Read KO E TOH TAPU KATOA TONGA Pitá 1 1 Bible Online

Pitá 1 1 - KO E TOH TAPU KATOA TONGA bible

Pitá 1 1

¹TŪ ko au Pita, ko e ‘aposetolo ‘a Sīsū Kalaisi, ko ‘eku tohi ki he kakai fili ‘a ia ‘oku nau nofo movetevete ‘i Ponitō, Kalētia, Kapatōsia, ‘Ēsia, mo Pitinia,

²ko e fili ‘o fakatatau ki he mu‘aki ‘afio‘i ‘e he ‘Otua ko e Tamai, ‘i homou fakatāpui ‘e he laumālie ke iku ki he talangofua, mo e luluku ‘aki ‘a e ta‘ata‘a ‘o Sīsū Kalaisi. ‘Ofa ke fakalahi kiate kimoutolu ‘a e kelesi mo e fiemālie.

³Ha taha ā ke fakamālō‘ia, pe ko e ‘Otua mo Tamai ‘a hotau ‘Eiki ko Sīsū Kalaisi; ‘a ia, ‘i he lahi ‘o ‘ene meesi, na‘a ne fakatupufo‘ou kitautolu ke ma‘u ha ‘amanaki ‘oku mo‘ui, ko e me‘a ‘i he toetu‘u ‘a Sīsū mei he pekia;

⁴‘io, ke ma‘u ha tofi‘a ‘oku ta‘e‘auha mo ta‘emele mo ta‘emae, ‘a ia kuo ta‘ofia ‘i hēvani mo‘omoutolu;

⁵‘a kimoutolu ‘oku le‘ohia, he kāpui ‘e he māfimafi ‘a e ‘Otua ko e me‘a ‘i he tui, ke lava‘i ‘a e fakamo‘ui ‘a ia kuo ‘osi sāuni ke fakae‘a mai ‘i he kuonga fakamui.

⁶‘A ia ‘oku mou hākailangitau ai, neongo kuo fai nai ‘i he taimi ni, ‘o kapau na‘e ‘ikai ala ta‘ofi, homou fakamamahi fuonounou, he mo‘ua ‘i he ngaahi ‘ahi‘ahi kehekehe:

⁷koe‘uhi ā ke hā ho‘omou tui, ‘ene lava ke tu‘u ‘i he sivi — ‘a ia ko e me‘a mahu‘inga ange ‘i he koula, ‘a ē neongo ko e me‘a ‘auha, ka ‘oku ‘ahi‘ahi‘i ia ‘aki ‘a e afi — ‘io, ke hā ia kuo ne lava ‘a e fakamālō mo e lāngilangi‘ia mo e faka‘apa‘apa‘ia ‘i he fakapū mai ‘o Sīsū Kalaisi.

⁸‘A ia neongo kuo te‘eki te mou mamata ki ai, ka ‘oku mou ‘ofa ki ai; ‘a ia ai ‘i he taimi ni neongo ‘oku ‘ikai te mou mātā ia, ka ‘i ho‘omou tui ki ai, ‘oku mou hākailangitau ‘i he fiefia ‘oku ‘ikai malea‘aki, pea ‘oku fai hēvani;

⁹ho‘omou ma‘u ‘a e me‘a ‘oku hu‘u ki ai ho‘omou tui, ko e fakamo‘ui ‘o homou laumālie.

¹⁰‘a e fakamo‘ui ko ia na‘e ‘eke lahi mo fakatotolo atu ki ai ‘a e kau Palōfita, ‘a kinautolu na‘a nau kikite ki he kelesi na‘e ta‘ofi ma‘amoutolu:

¹¹he‘enau fakatotolo atu, pe ko e fē ia ‘a e kuonga, pea fakafēfē hono anga,[1] ‘a ia na‘e lau ki ai ‘e he Laumālie ‘o Kalaisi na‘e ‘iate kinautolu, he‘ene sinaki fakahā ‘a e ngaahi mamahi na‘e tu‘utu‘uni ma‘a Kalaisi, mo e ngaahi lāngilangi ‘e hoko ai.

¹²‘A kinautolu na‘e faka‘ilo ki ai, tokua na‘e ‘ikai ma‘anautolu, kae ma‘amoutolu ‘enau tokonaki ‘a e ngaahi me‘a ko ia ‘a ia kuo fakahā ‘i onopooni kiate kimoutolu, ‘iate kinautolu kuo nau malanga‘aki atu ‘a e Kōsipeli ‘aki ‘a e Laumālie Mā‘oni‘oni na‘e fekau hifo mei he langi — ‘a e ngaahi me‘a ‘oku holi ‘a e kau ‘āngelo ke fakasio hifo ki ai.

¹³Ko ia, mou ‘ai ‘a e no‘o ‘o homou loto, mo laka faka‘ehi‘ehi, pea mātu‘aki ‘amanaki ki he kelesi ‘oku ene hono ‘omi ‘i he fakapū mai ‘o Sīsū Kalaisi.

¹⁴Fai ‘o ngali mo ha fānau talangofua, ‘o ‘oua te mou tuku kimoutolu ke anga ki ho‘omou ngaahi holi mu‘a, fai ‘i he ta‘e‘ilo;

¹⁵ka mou anga ki he Toko Taha Mā‘oni‘oni ne ne ui kimoutolu, ‘o mou hoko kimoutolu foki ko e mā‘oni‘oni ‘i ho‘omou tō‘onga kotoa pē:

¹⁶koe‘uhi kuo tohi ‘o pehē, Te mou mā‘oni‘oni, he ‘oku ou mā‘oni‘oni.

¹⁷Pea kapau ā ‘oku mou tautapa kiate ia ‘oku ne fakamaau ta‘efilifilimānako, kae fakatatau ki he ngāue ‘a e tangata takitaha, ‘o mou lau ko ho‘omou Tamai ia, pea mou fai manavahē pē ho‘omou fakafeangai lolotonga ho‘omou ‘āunofo ni:

¹⁸ko ho‘omou ‘ilo, na‘e ‘ikai fai‘aki ‘a e ngaahi me‘a ‘auha, ha siliva pe ha koula, homou huhu‘i mei he anga ta‘e‘aonga ne tuku fakaholo mai mei he mātu‘a;

¹⁹ka na‘e fai‘aki ha ta‘ata‘a ma‘ongo‘onga, he ko e toto ‘o ha lami ta‘emele mo ta‘e‘ila, ko e ta‘ata‘a ‘o Kalaisi:

²⁰‘a ia ne mu‘aki tu‘utu‘uni ‘i he te‘eki tanu pou ‘a māmani, ka na‘e fakae‘a pē ‘i he faka‘osi ‘o ono‘aho koe‘uhi ko kimoutolu,

²¹‘a kimoutolu ‘oku nofo ko e kau tui pīkitai ki he ‘Otua ‘iate ia, ‘a ‘Ene ‘Afio na‘a ne fokotu‘u ia mei he pekia, mo ne ‘ange kiate ia ke lāngilangi‘ia: ko ia ‘oku sio ki he ‘Otua ‘a ho‘omou tui mo ho‘omou ‘amanaki foki.

²²Ko eni kuo mou fakatāpui homou laumālie ‘i he fai talangofua ki he mo‘oni ke lava ‘a e fe‘ofa‘aki fakalotu ‘oku ta‘eloi, ko ia ke mou tōtōivi ho‘omou fai ‘ofa ‘a e taha ki he taha, ‘o fai mei he loto.[2]

²³He kuo fakatupufo‘ou kimoutolu, kae ‘ikai ‘aki ‘a e tenga ‘auha, ka ‘aki ‘a e tenga ta‘e‘auha, ‘o fou ‘i he folofola ‘a e ‘Otua ‘a ia ‘oku mo‘ui mo tolonga.

²⁴Koe‘uhi ā ‘oku hangē ko e mohuku ‘a e kakano kotoa pē, pea ko hono nāunau kotoa ‘oku hangē ko e fisi‘i mohuku. Kuo mae ‘a e mohuku, pea ngangana hono fisi;

²⁵ka ko e folofola ‘a e ‘Eiki ‘oku tolonga ‘o ta‘engata. Pea ko ia ia ‘a e folofola ne ‘atu kiate kimoutolu ‘i he malanga‘aki ‘o e Kōsipeli.