Read KO E TOH TAPU KATOA TONGA Pitá 1 5 Bible Online

Pitá 1 5 - KO E TOH TAPU KATOA TONGA bible

Pitá 1 5

¹KO ia, ‘oku ou tokoni atu ki he kau faifekau ‘oku ‘iate kimoutolu, ‘a au ‘oku kaungā faifekau mo kimoutolu, mo e fakamo‘oni ki he ngaahi mamahi ‘o Kalaisi, mo e ‘inasi foki ‘i he lāngilangi ‘oku ene ke fakae‘a mai.

²‘Ē, mou fei mo tauhi ‘a e fanga sipi ‘a e ‘Otua ‘oku ‘iate kimoutolu, ‘o ‘oua na‘a fai fakakoloto hono le‘ohi, ka ‘i he loto fiefai ‘i he funga ‘o e finangalo ‘o e ‘Otua; ‘o ‘ikai ko e sio pa‘anga ‘uli, ka ‘i he ‘ofa ki he ngāue;

³pea ‘oua te mou fakafie‘eiki ki he ngaahi potungāue, kae hoko ko e fa‘ifa‘itaki‘anga ki he fanga sipi.

⁴Pea ‘i he faifai pea fakae‘a mai ‘a e Tauhi Lahi, pea te mou ma‘u ‘a e pale ‘amalani[4] ‘o e lāngilangi‘ia.

⁵Pehē foki mo kimoutolu ‘a e kau fakaongo, mou anganofo ki he kau faifekau. ‘Io, mou no‘o kotoa pē ‘aki ‘a e fefakavaivai‘aki: he ‘oku tali teke‘i ‘e he ‘Otua ‘a e ‘afungi, ka ‘oku ne foaki kelesi ki he anga vaivai.

⁶Ko ia, mou fakavaivai‘i kimoutolu ‘i he lalo nima māfimafi ‘o e ‘Otua, koe‘uhi ke ne hākeaki‘i kimoutolu ‘oka hoko hono taimi.

⁷‘O mou lī atu ā hono kotoa ‘o ho‘omou lotomo‘ua ki he ‘Ene ‘Afio; he ‘oku ne mamahi‘i kimoutolu.

⁸Mou laka faka‘ehi‘ehi, mou ‘ā: ko homou fili ko e Tēvolo ‘oku ne ‘alu fano ‘o hangē ko ha laione ngungulu, he‘ene kumi ha taha ke ne mātu‘aki folo.

⁹‘A ia ke mou tali teke‘i, he tu‘u ma‘uma‘uluta he tui; mo mou ‘ilo ‘oku tatau ‘aupito mo e ngaahi mamahi na ‘a e ngaahi me‘a ‘oku mo‘ua ai homou fa‘ahinga ‘i māmani.

¹⁰Ka ko e ‘Otua, ‘a ia ‘oku ‘a‘ana ‘a e kelesi kotoa pē, ‘a ‘Ene ‘Afio kuo ne ui ange kimoutolu ‘ia Kalaisi Sīsū ki he lāngilangi ta‘engata ‘o‘ona, ‘oka hili ho‘omou kātaki mamahi ‘o fuonounou, te ne fakakakato kimoutolu ‘e He‘ene ‘Afio, te ne poupou, te ne fakakaukaua, te ne pulusi ki he tu‘unga.

¹¹Ke ‘o ‘Ene ‘Afio ‘a e māfimafi ‘o laui kuonga pea ta‘engata. ‘Ēmeni.

¹²Ko ‘eku ki‘i tohi atu ‘eni ‘ia Silivenusi, ko e kāinga tōnunga ‘i he‘eku lau ‘a‘aku; pea ko ‘eku enginaki mo fakapapau atu ko e kelesi mo‘oni ‘eni ‘a e ‘Otua: pea ‘i ho‘omou ‘i ai, mou tu‘u ai.

¹³‘Oku ‘ofa atu ‘a e fefine ‘i Pāpilone[5] ‘oku kaungā fili, pea mo Ma‘ake ko si‘oku foha.

¹⁴Mou fefekita‘aki ‘aki ha ‘uma ‘ofa. Ke ‘iate kimoutolu ‘a e melino, ‘a kimoutolu kotoa pē ‘oku ‘ia Kalaisi.