Read KO E TOH TAPU KATOA TONGA Sēmisí 5 Bible Online

Sēmisí 5 - KO E TOH TAPU KATOA TONGA bible

Sēmisí 5

¹ME‘A mai ‘eni, ‘a ha‘a koloa‘ia, fei mo tangi, ‘o ‘oiauē fakapō ‘i ho‘omou ngaahi mamahi ‘oku tu‘unuku mai.

²Kuo popo ho‘omou koloa, pea kuo anea ho‘omou ngaahi kofu.

³Kuo ‘osi ‘ume‘umea ho‘omou koula mo e siliva; ‘io, ko hono ‘ume‘umea te ne talatalaaki‘i kimoutolu, pea te ne keina homou kakano ‘o hangē ko e afi. Kuo mou fa‘oaki koloa ‘i he kapa ‘o e kuonga.

⁴Ko ena ‘a e totongi ‘o e kau ngāue na‘e utu homou ta‘u, ‘a ia kuo ta‘ofi meiate kinautolu: ‘oku kaila ia meiate kimoutolu; kae‘uma‘ā ko e tangi ‘a e kau tu‘usi kuo tau atu ki he fofonga ‘o e ‘Eiki Sāpaoti.

⁵Kuo mou mo‘ui fakahāuē ‘i māmani, mo fakausousa; kuo mou fangapesi homou loto ‘i he ‘aho tāmate‘i.

⁶Kuo mou fakahalaia, kuo mou fakapoongi ‘a e angatonu; tala‘ehai ‘oku ne talitu‘u kiate kimoutolu.[3]

⁷Ko ia, kāinga, mou kātaki pē ‘o a‘u ki he hoko mai ‘a e ‘Eiki. Vakai, ‘oku nofo‘aki tali ‘a e fa‘a ki he fua mahu‘inga ‘o e kelekele; pea ‘oku ne kātaki hono tauhi, kae‘oua ke tō ki ai ‘a e ‘uha mu‘a mo e ‘uha mui.

⁸Ke mou kātaki mo kimoutolu; poupou homou loto: he kuo ofi ‘a e hoko mai ‘a e ‘Eiki.

⁹Kāinga, ‘oua te mou felāunga‘aki, na‘a fakamaau? kimoutolu: ko ena ‘a e fakamaau ‘oku tu‘u ‘i he matapā.

¹⁰Si‘oku kāinga, kapau ‘oku mou fiema‘u ha fa‘ifa‘itaki‘anga ‘o e mamahi mo e kātaki, ko e kau Palōfita ‘ena, ‘a ia na‘a nau lea ‘i he huafa ‘o e ‘Eiki.

¹¹Vakai, ‘oku mau lau ko e monū‘ia ‘a kinautolu kuo kātaki, Kuo mou fanongo ki he kātaki ‘a Siope; mou vakai foki hono iku‘anga mei he ‘Eiki: tā ‘oku ‘ofa u‘uu‘u ‘a e ‘Eiki, mo ‘ofangofua.

¹²Ka sinoeme‘a, si‘oku kāinga, ‘oua te mou lea tuki; pe ki he langi, pe ki he fonua, pe ki ha me‘a ‘e taha: ka ke ‘Io pē ho‘omou ‘io, mo ‘Ikai pē ho‘omou ‘ikai; koe‘uhi ke ‘oua te mou mo‘ua ‘i he fakamaau.

¹³‘Oku ngaohikovia koā hamou taha? Ke ne lotu pē. ‘Oku loto fiefia ha taha? Ke ne fai ha hiva.

¹⁴‘Oku ‘i ai hamou taha ‘oku mahaki? Ke ne ui ange ‘a e kau mātu‘a[4] ‘o e siasi; pea te nau lotua ia, ‘o tākai ‘aki ‘a e lolo ‘i he huafa ‘o e ‘Eiki.

¹⁵Pea ko e lotu ‘a tui te ne fakamo‘ui ‘a e mahaki, pea ‘e fokotu‘u ia ‘e he ‘Eiki; pea neongo kuo ne fai ha angahala, ka ‘e fakamolemole ia.

¹⁶Ko ia, mou fevete‘aki ho‘omou ngaahi angahala, pea fehūfia‘aki; koe‘uhi ke mou mo‘ui. Ko e lotu fakamātoato ‘a e tangata mā‘oni‘oni ‘oku ‘aonga lahi.

¹⁷Ko ‘Ilaisiā ko e tangata alāanga mo kitautolu, pea ne mātu‘aki lotu ke ‘oua na‘a ‘uha: pea na‘e ‘ikai tō ha ‘uha ki he fonua, ‘o ‘osi ha ta‘u ‘e tolu mo e māhina ‘e ono.

¹⁸Pea ne toe fai ‘ene lotu, pea na‘e tuku hifo ‘e he langi ha ‘uha, pea tupu mei he kelekele hono fua.

¹⁹Si‘oku kāinga, kapau ‘e taki hē hamou toko taha mei he mo‘oni, pea fakafoki mai ia ‘e ha taha;

²⁰ke mou ‘ilo pē, ko ia kuo ne fakafoki mai ha angahala mei he‘ene ‘alu hē, ko ‘ene fakahaofi ha laumālie[5] mei he mate, mo ne ‘ufi‘ufi ha fu‘ufu‘unga angahala.