Read KO E TOH TAPU KATOA TONGA Sēmisí 2 Bible Online

Sēmisí 2 - KO E TOH TAPU KATOA TONGA bible

Sēmisí 2

¹SI‘OKU kāinga, ke ‘oua na‘a taka filifilimānako ho‘omou fai‘aki ‘a e tui hotau ‘Eiki ko Sīsū Kalaisi, ‘a e ‘Eiki ‘oku ‘a‘ana ‘a e lāngilangi.

²He vakai, kapau ‘e hū ki homou falelotu ha matāpule ‘oku fuhi ai ‘a e mama koula, pea kofu ngingila, pea hū ki ai foki ha masiva ‘oku kofu fakalielia;

³pea ‘oku mou tokanga leva kiate ia ‘oku ‘ai ‘a e kofu ngingila na, pea mou pehē, Sī, me‘a mai koe ki he potu ‘a hou‘eiki; ka ke pehē ki si‘i masiva, Tu‘u atu koe hena, pe nofo ki lalo ‘i hoku tu‘ungava‘e ni.

⁴‘Ē, ‘ikai ne taka fakata‘eta‘etui ho‘omou me‘a, ‘o mou hoko ko e kau fakamaau fifili kovi?

⁵Fanongo mai, si‘oku kāinga ‘ofa‘anga, ‘ikai na‘e fili ‘e he ‘Otua ‘a kinautolu ‘oku masiva ‘i māmani ke koloa‘ia ‘i he tui, pea ke ‘ea ki he pule‘anga na‘a ne tala‘ofa kiate kinautolu ‘oku ‘ofa kiate ia?

⁶Ka ko kimoutolu kuo mou fakalielia‘i ‘a si‘i masiva na. ‘Ikai ko e kau koloa‘ia ia ‘oku nau fakapōpula‘i kimoutolu, mo nau toho ‘a kimoutolu ki he ngaahi fakamāu‘anga?

⁷‘Ikai ko kinautolu ia ‘oku nau talakaa‘i ‘a e huafa lelei ko ia, ‘a ia ‘oku ui ‘aki kimoutolu.

⁸‘Io, kapau mo‘oni ko ho‘omou tauhi ke haohaoa ‘a e lao fakatu‘i na, ‘o fai ki he potu tohi ko ia, Te ke ‘ofa ki ho kaungā‘api ‘o hangē ko ho‘o ‘ofa kiate koe, tā ‘oku mālō ho‘omou ngāue:

⁹ka ‘o kapau ‘oku mou filifilimānako, ko e angahala ia ‘oku mou fai, he ‘oku faka‘ilo kimoutolu ‘e he lao ko ia ko e talangata‘a.

¹⁰He ko ia kuo ne tauhi hono kotoa ‘o e lao, ka ne humu ‘i ha me‘a ‘e taha, kuo ne mo‘ua ki hono kotoa.

¹¹He ko ia na‘a ne folofola mai, ‘Oua na‘a ke tono ‘unoho, na‘a ne pehē foki, ‘Oua na‘a ke fakapō. Pea neongo ‘oku ‘ikai te ke tono ‘unoho, ka ke fakapō pē, kuo ke hoko ko e maumau lao.

¹²‘Ē, ke pehē ho‘omou lea, pea pehē ho‘omou ngāue, ke taau mo ha kakai ‘oku ene honau fakamaau ‘aki ‘a e lao tau‘atāina.

¹³He ‘e fai ta‘emeesi ‘a e fakamaau kiate ia na‘e ‘ikai fai meesi. ‘Oku luki ‘a meesi ki he fakamaau.

¹⁴Si‘oku kāinga, ko e hā tū hano ‘aonga ‘a e pehē ‘e ha taha, ‘oku ne tui; ‘osi, ‘oku ‘ikai hā ai ha ngāue? ‘e mafakamo‘ui ia ‘e he‘ene tui ko ia?

¹⁵Ko eni, kapau ‘e masiva kofu ha tangata lotu, pe ha fine lotu,

¹⁶mo ‘ikai ‘aupito ma‘u si‘a me‘a tokoni pea ka pehē ange ‘e hamou toko taha, ‘Alu ā, ‘oku fai pē homou fakamāfana, ‘oku fai pē homou fakamākona; ka ‘oku ‘ikai te mou ange ‘a e ngaahi me‘a ‘oku tangi ki ai ‘a e sino; ko e hā hono ‘aonga, ‘ō?

¹⁷Pehē foki ‘a e tui, kapau ‘oku ‘ikai ke ō mo e ngāue, ‘oku mate pē ia, he‘ene tu‘u taha.

¹⁸Kuo pau ke pehē atu ‘e ha taha, Ko ho‘o me‘a tokua ‘a e tui, ka ko ha‘aku ‘a e ngaahi ngāue: pe‘i faka‘ali‘ali mai ho‘o tui ‘ata‘atā mo e ngaahi ngāue, ka u faka‘ali‘ali atu ‘eku tui he hā ‘i he‘eku ngaahi ngāue.

¹⁹‘Oku ke tui, ‘oku taha pē ‘a e ‘Otua; ‘io, mālō ia: pea ‘oku tui pehē mo e kau tēvolo, pea nau tetetete.

²⁰Ka ‘oku ke loto ke mahino atu koā, siana ta‘eloto, ‘a e ka‘anga[1] ‘a e tui ‘oku ta‘eō mo e ngaahi ngāue?

²¹‘Ē, ‘ikai na‘e fakatonuhia ‘etau kui ko ‘Epalahame mei he ngaahi ngāue, he‘ene ‘oatu ‘a ‘Aisake ko hono foha, ‘o hilifaki ki he ‘ōlita?

²²‘Oku ke vakai, ko ‘ene tui na‘e ngāue fakataha mo ‘ene ngaahi ngāue, pea ko ‘ene ngaahi ngāue na‘e fakahaohaoa mei ai ‘ene tui:

²³pea na‘e fakamo‘oni ‘a e folofola na‘e pehē, Pea na‘e tui ‘a ‘Epalahame ki he ‘Otua, pea na‘e lau ia ma‘ane mā‘oni‘oni: pea na‘e ui ia ko e Takanga ‘o e ‘Otua.

²⁴Vakai ā, ‘oku fakatonuhia ‘a e tangata mei he ngaahi ngāue, ‘o ‘ikai mei he tui pē.

²⁵Pea pehē foki, ‘Ikai na‘e fakatonuhia ‘a Lēhapi fe‘auaki mei he ngāue, he‘ene tali ‘a e ongo talafekau, ‘o ne fakato‘oto‘o ‘ena ō ‘i ha hala kehe?

²⁶He hangē ā ‘oku mate ‘a e sino ‘oka mavahe mei he laumālie, pehē foki ‘oku mate ‘a e tui ‘oka mavahe mo e ngāue.