihi ha kau ‘āngelo.

³Mou manatua ‘a kinautolu ‘oku nofo pilīsone, ‘o hangē ‘oku mou kaungā nofo pilīsone mo kinautolu: manatua ‘a e ngaohikovia ‘i ho‘omou ongo‘i ‘oku mou ‘i he sino foki mo kinautolu.

⁴Ke lau‘i lelei ‘a e mali ‘e he kakai kotoa pē; pea ke ta‘e‘uli‘i ‘a e mohenga: he ko e kau fe‘auaki, mo e tono‘unoho ‘e fakamaau kinautolu ‘e he ‘Otua.

⁵Ke ta‘emānumanu ho‘omou tō‘onga; pea mou fiemālie ‘i he ngaahi me‘a ‘oku mou ma‘u ni: he kuo folofola mai ‘e He‘ene ‘Afio, ‘E ‘ikai si‘i te u mahu‘i meiate koe, kae‘uma‘ā ha‘aku momo‘i li‘aki koe.

⁶Ko ia ‘oku tau mālohi ai ke lea ‘o pehē, Ko e ‘Eiki ko hoku tokoni; ‘e ‘ikai te u manavahē: ko e hā tū ha me‘a ‘e fai kiate au ‘e ha tangata?

⁷Fakamanatu hake ki he kakai na‘e takimu‘a kiate kimoutolu, ‘a e fa‘ahinga na‘e tala kiate kimoutolu ‘a e folofola ‘a e ‘Otua: pea mou fakatokanga‘i ‘a e iku‘anga ‘o ‘enau mo‘ui, ‘o fa‘ifa‘itaki ki he‘enau tui.

⁸Ko Sīsū Kalaisi ‘oku tatau ai pē he ‘aneafi, mo e ‘aho ni, ‘io, ‘o ta‘engata.

⁹‘Oua na‘a tuku ke ‘auhia kimoutolu he ngaahi tokāteline kehekehe mo fo‘ou. He ko hono lelei ke poupou ‘a e loto ‘aki ‘a e kelesi, ‘o ‘ikai ‘aki ‘a e ngaahi tu‘utu‘uni kai, ‘a ia na‘e ‘ikai ‘aonga kiate kinautolu na‘e fou ai.

¹⁰‘Ā, ‘oku ‘i ai hatau ‘ōlita, ‘a ia ‘oku ‘ikai ngofua ke kai mei ai ‘e kinautolu ‘oku tauhi ki he Tāpanekale.

¹¹He ko e ngaahi manu ko ia, ‘a ia na‘e ‘omi honau toto ki he Potu Toputapu ‘e he Taula‘eiki Lahi, na‘e tutu ‘o ‘osi honau ‘anga‘anga ‘i tu‘a ‘apitanga.

¹²Ko ia, ko Sīsū foki, koe‘uhiā ke ne fakatāpui ‘a e kakai ‘aki hono ta‘ata‘a ‘o‘ona, ko ia na‘a ne ‘alu atu ki he tu‘a matanikolo ke feia ai.

¹³Pea ko ia, tau ‘alu atu kiate ia ki tu‘a ‘apitanga, ‘o fua hono manukia‘anga.

¹⁴He tala‘ehai ‘oku tau ma‘u ‘i heni ha kolo tu‘u ma‘u, ka ‘oku tau ha‘ao ‘a e kolo ko ia ka hoko mai.

¹⁵‘Āua, ko ia ke tau ‘atu ‘iate ia pē, ma‘u ai pē, ha feilaulau fakafeta‘i ki he ‘Otua, ‘a ē ko e fua ‘o e loungutu ‘oku takua hono huafa.

¹⁶Kae‘uma‘ā, ‘oua na‘a ngalo ‘a e fai ‘ofa mo e fai tokoni: he ko e alā feilaulau pehē ‘oku hōhō‘ia ai ‘a e ‘Otua.

¹⁷Mou tuitala ki he kau tu‘ukimu‘a ‘omoutolu, pea fakavaivai kiate kinautolu; he ko kinautolu ia ‘oku nau ‘ā ke le‘ohi homou laumālie, he ko kinautolu te nau fakamatala kimoutolu ‘amui; koe‘uhiā ke nau fai fiefia ‘enau ngāue ko ia, ‘o ‘ikai fai mo e to‘e; he ‘e ta‘e‘aonga ia kiate kimoutolu.

¹⁸Mou hūfia kimautolu; he ‘oku mau pehē ‘oku ‘ata‘atā homau konisēnisi: he ko homau loto ke taau ‘emau mo‘ui ‘i he me‘a kotoa.

¹⁹Pea ‘oku ‘āsili ‘eku kole ke mou fai pehē, koe‘uhi ke vave hoku fakafoki atu kiate kimoutolu.

²⁰Pea ko e ‘Otua ‘oku ‘a‘ana ‘a e fakamelino, ‘a ‘Ene ‘Afio na‘a ne toe ‘omi mei he pekia ‘a hotau ‘Eiki ko Sīsū Kalaisi ‘a e Tauhi fungani ko ia ‘o e fanga sipi ‘i he ta‘ata‘a[15] ‘o e Fuakava Ta‘engata.

²¹‘Ofa ke fakakakato kimoutolu ‘e He‘ene ‘Afio ‘i he me‘a lelei fuli pē ke mou ‘osiki hono finangalo, he‘ene feia ‘iate kitautolu ‘a e me‘a ‘oku hōhō‘ia ai hono finangalo ‘ia Sīsū Kalaisi; ke ‘o ‘Ene ‘Afio ‘a e kolōlia, ‘o lauikuonga pea ta‘engata. ‘Ēmeni.

²²Kāinga, ‘oku ou kole atu ke mou kātaki ‘eku lea tokoni ni, he ‘oku nounou pē ‘a e ‘ipiseli kuo u fai atu.

²³Ke mou ‘ilo pē, kuo veteange hota tokoua ko Tīmote; pea kapau ‘e vave ‘ene ‘alu atu, te u ‘a‘ahi kiate kimoutolu fakataha mo ia.

²⁴Tala hoku ‘ofa ki he kau takimu‘a kotoa pē ‘omoutolu, pea ki he kakai lotu fuli pē. ‘Oku ‘ofa atu ‘a e kakai ‘o ‘Ītali.

²⁵‘Ofa ke ‘iate kimoutolu fuli pē ‘a e kelesi. ‘Ēmeni.