Read KO E TOH TAPU KATOA TONGA Pitá 1 3 Bible Online

Pitá 1 3 - KO E TOH TAPU KATOA TONGA bible

Pitá 1 3

¹PEHĒ foki, ‘a e kau fefine, mou anganofo ki homou ngaahi husepāniti; koe‘uhi ka ai ha ni‘ihi ‘oku talangata‘a ki he folofola, hei‘ilo ‘e ma‘u mai kinautolu ‘aki ‘a e ngaahi tō‘onga ‘a honau ngaahi uaifi, kae ‘ikai ‘aki ha lea;

²he‘enau mamata ki he ma‘a ‘o ho‘omou fakafeangai mo taka ‘apasia.

³Pea ko e teu ‘o e fa‘ahinga ko ia ke ‘oua na‘a ko e teu ‘i tu‘a — ko e fī ‘o e ‘ulu mo e ‘ai ‘o e koula mo e tui ‘o e ngaahi kofu —

⁴ka ke nau teu ‘aki ‘a e tangata fufū ‘o e loto, ‘io, ‘aki ‘a e me‘a ta‘e‘auha ko e anga vaivai mo e anga malū, ‘a ia ko e me‘a mahu‘inga ‘aupito ‘i he ‘afio ‘a e ‘Otua.

⁵He na‘e pehē foki ‘a e teu ‘a e kau fefine mā‘oni‘oni ‘i mu‘a, ‘a ia na‘e tu‘u ‘enau falala ki he ‘Otua; he na‘a nau anganofo ki honau ngaahi husepāniti.

⁶Hangē ko Sela na‘a ne talangofua kia ‘Epalahame, ‘o ne ui ia ko hono ‘eiki, ‘a ia kuo mou hoko ko ‘ene fānau, kapau ‘oku mou failelei, pea kapau ‘oku ‘ikai te mou manavahē ‘i ha manavahē kovi.

⁷Pehē foki mo kimoutolu tangata, ko ho‘omou nonofo mo e fefine ke fai fakakaukau‘i, he ko e hama vaivai; ‘o mou tu‘utu‘uni hanau faka‘apa‘apa, ‘o taau mo ha kakai ‘oku nau kaungā ‘ea foki mo kimoutolu ki he kelesi ko e mo‘ui; koe‘uhi ke ‘oua na‘a ta‘ofi ho‘omou ngaahi lotu.

⁸Pea ko ‘eku lea faka‘osi; ke mou uouangataha, ke mou tau‘aki kaungā mamahi, ke mou fe‘ofa‘aki fakalotu, ke mou manava‘ofa, ke mou anga vaivai:

⁹‘o ‘oua te mou totongi ‘a e kovi ‘aki ‘a e kovi, pe ko e leakovi ‘aki ‘a e leakovi, kaekehe mou tāpuaki‘i; he na‘e fakaului kimoutolu ki he me‘a ko eni, ke tō mo‘omoutolu ha tāpuaki.

¹⁰He, Ko ia ‘oku loto ke ‘ofa ki he mo‘ui, Pea ke ‘ilo ha ngaahi ‘aho lelei, Ke ne ta‘ofi hono ‘elelo mei he kovi, Mo hono loungutu ke ‘oua ‘e lea‘aki ‘a e kākā,

¹¹Pea ke ne faka‘ehi‘ehi mei he kovi, Ka ne fai ‘a e lelei; Ke ne kumi ki he melino, ‘Io, ‘o tuli ki ai.

¹²He ko e ongo fo‘i fofonga ‘o e ‘Eiki ‘Oku na siofi ‘a e mā‘oni‘oni; Pea ko hono ongo telinga ‘Oku fakafanongo ki ha‘anau lotu: Ka ko e fōtunga ‘o e ‘Eiki, ‘Oku ne hanga ki he kau faikovi.

¹³Pea ko hai tū ‘e ngaohikovi‘i kimoutolu, ‘o kapau ‘oku mou mamahi‘i ‘a e lelei?

¹⁴‘Io, pea neongo te mou mo‘ua ‘i he ngaahi mamahi koe‘uhi ko e mā‘oni‘oni, ka ‘oku mou monū‘ia ai pē. Kae ‘oua te mou manavahē ‘aki ‘a e manavahē ‘anautolu, ‘uma‘ā ha‘amou puputu‘u.

¹⁵Ka mou ‘ai ke tāpuhā ‘a Kalaisi ‘i homou loto, ko e ‘Eiki pē ia: ‘o mou ‘osi teu ai pē ke fai ha fakamatala kiate ia fua pē te ne ‘eke kiate kimoutolu ‘a e ‘uhinga ‘o e ‘amanaki ‘oku mou ma‘u; kae fai ‘i he anga vaivai mo e tailiili, kuo ‘ata‘atā homou konisēnisi;

¹⁶koe‘uhi ‘i he me‘a ‘oku nau lau‘ikovi ai kimoutolu, ke nau mā ‘a kinautolu ‘oku tukuaki‘i ho‘omou tō‘onga lelei faka-Kalaisi.

¹⁷He ‘oku lelei mu‘a ke mou mo‘ua ‘i he mamahi koe‘uhi ko e failelei, ‘o kapau ‘oku finangalo pehē ‘e he ‘Otua, ‘i ha‘amou mo‘ua pehē, ko ha faikovi.

¹⁸He ko Kalaisi foki na‘a ne mo‘ua mamahi[3] tu‘o taha koe‘uhi ko e ngaahi angahala, ko e angatonu ma‘a e ta‘eangatonu, koe‘uhi ke ne fakaofiofi ‘a kitautolu ki he ‘Otua; pea na‘e tāmate‘i ‘i hono anga kakano, ka na‘e fakamo‘ui hake ‘i hono anga laumālie;

¹⁹‘a ia foki na‘a ne ‘alu ‘aki ‘o malanga ki he ngaahi laumālie nofo pilīsone;

²⁰‘a kinautolu na‘e talangata‘a mu‘a, ‘i he taimi na‘e tatali ‘a e Angamokomoko ‘a e ‘Otua ‘i he kuonga ‘o Noa, lolotonga ‘oku teu ‘a e ‘A‘ake; ‘a ia ‘i he hū ki ai ha toko si‘i, ko e toko valu tokua, na‘e fakamo‘ui ‘aki ‘a e vai.

²¹‘A ia ‘oku ne fakamo‘ui ‘a kimoutolu foki ‘i onopooni, ‘a e me‘a na‘a ne taipe ki ai, ko e papitaiso; (‘o ‘ikai ko e hu‘ihu‘i ‘e he kakano ‘a e ‘uli, ka ko e kumi ‘e ha konisēnisi ‘ata‘atā ki he ‘Otua) ko e me‘a ‘i he toetu‘u ‘a Sīsū Kalaisi:

²²‘a ia ‘oku ne ‘afio mei he to‘omata‘u ‘o e ‘Otua, he kuo ne ‘alu ki he langi; pea ko e kau ‘āngelo mo e kau ma‘u tu‘unga mo e kau ma‘u mālohi kuo tuku ki lalo kiate ia.