Read KO E TOH TAPU KATOA TONGA Sēmisí 1 Bible Online

Sēmisí 1 - KO E TOH TAPU KATOA TONGA bible

Sēmisí 1

¹TŪ ko au sēmisi, ko e tamaio‘eiki ‘a e ‘Otua mo e ‘Eiki ko Sīsū Kalaisi, ko ‘eku tohi ki he matakali ‘e hongofulu mā ua ‘oku nofo movetevete: ‘ofa atu.

²Si‘oku kāinga, mou lau ko e koto fakafiefia ‘oka mou ka tō ki he ngaahi ‘ahi‘ahi kehekehe;

³ko ho‘omou ‘ilo, ko e sivi ‘o ho‘omou tui ‘oku ne fakatupu ‘a e kātaki.

⁴Pea ko eni, tuku ke fai ‘e kātaki ‘ene ngāue ke haohaoa, koe‘uhi ke mou haohaoa, mo tu‘u kakato, ‘o ta‘emasiva ‘i ha me‘a.

⁵Ka ‘o kapau ko e poto ‘oku masiva ai ha taha, ke ne kole mei he ‘Otua, ‘a ia ‘oku ne foaki ‘ata‘atā pē ki he kakai kotoa pē, ‘o ‘ikai ‘atu mo e lau; pea ‘e foaki ia ki ai.

⁶Ka ke ne kole tui pē, ‘o ‘oua ‘e tāla‘a. He ko ia ‘oku tāla‘a ‘oku ne hangē ko e peau ‘o e tahi ‘oku fakateka ‘o fepālekina ‘e he matangi.

⁷‘Io, ke ‘oua na‘a mahalo ‘e he tangata ko ia te ne ma‘u ha me‘a mei he ‘Eiki.

⁸Ko e tangata lotolotoua ia, ta‘emaau ‘ene anga kotoa pē.

⁹Pea ko eni, ke vīkiviki si‘i tokoua lotu ‘oku mā‘ulalo ‘oka hākeaki‘i ia:

¹⁰ka ko si‘i koloa‘ia ‘oka fakatōkilalo‘i: he ‘oku hangē ko e fisi‘i mohuku ‘ene mole ‘a‘ana.

¹¹He na‘e hopo ‘a e la‘ā mo ‘ene faka‘a‘afu, pea mae ‘a e mohuku, pea ngangana hono fisi, pea mole hono matamatalelei. ‘E pehē pē foki ‘a e kekena ‘a si‘i koloa‘ia, ‘oka fai atu hono ‘alunga ko ia.

¹²Monu‘ia ā ka ko e tangata ‘oku ne kātaki ha ‘ahi‘ahi: he ‘oka ‘osi hono sivi, te ne ma‘u ai ‘a e kalauni ‘o e mo‘ui, ‘a ia kuo ne tala‘ofa kiate kinautolu ‘oku ‘ofa kiate ia.

¹³Ke ‘oua na‘a lau ‘e ha toko taha ‘Oka ‘ahi‘ahi‘i, ‘Oku mei he ‘Otua hoku ‘ahi‘ahi‘i: he ko e ‘Otua ‘oku ‘ikai ma‘ahi‘ahi‘i ‘e he kovi, pea ‘oku ‘ikai ke ‘ahi‘ahi‘i ha taha ‘e He‘ene ‘Afio.

¹⁴Ka ‘oku ‘ahi‘ahi‘i ‘a e tangata takitaha he tohoaki ia ‘e he‘ene holi ‘a‘ana, mo taki ‘aki ha mounu.

¹⁵Faifai pea tu‘itu‘ia ‘a e holi ko ia, ‘o ne fanau‘i ha angahala: pea ko e angahala ko ia, ‘oka kakato, ‘oku ne fā‘ele‘i ‘a e mate.

¹⁶Si‘oku kāinga ‘ofa‘anga, ‘oua te mou hē.

¹⁷‘Ilonga ha foaki lelei, pea ‘ilonga ha me‘a‘ofa haohaoa, ko e ‘alu hifo pē ia mei he Tamai ‘a e ngaahi maama, ‘a ia ‘oku ‘ikai ‘i He‘ene ‘Afio ha feto‘oaki, pe ko ha nenefu tupu ‘i ha‘ane liliu.

¹⁸Koe‘uhi ko hono finangalo pē ‘o‘ona na‘a ne fakatupu ai ‘a kitautolu ‘aki ‘a e folofola ‘o e mo‘oni, koe‘uhi ke tau hoko ko e polopolo tokua ‘o e ngaahi me‘a kuo ne ngaohi.

¹⁹Seuke, ‘oku mou lāu‘ilo pē, si‘oku kāinga ‘ofeina: ka ke vave ‘a e tangata fua pē he fanongo, kae fakatotoka ki he lea, pea fakatotoka ki he ‘ita.

²⁰He ko e ‘ita ‘a e tangata ‘oku ‘ikai te ne ngāue ki he mā‘oni‘oni faka‘otua.

²¹Ko ia, mou hiko ‘a e veve kotoa pē, mo e ngaoha‘a ‘o e lotokovi, ‘o mou tali anga vaivai ‘a e folofola kuo tō, ‘a ia ‘oku mafai ke fakamo‘ui homou laumālie.

²²Ka mou hoko ko e kau fai ki he folofola, ‘o ‘ikai ko e kau fanongo pē, ‘o mou kākaa‘i kimoutolu.

²³He ka ai ha taha, ‘a ia ko ha fanongo pē ki he folofola, ka ko ha ta‘efai ki ai, ‘oku tatau ia mo ha siana ‘oku ne fakasio ki he fōtunga na‘e tupu mo ia ‘i ha sio‘ata:

²⁴he kuo ne fakasio leva kiate ia, pea ne ‘alu, pea ngalo leva pe ko e hā hono anga.

²⁵Ka ko ia ‘oku ne fakasio hifo ki he lao haohaoa, ‘a e lao tau‘atāina, ‘o ne ta‘utu ai, kae‘uma‘ā ‘oku ‘ikai te ne hoko ko ha taha fanongo kae ngalo, ka ko ha taha fai ngāue, ‘ē, ‘e monū‘ia ‘a e toko taha ko ia ‘i he‘ene fai.

²⁶Ka ai ha taha ‘oku lau ko e lotu ia; ‘osi, ‘oku ‘ikai te ne ‘ai piti hono ‘elelo, ka neongo ia ka ‘oku ne kākaa‘i pē hono loto, ‘ē, ko e lotu ‘a e toko taha ko ia ko e launoa,

²⁷Ko eni ia ‘a e tō‘onga lotu ‘oku ma‘a mo ta‘ehano ‘uli ‘i he ‘afio ‘a e ‘Otua ko ‘etau Tamai, ‘a ‘ete ‘a‘ahi ki he fa‘ahinga mātu‘a mate mo e kau uitou ‘i he‘enau mamahi, ‘a ‘ete tauhi kita mei māmani ke ta‘ehato ‘ila.