Read KO E TOH TAPU KATOA TONGA Sēmisí 4 Bible Online

Sēmisí 4 - KO E TOH TAPU KATOA TONGA bible

Sēmisí 4

¹‘OKU mei fē ‘a e ngaahi tau, pea mei fē ‘a e ngaahi fetu‘usi ‘oku ‘iate kimoutolu? ‘Ikai ‘oku nau tupu mei he me‘a ni, ‘io, mei he ngaahi holi kovi, ‘a ia ‘oku fai tau ‘i homou ngaahi kupu?

²‘Oku mou holi me‘a, ‘o ‘ikai ma‘u; ‘oku mou fai fakapō ai, ‘o meheka, ka ‘oku ‘ikai te mou lava ke ma‘u; ‘oku mou fetu‘usi leva ‘o tau. ‘Ā, ‘oku ‘ikai te mou ma‘u koe‘uhi ‘oku ‘ikai te mou kole:

³‘oku mou kole, pea ‘oku ‘ikai te mou ma‘u, koe‘uhi ā ‘oku mou kole kovi, he ko e fai pē ke tauhi ‘aki ho‘omou ngaahi holi kovi.

⁴‘a e koto tono tangata, ‘ikai ‘oku mou ‘ilo, ko e takaua mo māmani ko e fakafili ia ki he ‘Otua? Ko ia, ‘ilonga ‘a ia ‘oku loto ke takaua mo māmani ‘oku ne nofo ai ko e fili ‘o e ‘Otua.

⁵‘Io, ‘oku mou pehē koā ko e launoa ‘a e folofola ko ia, ‘a ia ‘oku ne pehē, Ko e Laumālie kuo ne tuku ke nofo ‘iate kitautolu ‘oku ne feinga‘i kitautolu, ‘o a‘u ki he fua‘a?[2]

⁶Ka ‘oku lahi ange ai ‘ene foaki kelesi. Ko ia ai, ‘oku ne pehē, ‘Oku tali teke‘i ‘e he ‘Otua ‘a e ‘afungi, ka ‘oku ne foaki kelesi ki he anga vaivai.

⁷Ko ia, mou fakavaivai‘i kimoutolu ki he ‘Otua. Ka mou tali teke‘i ‘a e Tēvolo, pea te ne hola meiate kimoutolu.

⁸‘Unu‘unu atu ki he ‘Otua, pea ‘e ‘unu‘unu mai ia kiate kimoutolu. Fakama‘a homou nima, ‘a kau angahala; pea fakatāpui ‘a homou loto, ‘a kau siosio ua.

⁹Mou fakamamahi, mo to‘e, mo tangi: ke liliu ho‘omou kata ko e to‘e, mo ho‘omou fiefia ko e fakamāmāhu‘i.

¹⁰Fakavaivai‘i kimoutolu ‘i he ‘ao ‘o e ‘Eiki, pea te ne hākeaki‘i kimoutolu.

¹¹Kāinga, ‘oua te mou felau‘ikovi‘aki. Ko ia ‘oku ne lau‘ikovi hono tokoua, pe ‘oku anga‘i hono tokoua, ‘oku ne lau‘ikovi ‘a e Lao, pea anga‘i ‘a e Lao: ka ‘o kapau ‘oku ke anga‘i ‘a e Lao, tā ‘oku ‘ikai ko ha fai ki he Lao koe, ka ‘oku ke fakamaau ia.

¹²‘Oku taha pē ‘a e Fokotu‘u-lao, mo e Fakamaau, ‘a ‘Ene ‘Afio ‘oku ne mafai ke fakamo‘ui, pea ke faka‘auha: ko hai tū koe ke ke anga‘i ho kaungā‘api?

¹³Me‘a mai ‘eni, ‘a kimoutolu ‘oku lau, ‘o pehē, Ko e ‘aho ni, pe ko e ‘apongipongi, te mau fononga ki he kolo ko ē, pea mau nofo ai ‘o ta‘u kātoa, pea te mau fai fakatau ai ‘o ngaohi pa‘anga: ‘osi, ‘oku ‘ikai te mou ‘ilo ‘a e me‘a ‘o e ‘apongipongi.

¹⁴He ko e hā tū ho‘omou mo‘ui? Ko e mao pē kimoutolu, ‘a ia ‘oku hā fuoloa si‘i, pea toki mole foki.

¹⁵‘Ē, na‘a mou mei pehē, Kapau ko e finangalo ‘o e ‘Eiki te mau mo‘ui, ‘o fai ‘a ē mo ē.

¹⁶Ka ‘i hono anga ko ia, ‘oku tu‘unga ho‘omou pōlepole ‘i ho‘omou ‘afungi: ko e alā pōlepole pehē ‘oku kovi.

¹⁷Ko ia ‘oku ne ‘ilo ha lelei ke fai ka ‘oku ‘ikai fai, ko ha‘ana angahala ia.