Read KO E TOH TAPU KATOA TONGA Hepelū 7 Bible Online

Hepelū 7 - KO E TOH TAPU KATOA TONGA bible

Hepelū 7

¹HE ko e Melekiseteki ko ia, ‘a e Tu‘i Salema, ‘a e taula‘eiki ‘a e ‘Otua Taupotu, ‘a e toko taha na‘e fakafetaulaki kia ‘Epalahame ‘i he‘ene foki mai mei he taa‘i ‘o e ngaahi tu‘i, mo ne tāpuaki‘i ia;

²‘a e toko taha foki na‘e tuku ma‘ana ‘e ‘Epalahame hono vahehongofulu ‘o e me‘a kotoa; ‘a ia ko e ‘uhinga ‘o hono ‘uluaki hingoa ko e Tu‘i ‘o e Mā‘oni‘oni, pea hoko mo hono hingoa ‘e taha ko e Tu‘i Salema, ‘a ia ko e Tu‘i ‘o e Melino;

³ta‘eha‘ane tamai, ta‘eha‘ane fa‘ē, ta‘ehano hohoko, ‘a ia ‘oku ‘ikai ha kamata‘anga ‘o hono ngaahi ‘aho, pe ha ngata‘anga ‘o ‘ene mo‘ui; kae‘uma‘ā ‘oku fakatatau ki he ‘Alo ‘o e ‘Otua — ko e Melekiseteki ko ia ‘oku ne nofo taula‘eiki ai pē.

⁴‘Ē, vakai ā; hono ‘ikai lahi ‘a e tangata ko ia! he na‘e ‘atu ki ai ‘e ‘Epalahame ‘a e vahehongofulu, ‘a e fungani ‘o e vete, ‘io, na‘e ‘atu ‘e ‘Epalahame ko e Pēteliake!

⁵Pea ko eni, ko kinautolu ‘o e hako ‘o Līvai ‘oku ma‘u ‘a e lakanga fakataula‘eiki, ‘oku ‘i ai ‘enau tu‘utu‘uni fakalao ke to‘o ‘a e vahehongofulu mei he kakai; ‘a ia ko e ma‘u mei honau kāinga, neongo ko e mātu‘aki tupu kinautolu mei he mānava ‘o ‘Epalahame.

⁶Ka ko e toko taha ‘eni, ‘a ia ‘oku ‘ikai kākunga ke hoko ki he fa‘ahinga ko ia, ka kuo ne to‘o ‘a e ‘inasi hongofulu meia ‘Epalahame; ‘io, pea kuo ne tāpuaki‘i ‘a e toko taha na‘e ‘a‘ana ‘a e ngaahi tala‘ofa.

⁷Pea tala‘ehai ‘e fa‘a faka‘ikai ki ai, ‘oku tāpuaki‘i ‘a e si‘i ‘e he lahi.

⁸Kae‘uma‘ā foki, ‘i he me‘a ko eni, ‘oku ma‘u ‘a e ngaahi vahe hongofulu ‘e ha kakai ‘oku mate; ka ‘i he me‘a ko ena, ‘oku ma‘u ‘e ha toko taha ‘a ia ‘oku fakahā‘ia mai ‘oku ne mo‘ui.

⁹‘Io, tapu mo kimoutolu, ko Līvai foki, ‘a ia ‘oku ‘a‘ana ‘a e ngaahi vahe hongofulu, na‘e fakatukuhau‘i ia ‘ia ‘Epalahame;

¹⁰he na‘a ne kei ‘i he mānava ‘o ‘ene kui ‘i he fakafetaulaki kiate ia ‘e Melekiseteki.

¹¹Pea ko eni, ka ne lava ‘a e fakahaohaoa ‘i he fai‘aki ‘a e taula‘eiki faka-Līvai, (he ko ia ia ‘a e me‘a na‘e tu‘unga ki ai ‘a e ma‘u Lao ‘e he kakai ‘Isileli pea koe‘uma‘ā ke fokotu‘u ha taula‘eiki ‘oku fa‘ahinga kehe ‘i he ‘alunga tokua ‘o Melekiseteki,[8] ‘o ‘ikai ‘i he ‘alunga ‘o ‘Ēlone?

¹²He ko e pehē leva kuo liliu ‘a e taula‘eiki, tā kuo pau ‘oku ‘i ai ‘a e liliu ‘o e lao.

¹³Ka na‘e fai: he ko e toko taha ‘oku kau ki ai ‘a e lea ko ia, ‘oku ne kau ki ha matakali kehe, ko e matakali kuo te‘eki si‘i ke nofo hanau taha ki he ngāue ‘o e ‘ōlita.

¹⁴He ‘oku mātu‘aki mahino kuo tupu hotau ‘Eiki mei ha‘a Siuta, ‘a ia ko e matakali na‘e ‘ikai ha momo‘i lau taula‘eiki mei ai ‘e Mōsese.

¹⁵Kae‘uma‘ā ē, ‘oku ‘āsili hā ‘a e me‘a ko ia, ‘o kapau leva ‘oku ‘i he tatau ‘o Melekiseteki ‘a e fokotu‘u ‘o ha taula‘eiki kehe,

¹⁶ha toko taha ‘oku ‘ikai te ne hoko pehē mei ha lao ‘oku fakaekakano hono tu‘utu‘uni, ka ‘oku ne hoko ki ai ‘i he ivi ‘o ha mo‘ui ‘oku ta‘emavete:

¹⁷he ‘oku fakahā mai ia ‘o pehē, Ko e taula‘eiki koe ‘o ta‘engata ‘i he ‘alunga ‘o Melekiseteki.[9]

¹⁸‘Āua, he ‘oku hoko ai ‘a e tāmate‘i ‘o e tu‘utu‘uni ‘oku mu‘omu‘a, koe‘uhi ko hono me‘a na‘e vaivai mo ta‘e‘aonga.

¹⁹(He tala‘ehai na‘e ai ha momo‘i me‘a ‘e fakahaohaoa ‘e he Lao) pea ‘oku hoko ai ‘a e fakahū mai, ‘o kanoni ‘aki, ha falala‘anga lelei hake, ‘a ia ‘oku tau fakaofiofi ai ki he ‘Otua.

²⁰Pea ko e me‘a ‘i he ‘ikai hoko ia ta‘eha lea tuki; (he ko kinautolu na‘a nau hoko ‘o taula‘eiki ta‘eha lea tuki;

²¹ka ka ō mo e hoko ‘a‘ana ha lea tuki, fai ‘e ia na‘e folofola kiate ia ‘o pehē, Kuo lea tuki ‘e he ‘Eiki, pea ‘e ‘ikai te ne liliu, Ko e taula‘eiki koe ‘o ta‘engata).

²²Ko ia, ‘oku hoa mo ia ‘a e lelei lahi hake ‘o e fuakava, ‘a ia kuo hoko ‘a Sīsū ko hono Talifaki.

²³Kae‘uma‘ā, ko kinautolu na‘e fokotu‘u tokolahi ke taula‘eiki, koe‘uhi ko e ta‘ofi ‘e he mate ‘enau fai ma‘u pē.

²⁴Ka ko e toko taha ni, ko e me‘a ‘i he‘ene tolonga ‘o ta‘engata, ko ia ‘oku ‘ikai liua ‘ene lakanga taula‘eiki.

²⁵Ko ia ai foki ‘oku ne mafai ke fakamo‘ui opeope ‘a kinautolu ‘oku ha‘u ki he ‘Otua ‘iate ia, ko ‘ene mo‘ui ma‘u ai pē ke hufekina kinautolu.

²⁶He na‘e tuha foki mo kitautolu ha Taula‘eiki Lahi ‘oku pehē, ha taha ‘oku mā‘oni‘oni, mo ‘ata‘atā mei he kovi, mo ta‘emele; ha taha kuo mavahe mei he kakai angahala, pea kuo hoko ‘o motu atu ‘i he ngaahi langi.

²⁷Ko e toko taha ‘oku ‘ikai pau ke ne fua ‘atu ma‘ana ‘i he ngaahi ‘aho kotoa pē ha ngaahi feilaulau koe‘uhi ko ha‘ane ngaahi angahala ‘a‘ana, ‘o hangē ko e kau Taula‘eiki Lahi ko ia, pea hili ia ke ne fai ma‘a e kakai; he na‘a ne fai ia ke tātu‘otaha pē, he‘ene ‘oatu ‘e ia ia.

²⁸He ko e Lao, ‘oku ne fokotu‘u ke taula‘eiki ha kau tangata, ha ni‘ihi ma‘u vaivai‘anga; ka ko e folofola ‘o e lea tuki, ‘a ia na‘e hoko ki mui ‘i he Lao, ‘oku fokotu‘u ai ha ‘Alo, ‘a ia kuo ‘osi fakahaohaoa ‘o ta‘engata.