Read KO E TOH TAPU KATOA TONGA Pitá 2 3 Bible Online

Pitá 2 3 - KO E TOH TAPU KATOA TONGA bible

Pitá 2 3

¹SI‘I ‘ofa‘anga, ko hono ua ‘eni ‘eku ‘ipiseli kiate kimoutolu ‘oku ou tohi atu ni; ‘a ia ‘oku ou langa‘i ai homou loto ma‘a,

²he‘eku fakamanatu atu ke ‘oua na‘a ngalo ‘a e ngaahi lea na‘e folofola‘aki ‘i mu‘a ‘e he kau Palōfita tapu, mo e fekau ‘a e ‘Eiki mo Fakamo‘ui, ‘a ia na‘e fou ‘i ho‘omou kau ‘Aposetolo:

³‘o mou ‘ilo mu‘a ‘a e me‘a ni: tokua ‘e hoko ‘i he taimi fakamui ha fa‘ahinga ‘oku mātu‘aki manuki, ‘o nau fou ‘i he ngaahi holi ‘anautolu,

⁴mo nau lau, Koma‘ā ia ‘a e tala‘ofa ‘o ‘ene hoko mai? he talu ‘a e mohe ‘a e kau mātu‘a mo e pehē ni pē ‘a e me‘a kotoa pē, ‘io, ‘a ia ai pē talu mei he kamata‘anga ‘o māmani.

⁵He ‘oku puli ‘iate kinautolu ‘a e me‘a ni — ka ko honau loto foki-Tokua ko e folofola ‘a e ‘Otua na‘e tu‘u ai ‘a e ngaahi langi ‘i mu‘a, pea fokotu‘u ai ‘a e fonua mei he vai pea ‘aki ‘a e vai:

⁶‘a ia na‘e lōmaki vai ai ‘a e maama ‘o ono‘aho, ‘o ‘auha:

⁷ka ko e ngaahi langi mo e fonua ‘o onopooni kuo tauhi ‘aki ‘a e folofola ‘a ‘Ene ‘Afio, ‘o ta‘ofi ki he afi, ‘oka toki hoko ‘a e ‘aho ‘o e fakamāu‘i mo e faka‘auha ‘o e kakai faka‘otuamate.

⁸Ka ke ‘oua na‘a puli ‘iate kimoutolu, si‘i ‘ofa‘anga, ‘a e fo‘i me‘a ko eni, Tokua ko e ‘aho ‘e taha ‘oku tatau ki he ‘Eiki pea mo ha ta‘u ‘e afe, pea ko e ta‘u ‘e afe ‘oku tatau mo e ‘aho ‘e taha.

⁹Tala‘ehai ko ‘ene fai tuai ‘a e ‘Eiki ‘i he‘ene tala‘ofa, ‘o hangē ko e lau tuai ‘e he ni‘ihi, ka ko ‘ene anga mokomoko pē kiate kimoutolu, mo e ‘ikai te ne finangalo ke ‘auha ha taha, ka ke a‘usia ‘a e fakatomala ‘e he kakai kotoa pē.

¹⁰Ka ‘e hoko mai pē ‘a e ‘aho ‘o e ‘Eiki ‘o hangē ha kaiha‘a; ‘a ia ‘e mole ai ‘a e ngaahi langi mo e longoa‘a, pea ‘e vela ‘a e ngaahi fetu‘u ‘o movetevete, pea ko e fonua mo e ngaahi ngāue ‘oku ‘i ai ‘e vela ‘o ‘osi ai.[4]

¹¹Pea kapau leva ‘e movete pehē ‘a e ngaahi me‘a ni kotoa pē, pea faka‘uta mu‘a ki he anga ‘oku totonu ke mou anga‘aki, taka he tō‘onga mā‘oni‘oni mo e lotu mo‘oni,

¹²‘o mou nofo‘aki tali ki he hoko mai ‘a e ‘aho ‘o e ‘Otua mo mou fakato‘oto‘o mai ia, ‘a ia ‘e tutu ai ‘a e ngaahi langi ‘o movetevete, pea ‘e vela ‘o vai ‘a e ngaahi fetu‘u.

¹³Ka ‘i he funga ‘o e tala‘ofa ‘a ‘Ene ‘Afio ‘oku tau ‘amanaki ki ha ngaahi langi fo‘ou mo ha fonua fo‘ou, ‘a ia ‘oku nofo‘anga ai ‘a mā‘oni‘oni.

¹⁴Ko ia, si‘i ‘ofa‘anga, ko e me‘a ‘i ho‘omou ‘amanaki ki ha ngaahi me‘a pehē, mou fai feinga ke ‘iloa kimoutolu kuo mou lelei, kuo mou ta‘eha ‘ila, pea ta‘eha mele ‘i he‘ene vakai ‘a‘ana.

¹⁵Pea mou lau ‘a e kātaki fuoloa ‘a hotau ‘Eiki ko e koto fakamo‘ui; hangē foki na‘e tohi atu ‘a si‘otau tokoua ‘ofeina ko Paula, ‘o fakatatau ki he poto na‘e foaki kiate ia:

¹⁶‘o hangē foki ko ‘ene fai ‘i he‘ene ngaahi ‘ipiseli kehekehe, ‘o ne lea ai ki he ngaahi me‘a ni; ‘a ia ‘oku ‘i ai ‘a e ngaahi me‘a ‘oku ‘ilongata‘a, pea ‘oku mio‘i ia ‘e he kau ta‘eako, mo ta‘ematu‘u: ‘o hangē foki ko ‘enau fai ki he ngaahi konga kehe ‘o e Tohitapu, ‘o nau langa‘i ai honau faka‘auha ‘onautolu.

¹⁷Ka ko kimoutolu, si‘i ‘ofa‘anga, ko e me‘a ‘i ho‘omou sinaki ‘ilo ki ai, mou le‘ohi kimoutolu na‘a mou ‘auhia ‘i he hē ‘a e kau malaki lao na, ‘o mou mātu‘aki hinga mei he tu‘u ma‘u na.

¹⁸Ka mou tupu ai pē ‘i he kelesi, pea ‘i he ‘ilo‘i ‘o hotau ‘Eiki mo Fakamo‘ui ko Sīsū Kalaisi. Ke ‘o ‘Ene ‘Afio ‘a e kolōlia ‘i he taimi ni, ‘o a‘u ki he ‘aho ‘o ‘ītāniti.