Read KO E TOH TAPU KATOA TONGA Pitá 2 1 Bible Online

Pitá 2 1 - KO E TOH TAPU KATOA TONGA bible

Pitá 2 1

¹TŪ ko au Saimone Pita, ko e tamaio‘eiki mo ‘aposetolo ‘a Sīsū Kalaisi, ko ‘eku tohi kiate kimoutolu kuo ta‘imālie ha tui ‘oku ma‘ongo‘onga tatau mo ha‘amautolu, ‘i he fai mā‘oni‘oni ‘a hotau ‘Otua mo Fakamo‘ui ko Sīsū Kalaisi.

²‘Ofa ke fakalahi ‘e he ‘Otua kiate kimoutolu ‘a e kelesi mo e fiemālie ‘i he ‘ilo kānokano ki he ‘Otua, mo Sīsū Kalaisi ko hotau ‘Eiki.

³He kuo foaki mai ‘e he‘ene māfimafi faka‘otua ‘a e ngaahi me‘a ‘oku kau ki he mo‘ui, mo e lotu mo‘oni, ‘i he‘etau ‘ilo‘i ‘a ‘Ene ‘Afio ‘a ia na‘a ne ui ‘a kitautolu ‘aki hono lāngilangi[1] mo hono ‘ulungāanga lelei;

⁴‘a ia kuo foaki ai kiate kitautolu ‘a e ngaahi tala‘ofa fungani mo mahu‘inga; koe‘uhi ke tau hoko ‘i he ngaahi tala‘ofa ko ia ko e kakai ‘oku ‘inasi ‘i he anga ‘o e ‘Otua, kuo tau hao mei he ‘auha ‘oku ‘i māmani ‘o tefito ‘i he holi kovi.

⁵Pea koe‘uhi ko e me‘a ko ia, ke fai ‘e kimoutolu foki homou tūkuingata ke lava ‘i ho‘omou ma‘u tui na ‘a e ‘ulungāanga lelei; pea ‘i ho‘omou ma‘u ‘a e ‘ulungāanga lelei, ke lava ‘a e mafai ke ‘ilo;

⁶pea ‘i ho‘omou ma‘u ‘a e mafai ke ‘ilo, ke lava ‘a e anga fakama‘uma‘u; pea ‘i ho‘omou ma‘u ‘a e anga fakama‘uma‘u, ke lava ‘a e kātaki; pea ‘i ho‘omou ma‘u ‘a e kātaki, ke lava ‘a e nofo ki he ‘Otua;

⁷pea ‘i ho‘omou ma‘u ‘a e nofo ki he ‘Otua, ke lava ‘a e fe‘ofa‘aki fakalotu; pea ‘i ho‘omou ma‘u ‘a e fe‘ofa‘aki fakalotu, ke lava ‘a e ‘ofa.

⁸He kapau ‘oku ‘iate kimoutolu ‘a e ngaahi me‘a ni, ‘o tupulekina, ‘e ‘ikai ai te mou fakapikopiko, pe ta‘efua, ‘i he lava‘i ‘o e ‘ilo kānokano ki hotau ‘Eiki ko Sīsū Kalaisi.

⁹‘Io, ko ia ‘oku ‘ikai ‘iate ia ‘a e ngaahi me‘a ni, ‘oku ne kui, ‘o ‘ikai te ne ‘ilo me‘a mama‘o; kuo loto ngalongalo ki hono fakama‘a mei he ngaahi angahala mu‘a.

¹⁰Ko ia ai, kāinga, ke ‘āsili ho‘omou feinga ke ‘ai ke pau homou ui mo homou fili: he ko ia ‘oku ne fai ‘a e ngaahi me‘a ko ia, ‘e ‘ikai ‘aupito te ne humu ‘i ha taimi:[2]

¹¹‘io, ‘i he fai pehē ‘e faifai pea ‘atu ke mou mātu‘aki hao‘uli ho‘omou hū ki he pule‘anga ta‘engata ‘o hotau ‘Eiki mo Fakamo‘ui ko Sīsū Kalaisi.

¹²Ko ia, kuo pau te u fakamanatu ai pē ‘a e ngaahi me‘a ko ia kiate kimoutolu, neongo ‘oku mou lāu‘ilo ki ai, pea kuo mou tu‘u ‘i he tokāteline ‘oku ‘iate kimoutolu.

¹³Ka ‘oku ou pehē, ko ‘eku ngāue totonu, lolotonga ‘eku ‘i he me‘i fakahekeheke ni, ke langa‘i kimoutolu he‘eku fakamanatu kimoutolu;

¹⁴He ‘oku ou ‘ilo ko e holoki ‘o hoku fakahekeheke ni ‘e tuaiekemo ‘oka fai, ‘o hangē foki ko e hīnoi‘i au ‘e hotau ‘Eiki ko Sīsū Kalaisi.

¹⁵Kae‘uma‘ā te u feinga ke ai ha‘amou me‘a fakatupu manatu ma‘u ai pē ki he ngaahi me‘a ko ia, hili ‘eku ‘ekisoto.

¹⁶He tala‘ehai ko ‘emau fai ki ha ngaahi fananga ne fa‘u ke fakahinga ‘a e kakai, ‘a ‘emau ongoongoa atu ‘a e māfimafi ‘a hotau ‘Eiki ko Sīsū Kalaisi, mo ‘ene toe hoko mai; ka ko e kau sio tonu kimautolu ki hono lāngilangi.

¹⁷He na‘a ne ma‘u mei he ‘Otua ko e Tamai ‘a e faka‘apa‘apa mo e fakalāngilangi‘i, he ‘omai kiate ia ‘a e le‘o ko ia na‘e pehē fau ‘e he Sikaina nāunau‘ia, ‘o pehē, Ko hoku ‘Alo Pele ‘ena, ‘a ia kuo toka ki ai ‘eku hōifua.

¹⁸Pea ko e le‘o ko ia, na‘a mau fanongo ki ai ‘i hono ‘omeia mei langi, ‘i he‘emau ‘iate ia ‘i he mo‘unga tapu.

¹⁹Kae‘uma‘ā ‘oku tau ma‘u ‘a e folofola palofisai, ‘a ia ko e me‘a ‘oku pau ange; pea ‘oku mālō ho‘omou fakatokanga ki ai, he ‘oku hangē ko ha maama ‘oku ulo ‘i ha potu maomaonganoa, kae‘oua ke mafoa ‘a e ata, pea hopo ‘a e fetu‘u ‘aho ‘i homou loto.

²⁰Ka mou ‘ilo mu‘a, ‘Ilonga ha palofisai ‘i he Tohitapu, na‘e ‘ikai tupu ia mei ha faka‘uhinga ‘a ha tangata.

²¹He kuo te‘eki si‘i ke ‘omeia ha palofisai ‘i he tu‘utu‘uni ‘a e tangata: ka na‘e lea mei he ‘Otua ha kau tangata ‘i he takina kinautolu ‘e he Laumālie Mā‘oni‘oni.