Read KO E TOH TAPU KATOA TONGA Hepelū 9 Bible Online

Hepelū 9 - KO E TOH TAPU KATOA TONGA bible

Hepelū 9

¹PEA ko ia, ko e ‘uluaki fuakava foki na‘e ai hono ngaahi tu‘utu‘uni lotu, mo e Fale Tapu ‘o māmani.

²He na‘e fokotu‘u ha Tāpanekale, ‘a ia ko hono ‘uluaki feitu‘u na‘e ‘i ai ‘a e tu‘unga maama, mo e tēpile, mo e fokotu‘unga mā: ko e feitu‘u Tāpanekale ia ‘oku ui ko e Potu Tapu.

³Pea ‘i he tuku mai hono ua ‘o e tatau, na‘e ‘i ai ‘a e feitu‘u Tāpanekale ‘oku ui ko e Potu Toputapu.

⁴‘A ia ‘oku kau ai ‘a e ‘ōlita tutu‘anga ‘inisēnisi, ‘a ia na‘e koula, mo e ‘a‘ake ‘o e kovinānite, ‘a ia na‘e ‘ufi‘ufi koula hono feitu‘u kotoa pē, ‘a ia na‘e ‘i ai ‘a e ‘ainga mana na‘e koula, mo e tokotoko ‘o ‘Ēlone, ‘a ia na‘e muka mai, mo e ongo maka tohi‘anga fuakava.

⁵Pea na‘e tu‘u ‘i ‘olunga ‘a e ongo Selupimi ‘o e Sikaina na‘e fakamalumalu ‘a e hōifua‘anga — ka ko e ngaahi me‘a ko ia ‘oku ‘ikai ke lava ke lea fakafo‘ime‘a ki ai ‘i he taimi ni.

⁶Pea ko eni, kuo fokotu‘u leva ‘a e ngaahi me‘a ko ia, na‘e hū ‘a e kau taula‘eiki ki he ‘uluaki feitu‘u Tāpanekale ‘i he taimi kotoa pē, he fai ‘o e ngaahi ngāue fakalotu.

⁷Ka ko hono ua na‘e tu‘o taha pē ‘i he ta‘u, pea fai ‘e he Taula‘eiki Lahi toko taha pē; pea na‘a mo ia na‘e ‘ikai te ne hū ‘o ta‘e te ne ‘alu mo ia ha toto, ‘a ia na‘a ne ‘atu koe‘uhi ko ia, pea koe‘uhi ko e ngaahi faivale ‘a e kakai:

⁸ko e fakamahino mei ai ‘e he Laumālie Mā‘oni‘oni ‘a e me‘a ni, Kuo te‘eki ke fakae‘a ‘a e hala ki he Potu Toputapu, lolotonga ‘oku kei ‘i ai ‘a e ‘uluaki feitu‘u Tāpanekale.

⁹‘A ia ko e fakatātā ki he kuonga ‘oku lolotonga ni, pea hangē ko ia ‘oku lolotonga ‘atu ‘a e ngaahi me‘a‘ofa mo e ngaahi feilaulau, ‘a ia ‘oku ‘ikai ha‘anau mafai ke fakahaohaoa fakakonisēnisi ‘a ia ‘oku lotu ‘aki ia.

¹⁰Ko e ngaahi me‘a ‘oku ō pē mo e ngaahi tō‘onga kai mo inu, mo e ngaahi papitaiso kehekehe, ko e koto tu‘utu‘uni fakakakano pē, ne hilifaki mai ke ‘Oua ke hoko ‘a e kuonga ‘o e Fakafo‘ou.

¹¹Ka ‘i he a‘u mai ‘a Kalaisi, ko e Taula‘eiki Lahi ‘o e ngaahi lelei ka hoko ni,[10] na‘a ne fou atu ‘i he Tāpanekale lahi mo haohaoa ange ko ē, ‘a ia ne ‘ikai ngaohi ‘e he nima, ‘e ia ko e pehē na‘e ‘ikai ‘o e ‘ūnivēsi ko eni,

¹²‘uma‘ā ha‘ane ‘alu ‘aki ‘a e toto ‘o e kosi mo e kafi, ka ‘aki hono ta‘ata‘a ‘o‘ona pē, ‘o ne hū ai ke tātu‘otaha ki he Potu Toputapu na, ‘o ne lava‘i ai ha huhu‘i ta‘engata.

¹³He kapau ā na‘e lava ‘e he toto ‘o e fanga kosi mo e fanga pulu mo e efuefu ‘o ha pulu fefine, ‘i hono luluku ‘aki ‘a e kakai kuo ta‘ema‘a — kapau na‘e lava ‘e ia ke fakama‘a ‘a e kakano.

¹⁴Huanoa ‘a e ta‘ata‘a ‘o Kalaisi, ‘a ia na‘a ne ‘oatu ‘e ia ia ta‘ehano mele ki he ‘Otua, fai ‘e ha laumālie laui ‘ītāniti — huanoa ‘ene fakama‘a ‘e he ta‘ata‘a ko ia hotau konisēnisi mei he ngaahi ngāue mate, ke tau tauhi ‘a e ‘Otua ‘oku mo‘ui.

¹⁵Pea ko hono ‘uhinga ia ‘oku ne nofo ko e Fakalaloa ‘o e Fuakava Fo‘ou: koe‘uhi ‘i he fai ‘o ha mate mo‘o huhu‘i ‘o e ngaahi angahala ne hoko lolotonga ‘a e ‘uluaki fuakava, kae toki ma‘u ‘e kinautolu kuo ui ‘a e palōmesi, ko e tofi‘a ta‘engata.

¹⁶He ka ai ha fuakava kuo fai, kuo pau ke kau ai ‘a e mate ‘o ia ne ne fai ia.

¹⁷He ‘oku mamafa ha fuakava ‘oka ō mo e mate ha ni‘ihi: he ‘anefē ia ha ma‘u ha fuakava, ka ‘oku mo‘ui ‘a ia na‘a ne fai?

¹⁸Ko ia ai, na‘a mo e ‘uluaki fuakava[11] na‘e ‘ikai fokotu‘u ta‘eha toto.

¹⁹He hili hono lea‘aki ‘e Mōsese ‘a e tu‘utu‘uni takitaha, ‘o fakatatau ki he Lao, ‘i he ‘ao ‘o e kakai kotoa pē; na‘a ne to‘o ‘a e toto ‘o e fanga kafi mo e fanga kosi, mo e vai, mo e fulufulu‘i sipi kula, mo e va‘a ‘īsope, ‘o ne luluku ‘aki ia ‘a e tohi foki, mo e kakai kotoa pē,

²⁰‘o ne pehē, Ko eni ‘a e toto ‘o e fuakava, ‘a ia kuo tu‘utu‘uni ma‘amoutolu ‘e he ‘Otua.

²¹Kae‘uma‘ā na‘a ne luluku pehē foki ‘a e Tāpanekale, mo e nāunau kotoa ‘o e lotu, ‘aki ‘a e toto:

²²‘io, ‘i he tu‘utu‘uni ‘a e Lao ‘oku ‘ikai mei ai ha me‘a ka ‘oku fakama‘a ‘aki ‘a e toto: pea ka ‘ikai ha lilingi toto, ‘oku ‘ikai ha fakamolemole.

²³‘Āua, tā na‘e pau ke fakama‘a ‘aki ‘a e ngaahi me‘a pehē ‘a e ngaahi fakatātā ‘o e ngaahi me‘a ‘i he langi; ka ke fai‘aki ha feilaulau lelei hake ‘i hena ki he ngaahi me‘a tonu fakalangi.

²⁴He tala‘ehai kuo hū ‘a Kalaisi ki he Potu Toputapu ne ngaohi ‘e he nima, ko e fakatātā pē ‘o e mo‘onia, ka ki he langi tonu, ke fakahā ni ia ki he fofonga ‘o e ‘Otua ma‘atautolu.

²⁵Kae‘uma‘ā na‘e ‘ikai te ne hū ke ne ‘oatu tu‘o lahi ia, ‘o hangē ko e hū ‘a e kau Taula‘eiki Lahi ki he Potu Toputapu ‘i he ta‘u kotoa pē ‘aki ha toto kehe.

²⁶He ka ne pehē, pea tā ne pau ke to‘o lahi hono feia talu e tanu pou ‘o māmani: ka ‘i hono anga ko eni, kuo tātu‘otaha ‘ene hā ‘i he faka‘osi ‘o e ngaahi kuonga, ke tāmate‘i ‘a e angahala ‘aki ‘ene feilaulau ‘a‘ana.

²⁷Pea hangē kuo tu‘utu‘uni ki he kakai ke mate tātu‘otaha pē, pea hili ia ko e fakamaau pē;

²⁸pehē foki mo e Mīsaia, ko e me‘a ‘i hono ‘oatu tātu‘otaha ke fua ‘a e angahala ‘o e tokolahi, ko ia te ne toe hā, ta‘eha angahala, ki he kakai ‘oku nofo‘aki tali kiate ia, mo‘onau fakamo‘ui.