Read KO E TOH TAPU KATOA TONGA Hepelū 4 Bible Online

Hepelū 4 - KO E TOH TAPU KATOA TONGA bible

Hepelū 4

¹‘ĀUA; ko ia, neongo ‘oku toe pē ha palōmesi ke ta hū ki hono mālōlō‘anga, ke tau manavahē mu‘a na‘a faifai pea hā kuo tōmui hamou toko taha.

²He ko kitautolu foki kuo tala ki ai ha ongoongolelei, ‘o hangē ko kinautolu: ka ko e lea ‘o e ongoongo na‘a nau fanongo ki ai, na‘e ‘ikai ‘aonga ki he fa‘ahinga ko ia, ko e ‘ikai fakataha kinautolu ‘e he‘enau tui mo e kakai na‘e tuitala ki ai.

³He ‘oku ta hū ki he mālōlō‘anga, ‘a kitaua na‘e tui, ‘o hangē ā ‘ene folofola, ‘A ē ne u fuakava ai ‘i he‘eku ‘ita, Ko au ē ha‘anau hū ki hoku mālōlō‘anga! Neongo kuo ‘osi ‘a e ngaahi ngāue talu mei he fokotu‘u ‘o māmani.

⁴He kuo ne folofola ‘i ha potu ‘e taha, ‘i he‘ene lau ki he Sāpate, ‘o pehē, Pea na‘e mālōlō ‘a e ‘Otua ‘i hono fitu ‘o e ‘aho mei he‘ene ngaahi ngāue kehekehe.

⁵Pea ‘i he potu tohi ko eni ‘oku ne toe folofola mai, Ko au ē, ha‘anau hū ki hoku mālōlō‘anga!

⁶Tā ‘oku kei toe ha ni‘ihi ke hū ki ai, pea ko kinautolu na‘e tomu‘a tala ki ai ‘a e ongoongolelei na, na‘e ‘ikai te nau hū ki ai koe‘uhi ko e talangata‘a.

⁷Ko ia, ‘oku ne toe kotofa ha ‘aho, ‘o pehē, Ko e ‘aho ni pē — ko ‘ene folofola ē ‘ia Tēvita, kuo hili ha taimi, ko futu: ‘o hangē ko ia na‘e lau ‘anenai, Ko e ‘aho ni pē — kapau te mou fanongo ki hono le‘o, ‘Oua na‘a fakafefeka homou loto.

⁸He ka ne fakamālōlō kinautolu ‘e Sīsū, (‘a ia ko Siosiua) pehē ne ‘ikai te ne folofola ki mui ki ha ‘aho kehe.

⁹‘Āua; pea tā ‘oku toe pē ha mālōlō faka-Sāpate ma‘a e kakai ‘a e ‘Otua.

¹⁰He ko ia na‘a ne hū ki hono mālōlō‘anga, na‘a ne mālōlō ‘e ia foki mei he‘ene ngaahi ngāue, ‘o hangē tofu pē ko e ‘Otua mei ha‘ana.

¹¹Ko ia, ke tau tōtōivi ke hū ki he mālōlō‘anga ko ia, na‘a ai ha taha ‘e tō ki he anga talangata‘a ko ia.

¹²He ko e folofola ‘a e ‘Otua, ko e koto mo‘ui mo e koto mālohi, pea māsila ange ‘i ha heletā fakatoumata fua pē; ‘o ne ‘asi atu ‘o maioio‘i ‘a e loto mo e laumālie, ‘io, hono ngaahi hokonga mo e uho; pea ‘oku ne vavanga‘i ‘a e ngaahi holi mo e fakakaukau ‘o e loto.

¹³Pea ‘oku ‘ikai ha me‘a kuo ngaohi ‘e ta‘e‘ata pē ki he ‘Ene ‘Afio: ka ‘oku telefua mo tokaima‘ananga ‘a e me‘a kotoa pē ki he fofonga ‘o ia ‘oku tau fakamaau ki ai.

¹⁴Ko ia, ‘i he‘etau ma‘u leva ha Taula‘eiki Lahi ‘oku fungani, ‘a ia kuo ne ‘asi atu ‘i he ngaahi langi, ‘io, ‘a Sīsū ko e ‘Alo ‘o e ‘Otua, ko ia, ke tau puke ma‘u ‘a ‘etau lotu.

¹⁵He tala‘ehai ‘oku tau ma‘u ha Taula‘eiki Lahi ‘oku ta‘emalavea ‘i hotau ngaahi vaivai‘anga, kaekehe ‘oku tau ma‘u ha toko taha kuo ‘osi ‘ahi‘ahi ‘i he me‘a kotoa pē, hangē ko kitautolu, kae ‘ikai ha‘ane angahala.

¹⁶Ko ia, ke tau ‘unu‘unu atu mālohi ai ki he taloni ‘o kelesi, ke tau ma‘u meesi, mo tau ta‘imālie ha kelesi ke tokoni mai.