Read KO E TOH TAPU KATOA TONGA Hepelū 3 Bible Online

Hepelū 3 - KO E TOH TAPU KATOA TONGA bible

Hepelū 3

¹KO IA, ‘e hoto ngaahi tokoua tapu, si‘i kau ‘i ha ui mei langi, mou tokanga‘i ‘a e ‘Aposetolo mo Taula‘eiki Lahi ‘o ‘etau lotu, ‘io, ‘a Sīsū;

²‘ene lototō kiate ia na‘a ne ngaohi ia, ‘o hangē foki na‘e lototō ‘a Mōsese ‘i he ‘api kotoa ‘o ‘Ene ‘Afio.

³He kuo lau ‘a e toko taha ko eni ‘oku ne taau mo ha fakahīkihiki lahi ‘ia Mōsese, ke hoa mo e lahi hake ‘o e mahu‘inga ‘o‘ona na‘a ne langa ‘a e ‘api, ‘i he mahu‘inga ‘o e ‘api.

⁴Seuke, ‘ilonga ha ‘api, kuo pau na‘e langa ‘e ha taha; pea ko ia na‘a ne langa ‘a e me‘a kotoa pē ko e ‘Otua.

⁵Pea ko Mōsese foki na‘a ne lototō ‘i he ‘api kotoa ‘o ‘Ene ‘Afio, ko e matāpule pē, mo‘o fakamo‘oni ki he ngaahi me‘a ka folofola‘aki ‘amui.

⁶Ka ko e lototō ‘a Kalaisi, ko e fai ‘a ha ‘Alo ‘oku pule ki he ‘api ‘o ‘Ene ‘Afio; ‘a ia ko hono ‘api ‘a kitautolu, ‘o kapau te tau kuku ma‘u ‘o a‘u ki he ngata‘anga ‘a ‘etau lotolahi, mo ‘etau viki ‘i he‘etau fakatu‘amelie kuo ma‘u.

⁷Ko ia — hangē ko e folofola ‘a e Laumālie Mā‘oni‘oni, Ko e ‘aho ni pē — kapau te mou fanongo ki hono le‘o.

⁸‘Oua na‘a fakafefeka homou loto; ‘O hangē ko ia ne fai ‘i Fakahouhau, ‘O tatau mo e ‘aho ‘o ‘Ahi‘ahi ‘i he Toafa:

⁹‘A ia na‘e ‘ahi‘ahi au ‘e ho‘omou ngaahi kui, He‘enau ala‘aki mai; ‘O nau mamata ki he‘eku ngaahi ngāue ‘O fāngofulu ta‘u.

¹⁰Ko ia, na‘a ku ‘ita ki he to‘utangata ko eni, ‘o u pehē, ‘Oku nau hē ma‘u ai pē ‘i honau loto; Pea na‘e ‘ikai te nau a‘usia ‘a e ‘ilo‘i ‘o hoku ngaahi ‘alunga.

¹¹‘A ē ne u fuakava ai ‘i he‘eku ‘ita ko au ē, ha‘anau hū ki hoku Mālōlō‘anga!

¹²Ko ia, mou vakai, ‘e kāinga, na‘a ‘iloange ‘e ai ‘i hamou toko taha ha loto kovi he ta‘etui, ‘a ia ‘oku hiki mei he ‘Otua ‘oku mo‘ui.

¹³Ka mou feenginaki‘aki pē, ‘o hokohoko ‘aho pē, lolotonga ‘oku kei lau atu ko e ‘aho ni; na‘a fakafefeka hamou taha ‘i he kākā ‘a angahala.

¹⁴He kuo tau hoko ko e kau ‘inasi ‘ia Kalaisi, ‘o kapau ā ‘oku tau kuku ma‘u ‘o a‘u ki he ngata‘anga ‘a e lotopau na‘a tau kamata ‘aki.

¹⁵[‘A ia ‘oku hā] ‘i hono pehē mai, Ko e ‘aho ni, ‘o kapau te mou fanongo ki hono le‘o, ‘oua na‘a fakafefeka homou loto, ‘o hangē ko e fai ‘i Fakahouhau.

¹⁶He ko hai ‘a kinautolu na‘e fanongo kae fakatupu houhau? ‘Ā, ‘ikai ko kinautolu ia kotoa pē na‘e ‘alu atu mei ‘Isipite ‘ia Mōsese?

¹⁷Pea ko hai na‘a ne ‘ita ki ai ‘o fāngofulu ta‘u? ‘ikai ko kinautolu ia na‘e angahala, ‘a ia na‘e mokulu honau ngaahi kupu ‘i he Toafa?

¹⁸Pea ko hai ‘a kinautolu na‘a ne fuakava ki ai, ‘e ‘ikai te nau hū ki hono mālōlō‘anga? ‘Ikai ko kinautolu na‘e talangata‘a?

¹⁹Pea ‘oku tau vakai, na‘e ‘ikai te nau lava ke hū, koe‘uhi ko ‘enau ta‘etui.