Read KO E TOH TAPU KATOA TONGA Hepelū 6 Bible Online

Hepelū 6 - KO E TOH TAPU KATOA TONGA bible

Hepelū 6

¹KO ia, tau tuku ā ‘a e fakamatala ‘o e ngaahi ‘elemēniti faka-Kalaisi, ka tau tuiaki atu ki he haohaoa; ‘o ‘oua na‘a tau tanupou ai pē he fakatomala mei he ngaahi ngāue mate mo e tui falala ki he ‘Otua.

²He tokāteline ‘o e ngaahi papitaiso[6] mo e hilifaki nima, ‘o e toetu‘u ‘o e pekia mo e fakamaau ta‘engata.

³Pea te tau fai ia, ‘o kapau ‘e lelei ki he finangalo ‘o e ‘Otua.

⁴He ‘ilonga kinautolu ne fakamāmangia mu‘a, mo kamata ki he me‘a‘ofa fakahēvani, pea ne hoko ko e kau ‘inasi ‘i he Laumālie Mā‘oni‘oni,

⁵pea ne kamata hono lelei ‘o e folofola ‘a e ‘Otua, mo e ngaahi ivi ‘o e tu‘u ka hoko:

⁶ka nau hinga pē: ‘oku ‘ikai ‘aupito lava ke toe fakafo‘ou kinautolu ke nau fakatomala, he‘enau kalusefai fo‘ou kiate kinautolu ‘a e ‘Alo ‘o e ‘Otua, ‘o fai fakahāhā pē ‘a hono fakamaa‘i.

⁷Seuke, na‘a mo ha kelekele, ‘a ia kuo ne inumia ‘a e ‘uha ‘oku fa‘a tō ki ai, pea fakatupu ha ngaahi ‘akau ‘oku ‘aonga kiate kinautolu ‘a ia ‘oku ngoue‘i foki ma‘anautolu, ‘oku fai tāpuekina ‘a e kelekele ko ia mei he ‘Otua:

⁸ka ‘oka tupu mei ai ‘a e ‘akau talatala mo e talatala‘āmoa, ‘oku li‘aki ia, pea kuo ofi hono fakamala‘ia; ‘a ia ko hono iku‘anga ko e vela.

⁹Ka neongo foki kuo mau lea pehē, ka ‘oku mau mātu‘aki tui, si‘oku ‘ofa‘anga, ‘e ‘amoutolu ‘a e ngaahi lelei na, ‘io, ko e ngaahi me‘a ‘oku hoa mo e fakamo‘ui.

¹⁰He tala‘ehai ‘oku fai ta‘etotonu ‘a e ‘Otua ke ne fakangalo‘i ho‘omou ngāue, mo e ‘ofa ki hono huafa na‘e hā ‘iate kimoutolu ‘i ho‘omou tokoni ki he kakai lotu, ‘a ia foki ‘oku mou kei fai.

¹¹Ka ‘oku mau faka‘amu ke hā ‘iate kimoutolu takitaha ha feinga hangē ko ia, ke fakama‘uma‘uluta ho‘omou fakatu‘amelie, ‘o a‘u ki he ngata‘anga.

¹²Koe‘uhi ke ‘oua te mou hoko ko e kau fakapikopiko, ka ko e kau fa‘ifa‘itaki ‘o e kakai kuo nau hokosi ‘a e ngaahi tala‘ofa ‘i he‘enau tui mo e kītaki.

¹³He ko ‘Epalahame na‘e fai ha tala‘ofa ki ai ‘e he ‘Otua; pea ‘i he ‘ikai ha toko taha mā‘olunga hake ke ne lea tuki ai, ko ia na‘a ne lea tuki ‘i He ‘ene ‘Afio,

¹⁴‘o pehē, Ko au ē te u mātu‘aki tāpuaki‘i koe, pea te u mātu‘aki fakatokolahi‘i koe.

¹⁵Pea ‘i hono pehe‘i, na‘a ne kītaki, ‘o ne lava‘i ‘a e tala‘ofa.

¹⁶Seuke, ‘oku lea tuki ‘a e kakai ‘iate ia ‘oku mā‘olunga, pea ka ai ha‘amo fakakikihi, ‘oku fakangatangata ‘e ha lea tuki, pea pau ai ‘a e me‘a.

¹⁷Ko ia, ko e ‘Otua, ‘i he‘ene finangalo ke ‘āsili hā ki he ngaahi ‘ea ‘o e tala‘ofa hono mata‘eliliu ‘o ‘Ene tu‘utu‘uni, ko ia na‘a ne fakamamafa ‘aki ha lea tuki:

¹⁸koe‘uhiā, ko e me‘a ‘i he ‘i ai ‘a e ongo me‘a ta‘emaliliu ‘e ua, ‘a ia na‘e ‘ikai ‘aupito lava ke loi ai ‘a e ‘Otua, ko ia ke ai hatau tokoni mālohi, ‘a kitaua kuo ta hola hūfanga ke puke ki he ‘amanaki ‘oku tala humaki mai:

¹⁹‘a e ‘amanaki ko ia ‘oku tau ma‘u mo‘o taula hotau laumālie, ko e taula mālohi mo ma‘uma‘uluta, pea kuo lī ki he loto tatau;

²⁰‘a ia kuo hū ki ai ‘a Sīsū ma‘atautolu, ko hotau Takilele, he‘ene hoko ko e Taula‘eiki Lahi ‘i he ‘alunga ‘o Melekiseteki,[7] ‘o laui ‘ītāniti.