Read KO E TOH TAPU KATOA TONGA Hepelū 8 Bible Online

Hepelū 8 - KO E TOH TAPU KATOA TONGA bible

Hepelū 8

¹PEA ko eni, ‘i he ngaahi me‘a ‘oku tau lau ki ai, ko eni pē ‘a e me‘a ‘oku tu‘ukimu‘a: ko e ‘i ai hotau Taula‘eiki Lahi ‘oku pehē fau, he kuo ne nofo hifo mei he to‘omata‘u ‘o e taloni ‘o ‘Ene ‘Afio ‘i he ngaahi langi.

²Ko e Faifekau ‘o e Potu Toputapu, mo e Tāpanekale mo‘onia; ‘a ia ne fokotu‘u ‘e he ‘Eiki, ‘o ‘ikai ‘e ha tangata.

³He ‘ilonga ha Taula‘eiki Lahi, kuo fokotu‘u ia ke ‘atu ‘a e ngaahi me‘a‘ofa, mo e ngaahi feilaulau: ko ia ai, kuo pau ke ai ha‘ane me‘a ke ‘atu ‘e he Taula‘eiki Lahi ko eni foki.

⁴Pea ko eni, ka ne ‘i māmani ia ‘e ‘ikai te ne kākunga ke taula‘eiki, koe‘uhi ‘oku ‘i ai ha ni‘ihi ke ‘atu me‘a‘ofa ‘i he tu‘utu‘uni ‘a e Lao.

⁵Ka ko e fa‘ahinga ‘oku nau ngāue ki he fakatātā mo e ‘ata ‘o e ngaahi me‘a fakalangi: ‘o hangē ko e na‘ina‘i ‘o Mōsese ‘i he‘ene ene ke fokotu‘u ‘a e Tāpanekale. He na‘e folofola kiate ia ‘o pehē, Tokanga ke ke ngaohi ‘a e ngaahi me‘a ‘o fakatatau ki he fakatātā‘anga na‘e faka‘ali‘ali kiate koe ‘i he mo‘unga.

⁶Ka ‘i heni ‘oku ne ma‘u ha lakanga ‘oku hulu atu, ke hoa mo e lelei hake ‘o e fuakava ‘oku ne nofo ko hono Fakalaloa: ‘a ia ko e fuakava kuo tu‘unga ki he ngaahi palōmesi lelei hake.

⁷He ka ne ta‘emele ‘a e ‘uluaki fuakava ko ia, tala‘ehai ‘e kumi ha potu ke tu‘unga ki ai hano ua.

⁸He vakai ‘oku ne tala‘i honau mele he‘ene pehē, Ko e folofola ‘eni ‘a e ‘Eiki, Ko eni ‘oku ‘unu mai ha taimi te u fakakakato ai ki ha‘a ‘Isileli mo ha‘a Siuta ha fuakava fo‘ou;

⁹‘a ia ‘oku ‘ikai hangē ko e fuakava na‘a ku fokotu‘u mu‘a ma‘a ‘enau ngaahi kui, ‘i he ‘aho ko ia na‘a ku pukenima‘i kinautolu ke taki atu mei ‘Isipite; he na‘e ‘ikai te nau nofo ‘i he‘eku fuakava ko ia, pea na‘a ku tuku ‘eku tokanga‘i kinautolu — ko e folofola ia ‘a e ‘Eiki.

¹⁰‘Io, ‘oku folofola ‘a e ‘Eiki, he ko eni ia ‘a e fuakava ‘a ia te u fokotu‘u ma‘a ha‘a ‘Isileli hili ‘a e taimi ko ia; Te u ‘ai ‘eku ngaahi lao ki honau ‘atamai, pea te u tohi tongi ia ki honau loto: pea te u nofo au ko honau ‘Otua, pea te nau nofo kinautolu ko hoku kakai.

¹¹Pea tala‘ehai te nau takitaha ako hono kaungā kolo, pe ko hono tokoua, ‘o pehē, Ke ke kumi ke ‘ilo ‘a e ‘Eiki; koe‘uhi te nau lāu‘ilo kotoa pē kiate au mei he iiki ki he lalahi.

¹²He te u fakamolemole ‘enau ngaahi fai ta‘etotonu; pea ko ‘enau ngaahi angahala ‘e ‘ikai te u toe manatua.

¹³‘Uē! ko ‘ene pehē leva, Ha Fuakava FO‘OU, tā kuo ne fakaluku ai ‘a e ‘uluaki. Pea ko eni, ko e me‘a kuo kamata luku, pea ‘oku faka‘au‘au hifo, kuo ofi ‘ene mole.