Read KO E TOH TAPU KATOA TONGA Pitá 1 4 Bible Online

Pitá 1 4 - KO E TOH TAPU KATOA TONGA bible

Pitá 1 4

¹PEA ko ia, ko e me‘a ‘i he kātaki mamahi ‘e Kalaisi ‘i hono anga kakano, ko ia ke mou ‘ai ‘e kimoutolu foki mo‘omou kofu tau ‘a e fakakaukau pē ko ia, ‘o pehē, Ko ia kuo ne kātaki mamahi ‘i he kakano kuo faka‘ata‘atā mei he angahala;

²Koe‘uhi ke ‘oua te mou toe mo‘ui‘aki ‘a e ngaahi holi ‘a e tangata, ka ko hono toe ‘o homou taimi ‘i he kakano ke mou mo‘ui ‘aki ‘a e finangalo ‘o e ‘Otua.

³Seuke, kuo lahi pē ‘a e taimi kuo hili ke fai‘aki ‘a e loto ‘o e Senitaile; ‘a ia na‘a mou fou ‘i he ngaahi pau‘u fakalielia, mo e ngaahi holikovi, mo e fa‘a uaine‘ia, mo e ngaahi kātoanga kai, mo e ngaahi kātoanga inu kava; pea mo e me‘a ko ia ‘oku tāpuhā ‘a e ngaahi feingalotu ki he ‘aitoli:

⁴‘a ia ‘oku nau ofo ‘i he ‘ikai te mou ō ai mo kinautolu ki he pitenga ko ia ‘o e mo‘ui fakalusa, ‘o nau lau‘ikovi kimoutolu —

⁵‘a e fa‘ahinga te nau hopo ‘i he ‘ao ‘o‘ona, ‘a ia ‘oku ne tali teuteu ke ne fakamāu‘i ‘a e kau mo‘ui mo e kau pekia.

⁶He ko hono ‘uhinga ia na‘e malanga‘aki ai ‘a e Kōsipeli ki he kau pekia foki, koe‘uhi ke nau nofo kuo fakamaau? fakatangata honau anga kakano, ka nau mo‘ui faka‘otua ‘a honau anga laumālie.

⁷Ka ko eni kuo panaki ‘a e ngata‘anga ‘o e me‘a kotoa pē: ko ia mou fakama‘uma‘u mu‘a, ‘o mou mo‘ui faka‘ehi‘ehi, koe‘uhi ke mou fa‘a lotu,

⁸sinoeme‘a ke mou tauhi ai pē ho‘omou fe‘ofa‘aki ke tūkuingata pē: he ko e ‘ofa ‘oku ne ‘ufi‘ufi ha fu‘ufu‘unga angahala.

⁹Ke mou fefakaafe‘aki ta‘eha lāunga.

¹⁰Ke mou fetauhi‘aki kimoutolu ‘aki ‘a e mafai fakalaumālie ne mou takitaha ma‘u, ‘i he ‘alunga ‘o ‘ene ma‘u, ‘o taau mo ha kau sētuata lelei ‘o e kelesi faifio ‘a e ‘Otua.

¹¹Kapau ko e fai malanga ‘a ha taha, ke ne fai ko e folofola ‘a e ‘Otua; kapau ‘oku fai ha tauhi ‘ofa ‘e ha taha, ke ne fai ‘o ngali ko ha toko taha kuo ne ma‘u ‘ene mafai mei he ‘Eiki; koe‘uhi ke fakahīkihiki‘i ‘a e ‘Otua ‘i he me‘a kotoa pē ‘ia Sīsū Kalaisi, ‘a ia ‘oku ‘o ‘Ene ‘Afio ‘a e kolōlia mo e māfimafi ‘o laui kuonga pea ta‘engata. ‘Ēmeni.

¹²Si‘i ‘ofa‘anga, ‘oua te mou ofo ‘i he vela kuo hoko kiate kimoutolu mo‘omou ‘ahi‘ahi‘i, ‘o hangē ko ha me‘a fo‘ou ia kuo hoko noa atu:

¹³kaekehe ke mou fiefia, ‘o fakatatau ki ho‘omou kau ‘i he ngaahi mamahi ‘a Kalaisi; koe‘uhi ke mou fiefia foki mo hākailangitau ‘i he fakae‘a ‘o ‘ene lāngilangi‘ia.

¹⁴Ka kuo manukia kimoutolu ‘i he huafa ‘o Kalaisi, tā ko e toki kakai monū‘ia kimoutolu; he ‘oku nofo‘i kimoutolu ‘e he Laumālie ‘oku ‘a‘ana ‘a e lāngilangi, ‘io, ko e Laumālie ‘o e ‘Otua.

¹⁵Seuke, ke ‘oua na‘a ai hamou toko taha ‘e mo‘ua ha mamahi ko ha‘ane fakapō, pe kaiha‘a, pe fai kovi, pe ko ha‘ane kaunoa ‘i ha me‘a.

¹⁶Ka ‘oka ngaohi pehe‘i ia ko ‘ene Kalisitiane, ke ‘oua te ne mā, ka ne fakahīkihiki‘i ‘a e ‘Otua koe‘uhi ko e hingoa ko ia.

¹⁷He ko e kuonga ‘eni ke kamata ‘a e fakamaau mei he ‘api ‘o e ‘Otua: pea kapau ‘oku fua fai kiate kitautolu, ko e hā tū honau iku‘anga, ‘a kinautolu ‘oku nau talangata‘a ki he Kōsipeli ‘a e ‘Otua?

¹⁸Pea kapau ‘oku ‘ikai ke meimei hao ‘a e mā‘oni‘oni, pea ‘e tu‘u ‘i fē ‘a e faka‘otuamate mo e angahala?

¹⁹Ko ia, ko kinautolu foki ‘oku mo‘ua ‘i he ngaahi mamahi ‘i he finangalo ‘o e ‘Otua, ke nau tuku honau laumālie ‘i he failelei ki he Tupu‘i-‘Otua ‘a ia ko e Toko Taha ‘oku fai ki he‘ene lea.