Read KO E TOH TAPU KATOA TONGA Pitá 1 2 Bible Online

Pitá 1 2 - KO E TOH TAPU KATOA TONGA bible

Pitá 1 2

¹KO IA, mou hu‘ihu‘i ‘a e loto kovi kotoa pē, mo e kākā kotoa pē, mo e fa‘a mālualoi, mo e fa‘a meheka, mo e fakakovi kotoa pē;

²pea mou fai ‘o hangē ko e fānau toki fā‘ele‘i, ‘o mou holi ki he hu‘akau fakaloto ‘oku ta‘ehu‘i, koe‘uhi ke mou tupu ai ke a‘usia ‘a e fakamo‘ui:

³‘o kapau mo‘oni ne mou kamata ‘oku sai ‘a e ‘Eiki.

⁴‘A ia ‘i ho‘omou ‘unu‘unu ki ai — ‘io, ki he Maka Mo‘ui, ‘a ia kuo fakatale‘i ‘e he tangata, ka ‘i he ‘Afio ‘a e ‘Otua ko e maka taunga fili, ko e maka mahu‘inga —

⁵pea mou tuku ke langa hake kimoutolu foki, he ko e koto maka mo‘ui, mo‘o fale fakalaumālie; ke mou hoko ko e tu‘unga taula‘eiki tapu, ke ‘atu feilaulau fakalaumālie, ‘a ia ‘oku hōifua ai ‘a e ‘Otua ‘ia Sīsū Kalaisi.

⁶Koe‘uhi ‘oku tu‘u ‘i ha potu folofola, Ko eni ‘oku ou ‘ai ‘i Saione, mo‘o maka tuliki lahi, ha maka kuo fili, ha maka mahu‘inga: pea ko ia ‘oku tui falala ki ai ‘e ‘ikai fakamaa‘i.

⁷‘Āua, tā ko hono mahu‘inga ‘oku ma‘amoutolu ‘oku tui: ka ki he kau talangata‘a, Ko e maka ne fakatale‘i ‘e he kau tufunga Kuo hoko ‘o tuliki tau‘olunga: Ko e maka tūkia‘anga foki, mo e makatu‘u fakatupu fifisi —

⁸‘a e fa‘ahinga ‘oku nau humu ‘i he‘enau talangata‘a ki he folofola, ‘a ia foki na‘e tu‘utu‘uni kinautolu ki ai.

⁹Ka ko kimoutolu ko e ha‘a fili, ko e tu‘unga taula‘eiki fakatu‘i, ko e kakai tapu, ko e fa‘ahinga ‘oku ma‘ane me‘a tonu, koe‘uhi ā ke mou ongoongoa atu ‘a e ngaahi lelei ‘o ‘Ene ‘Afio, ‘a ia na‘a ne ui mai kimoutolu mei he po‘uli ki he maama fakaofo ‘a‘ana:

¹⁰‘a kimoutolu ‘a ia ko e ‘ata‘i kakai ‘i mu‘a, ka ko eni ko e kakai ‘a e ‘Otua; ko e kakai na‘e ‘ikai fai ha meesi ki ai, ka ko eni kuo ma‘u meesi.

¹¹Si‘oku ‘ofa‘anga, ‘oku ou enginaki atu, ke mou fai ‘o ngali mo e ‘āunofo mo e muli, ‘o mou faka‘ehi‘ehi mei he ngaahi holi fakakakano; he ko e fa‘ahinga me‘a ia ‘oku fai tau ki he laumālie.

¹²‘O mou ‘ai ke taau ho‘omou fakafeangai ki he Senitaile; koe‘uhi, ‘i he me‘a ‘oku nau lau‘ikovi ai kimoutolu, tokua ko e faikovi, ke nau mamata ki ho‘omou ngaahi ngāue lelei, pea langa‘i ai ‘enau fakahīkihiki‘i ‘a e ‘Otua ‘i he ‘aho ‘o e ‘a‘ahi.

¹³Mou fakavaivai kimoutolu ki he tu‘unga kotoa pē kuo fokotu‘u ‘e he tangata, koe‘uhi ko e ‘Eiki:

¹⁴ki he tu‘i, he ko e mā‘olunga; ki he ngaahi kōvana foki, he ‘oku fou ‘iate ia honau fekau ke tautea ‘a e faikovi, kae fakamāloo‘i ‘a e failelei.

¹⁵He kuo tu‘utu‘uni pehē ‘a e ‘Otua, ke mou fakamo‘ulongoa ‘aki ho‘omou failelei ‘a e vale ‘a e kau siana ta‘eloto na.

¹⁶Fai ‘o ngali ko ha kau tau‘atāina, ‘o ‘ikai hangē ko ha kakai ‘oku ngāue‘aki ‘a e tau‘atāina ko e pulonga ‘o e lotokovi, kae ngali ko ha kau tamaio‘eiki ‘a e ‘Otua;

¹⁷ko ia mou faka‘apa‘apa ki he tangata takitaha; mou ‘ofa ki he ha‘a lotu; mou manavahē ki he ‘Otua; mou faka‘apa‘apa ai pē ki he tu‘i.

¹⁸‘a e kau sevāniti, mou anganofo ki he kakai ‘oku pule kiate kimoutolu, ‘o ‘apasia ‘aupito; ‘o ‘ikai kiate kinautolu pē ‘oku lelei mo fai faka‘atu‘i, ka ki he angakehe foki.

¹⁹He ko e me‘a ‘eni ‘e fakafeta‘ia, ‘a e kātaki ‘e ha taha ‘a e ngaahi fakamamahi ‘oku ‘ai ta‘etotonu kiate ia, koe‘uhi ko ‘ene ongo‘i ‘a e ‘Otua.

²⁰He kapau kuo mou fai angahala, pea tuki ai kimoutolu, ‘o mou ‘ūkuma pē, ko e hā ha ongoongo ‘e ma‘u? ka ‘o kapau ‘oku mou fai lelei kae ngaohikovia, ‘o mou ‘ūkuma pē, seuke, ko e me‘a ko ia ‘oku fakafeta‘ia mei he ‘Otua.

²¹‘Io, ko e me‘a ia na‘e ui kimoutolu ki ai: he na‘e kātaki mamahi ‘a Kalaisi foki koe‘uhi ko kimoutolu, ‘o ne tuku ha fa‘ifa‘itaki‘anga kiate kimoutolu, ke mou muimui ofi, ‘o topuva‘e taha mo ia.

²²‘A ia na‘e ‘ikai te ne momo‘i fai ha angahala, pe ne ‘ilo ha kākā ‘i hono fofonga:

²³‘a ia ‘i hono leakovia na‘e ‘ikai te ne tali ‘aki ha leakovi; ‘i hono ngaohikovi‘i na‘e ‘ikai te ne fakamana; ka ne tuku ia kiate ia ‘oku fakamaau totonu:

²⁴‘a ia na‘a ne fua ‘a e ngaahi angahala ‘atautolu, ‘e ia, ‘i hono sino, ‘i he ‘akau; koe‘uhi ‘i he‘etau mate ki he‘etau ngaahi angahala, ke tau mo‘ui ki he mā‘oni‘oni: ‘a ia ko hono kafo ne mei ai homou faito‘o.

²⁵He na‘a mou nofo hē hangē ko e fanga sipi; ka ko eni kuo mou foki ki he Tauhi mo Le‘ohi ‘o homou laumālie.