Read KO E TOH TAPU KATOA TONGA Pitá 2 2 Bible Online

Pitá 2 2 - KO E TOH TAPU KATOA TONGA bible

Pitá 2 2

¹KA na‘e ai foki ha kau palōfita loi ‘i he kakai ‘Isileli, hangē foki ‘e ai ha kau akonaki loi ‘iate kimoutolu, ‘a e fa‘ahinga te nau fakahū fufū mai ‘a e ngaahi akonaki hē, ‘a ia ko e me‘a faka‘auha, ‘o nau fakafisinga ‘a e ‘Eiki na‘a ne fakatau kinautolu, ‘o nau fakatō kiate kinautolu ha faka‘auha ‘e tuaiekemo ‘oka fai.

²Pea ko e tokolahi te nau mātu‘aki muimui ki he‘enau ngaahi ngāue fakalielia; ‘a ia ‘e tupu ai ‘a e lau‘ikovi ‘o e hala ‘o e mo‘oni.

³Pea ‘i he‘enau mo‘ui ‘aki ‘a e mānumanu, te nau ngāue‘aki kimoutolu ke ma‘u pa‘anga, he‘enau fai‘aki ‘a e ngaahi lea momole‘olunga: ‘a ia ko honau fakamo‘ua kuo fuoloa mo e ‘ikai tuku ‘ene ngāue mai, pea ‘oku ‘ikai kemo hifo ‘e honau faka‘auha.

⁴He kapau na‘e ‘ikai ke ma‘ema‘ekina ‘e he ‘Otua ha kau ‘āngelo na‘e angahala, ka ne lolofonua‘i, ‘o ne tuku ki he ngaahi ‘ana, ‘a ia ko e koto fakapo‘uli,[3] ke tauhi ki he Fakamaau.

⁵Pea kapau na‘e ‘ikai te ne ma‘ema‘ekina ‘a e maama motu‘a, ka ne tauhi pē ha toko fitu, pea valu ‘aki ‘a Noa, ‘a ia na‘a ne malanga ‘aki ‘a e mā‘oni‘oni, ‘i he‘ene ‘omi ‘a e Lōmaki ki he maama ‘o e kau faka‘otuamate:

⁶mo ne tutu ke efu ‘a e ongo kolo ko Sōtoma mo Komola, mo ne fakamaau ke nofo ko e koto lusa, ‘o ne tuku ai ha taipe ki he kau faka‘otuamate ‘o e ‘amui;

⁷mo ne hamusi ‘a Lote mā‘oni‘oni, ‘a ia kuo ne mafasia ‘i he tō‘onga ‘a e kau malaki lao na, ‘a ia na‘a nau mo‘ui ‘aki ‘a e pau‘u fakalielia;

⁸(he ko si‘i mā‘oni‘oni ko ia, ko e me‘a ‘i he‘ene nofo ‘i honau lotolotonga, ‘o sio mo fanongo ki he‘enau me‘a, na‘a ne fakahoha‘a tu‘u hono laumālie mā‘oni‘oni ‘i he ‘aho kotoa pē ‘aki ‘enau ngaahi ngāue maumau lao):

⁹pea tā ‘oku poto pē ‘a e ‘Eiki ke hamusi ‘a e kakai lotu mo‘oni mei he ‘ahi‘ahi, pea ke tauhi tautea ‘a e kau fai ta‘etotonu, ‘o a‘u ki he fakamaau:

¹⁰kae‘uma‘ā ‘a kinautolu ‘oku muimui ki he kakano, ‘oku nau fou ‘i he holi ‘oku fakamousa‘a kita, mo nau fakasīkaka‘i ‘a hou‘eiki. Ko e ha‘a ta‘emālū‘ia kinautolu, ko e ha‘a tangi ke tu‘u ‘ana, ko e kakai ‘oku tālalakulaku ki he fa‘ahinga lāngilangi‘ia, ‘o ‘ikai te nau tailiili ai.

¹¹Ka ko e kau ‘āngelo, neongo ‘oku nau hulu atu ‘i he mālohi mo e mafai, ka tala‘ehai ‘oku nau lea ‘asi ke lau ‘enau kovi ‘i he ‘ao ‘o e ‘Eiki.

¹²Ka ko e kau siana ni, hangē tofu pē ko ha fanga manu ta‘e‘atamai kinautolu, kuo tupu fakaenatula pē ke pō mo tāmate‘i, pehē ‘oku nau laukovi ki he ngaahi me‘a ‘oku ‘ikai te nau ‘ilo ki ai; pea ‘i he‘enau fakalusa ‘oku fai, ‘e faifai foki pea nau lusa ai, he‘enau ma‘u ‘a e totongi ‘o e fai ta‘etotonu.

¹³Ko e fa‘ahinga ‘oku nau lau ko e mo‘ui fakananivi, ‘a ia ‘oku fo‘i ‘aho pē, ko e mālie ia. Ko e ngaahi ‘ila mo e ngaahi mele kinautolu, ‘oku nau fakausousa ‘i he‘enau keinanga mo kimoutolu, ‘o nau kofu ‘aki ‘enau ngaahi fai kākā;

¹⁴‘Oku nau tama‘imata ‘aki ha fefine ke fe‘auaki, pea ‘oku ‘ikai ke mafakamālōlō mei he angahala; ‘oku nau taki ‘aki ha mounu ‘a e ngaahi laumālie te‘eki matu‘u; kuo ako honau loto ‘i he mānumanu, ko e ha‘a mala‘ia;

¹⁵kuo nau afe mei he hala totonu, ‘o ‘alu hē pē, pea kuo nau mātu‘aki muimui atu ‘i he hala na‘e fou ai ‘a Pēlami ko e foha ‘o Pōsoli, ‘a ia na‘a ne manako ki he totongi ‘o e kākā;

¹⁶ka na‘e tō kiate ia ha valoki ‘o ‘ene faihala: he na‘e lea fakatangata mai ‘e ha me‘a ta‘elea, ko e manu ngāue, ‘o ne ta‘ofi ‘a e faha ‘a e palōfita.

¹⁷Ko e kau siana ni ko e ngaahi matavai ta‘ehano vai, ko e ngaahi kakapu ‘oku fakaoma ‘e ha ‘ahiohio: ‘a ia kuo tauhi mo‘onautolu ‘a e po‘uli ‘o e kaupō‘uli.

¹⁸He ko e me‘a ‘i he‘enau pu‘aki me‘a lalahi, ko e koto muna pē, ‘o nau mo‘ui ‘aki ‘a e ngaahi holi fakakakano ‘atā, ‘o nau mounu ‘aki ‘a e pau‘u fakalielia, ko ia ‘oku nau tauhele ‘aki ‘a e kakai kuo ‘ikai te nau meimei hao lelei mai meiate kinautolu ‘oku nofo hē.

¹⁹‘Oku nau tala‘ofa kiate kinautolu ha tau‘atāina; ‘osi, ko e koto pōpula kinautolu ki he ‘auha: he ka kuo ikuna ha tangata ‘e ha taha, kuo ne hoko ko e pōpula foki ‘a e toko taha ko ia.

²⁰He kapau na‘a nau hao mei he ngaahi me‘a fakamousa‘a ‘o māmani, ‘i he‘enau ‘ilo kānokano ki he ‘Eiki mo Fakamo‘ui ko Sīsū Kalaisi, ka nau toe fihia ki he ngaahi me‘a ko ia, ‘o ikuna ai kinautolu, pea tā ‘oku lahi ‘a e kovi ki mui ‘i he kovi mu‘a.

²¹‘Io, ne lelei mu‘a kiate kinautolu ke ‘oua te nau ‘ilo ‘a e hala ‘o e mā‘oni‘oni, ‘i he‘enau ‘ilo ki ai pea toki foki mei he tu‘utu‘uni tapu na‘e tuku kiate kinautolu.

²²Kuo fakamo‘oni ‘iate kinautolu ‘a e paloveepi totonu, Foki e kulī ki he‘ene lua ‘a‘ana: pea mo e paloveepi ‘e taha, Puaka ne ma‘a Toe fakapelepela.