Read KO E TOH TAPU KATOA TONGA Sioné 1 2 Bible Online

Sioné 1 2 - KO E TOH TAPU KATOA TONGA bible

Sioné 1 2

¹SI‘EKU fānau, ‘oku ou tohi pehē atu koe‘uhi ke ‘oua te mou momo‘i angahala. Pea ka kuo fai ha angahala ‘e ha taha, ‘oku tau ma‘u ha taukapo ki he Tamai, ko Sīsū Kalaisi ko e faitotonu;

²pea ko e fakatupuhōifua‘anga foki ia koe‘uhi ko ‘etau ngaahi hia; pea tala‘ehai koe‘uhi ko e ngaahi hia ‘atautolu pē, ka koe‘uhi foki ko e ngaahi hia ‘a māmani kātoa.

³Pea ko eni ‘a e me‘a ‘oku tau ‘ilo ai kuo tau ‘ilo‘i mo‘oni ‘a ‘Ene ‘Afio, ‘a ‘etau tauhi ‘ene ngaahi tu‘utu‘uni.

⁴Ko ia ‘oku ne pehē, Kuo u ‘ilo‘i mo‘oni ‘a ‘Ene ‘Afio; ‘osi, ‘oku ‘ikai te ne tauhi ‘ene ngaahi tu‘utu‘uni, ko e loi ia, pea ‘oku ‘ikai ‘iate ia ‘a e mo‘oni.

⁵Ka ‘ilonga ‘a ia ‘oku tauhi ‘a e folofola ‘a ‘Ene ‘Afio, tā ko e toko taha ko ia ‘oku a‘u mo‘oni ai ki he haohaoa ‘a e ‘ofa ki he ‘Otua. Ko ia ‘a e me‘a ‘oku tau ‘ilo ai ‘oku tau ‘i he ‘Ene ‘Afio.

⁶Ko ia ‘oku ne pehē, tokua ‘oku ne nofo ma‘u ‘i he ‘Ene ‘Afio, ‘oku totonu ke ne laka, ‘o hangē ko e laka ‘a ‘Ene ‘Afio.

⁷Si‘i ‘ofa‘anga, ‘oku ‘ikai ko ha tu‘utu‘uni fo‘ou ‘oku ou tohi atu ni, ka ko ha tu‘utu‘uni kuo fuoloa, he na‘a mou ma‘u ia mei he kamata‘anga. Ko e tu‘utu‘uni fuoloa ni, ko e folofola ne mou fanongo ki ai.

⁸Ka neongo ia, ka ko e tu‘utu‘uni fo‘ou ia ‘oku ou tohi atu ni, ‘a ia ko e me‘a kuo hoko mo‘oni ‘i he ‘Ene ‘Afio, pea ‘iate kimoutolu; koe‘uhi kuo faka‘au ke mole ‘a e po‘uli, pea kuo kamata ulo ni ‘a e maama mo‘onia.

⁹Ko ia ‘oku ne pehē ‘oku ne ‘i he maama; ‘osi, ‘oku ne fehi‘a ki hono tokoua, kuo ne ‘i he po‘uli pē ‘o a‘u ki he taimi ni.

¹⁰Ko ia ‘oku ne ‘ofa ki hono tokoua, ‘oku ne nofo ma‘u ‘i he maama; pea ‘oku ‘ikai ha tūkia‘anga ‘iate ia.[2]

¹¹Ka ko ia ‘oku ne fehi‘a ki hono tokoua, ‘oku ne ‘i he po‘uli, pea ‘oku ne laka ‘i he pō ‘uli, pea ‘oku ‘ikai te ne ‘ilo pē ko ‘ene ‘alu ki fē, he kuo fakakui hono mata ‘e he po‘uli.

¹²‘Oku ou tohi kiate kimoutolu, fānau, koe‘uhi kuo fakamolemole ho‘omou ngaahi angahala koe‘uhi ko hono huafa.

¹³‘Oku ou tohi kiate kimoutolu, mātu‘a, koe‘uhi kuo mou ‘ilo mo‘oni ‘a ‘Ene ‘Afio na‘e ‘i ai mei he kamata‘anga. ‘Oku ou tohi kiate kimautolu, talavou, koe‘uhi kuo mou ikuna ‘a e Fili.

¹⁴Ne u tohi kiate kimoutolu tamaiki, koe‘uhi kuo mou ‘ilo mo‘oni ‘a e Tamai. Ne u tohi kiate kimoutolu, mātu‘a, koe‘uhi kuo mou ‘ilo mo‘oni ‘a ‘Ene ‘Afio na‘e ‘i ai mei he kamata‘anga. Ne u tohi kiate kimoutolu, talavou, koe‘uhi kuo mou kaukaua, pea ‘oku nofo ma‘u ‘a e folofola ‘a e ‘Otua ‘iate kimoutolu, pea kuo mou ikuna ‘a e Fili.

¹⁵‘Oua te mou ‘ofa ki māmani, ‘uma‘ā ‘a e ngaahi me‘a ‘oku ‘i he māmani. Ka ‘ofa ‘e ha taha ki māmani ‘oku ‘ikai ‘iate ia ‘a e ‘ofa ki he Tamai.

¹⁶He ko e me‘a kātoa ‘oku ‘i māmani, ‘a e holi ‘o e kakano, mo e holi ‘o e mata, mo e ‘afungi ‘o e mo‘ui, ‘oku ‘ikai mei he Tamai ia, ka ‘oku mei māmani.

¹⁷Pea ‘oku faka‘a‘au ke mole ‘a māmani mo ‘ene holi ‘a‘ana: ka ko ia ‘oku ne fai ‘a e finangalo ‘o e ‘Otua, ‘oku ne nofo ma‘u ‘o ta‘engata.

¹⁸Tamaiki, ko e houa fakamui ‘eni pea hangē na‘a mou fanongo ‘oku tu‘unuku mai ‘a Fiekalaisi, pehē foki kuo hoko mai ni ha Fiekalaisi tokolahi: ‘a ia ‘oku tau ‘ilo mei ai ko e houa fakamui ‘eni.

¹⁹Na‘a nau ‘alu atu meiate kitautolu, ka tala‘ehai na‘a nau ‘otautolu; he ka ne nau ‘otautolu, pehē kuo nau nofo ma‘u mo kitautolu: ka koe‘uhiā ke e‘a ‘oku ‘ikai ‘otautolu kotoa pē.

²⁰Pea ko kimoutolu ‘oku mou ma‘u pani mei he Toko Taha Tapu, ‘o mou ‘ilo ‘a e me‘a kotoa pē.

²¹Tala‘ehai ne u tohi kiate kimoutolu ko e pehē na‘e ‘ikai te mou ‘ilo ki he mo‘oni; ka koe‘uhi na‘a mou ‘ilo ia; pea koe‘uhi ‘ilonga ha loi ‘oku ‘ikai mei he mo‘oni ia.

²²‘E laungā loi ki he toko taha ko ia ‘oku ne faka‘ikai‘i ‘o pehē, ‘oku ‘ikai ko e Mīsaia ‘a Sīsū? Ko eni ia ‘a Fiekalaisi, ‘a ia ‘oku ne faka‘ikai‘i ‘a e Tamai mo e ‘Alo.

²³‘Ilonga ‘a ia ‘oku ne faka‘ikai‘i ‘a e ‘Alo, na‘a mo e Tamai ‘oku ‘ikai te ne ma‘u: ko ia ‘oku ne fakamo‘oni ‘a e ‘Alo ‘oku ne ma‘u mo e Tamai foki.

²⁴Ko kimoutolu na, tuku ke nofo ma‘u ‘i homou loto ‘a e me‘a kuo mou fanongo ki ai mei he kamata‘anga. Kapau ‘e nofo ma‘u ‘i homou loto ‘a e me‘a kuo mou fanongo ki ai mei he kamata‘anga, pea te mou nofo ma‘u kimoutolu foki ‘i he ‘Alo pea ‘i he Tamai.

²⁵Pea ko eni ia ‘a e me‘a na‘a ne tala‘ofa ‘aki ‘e he ‘Ene ‘Afio kiate kitautolu, ko e mo‘ui ta‘engata.

²⁶Ko e ngaahi me‘a ko ia kuo u tohi kiate kimoutolu ‘o kau ki he fa‘ahinga ‘oku takihee‘i kimoutolu.

²⁷Pea ko kimoutolu, ‘oku kei nofo ‘i homou loto homou pani ne mou ma‘u mei he ‘Ene ‘Afio, pea ‘oku ‘ikai te mou ‘oua pē ke ako‘i kimoutolu ‘e ha taha: kaekehe, ko e pani ‘a ‘Ene ‘Afio ‘oku ne ako‘i tokua ‘a kimoutolu ‘i he me‘a kotoa pē, kae‘uma‘ā ko e koto mo‘oni ia ‘o ‘ikai ko e loi, pea ko e me‘a foki ‘i he ako‘i kimoutolu ‘e he ‘Ene ‘Afio, ko ia mou nofo ma‘u ‘iate ia.

²⁸Pea ‘i he‘ene pehē, si‘i fānau, mou nofo ma‘u ‘iate ia, koe‘uhi ‘oka fakae‘a mai ia, ke tau loto lahi, ‘o ‘ikai te tau hola ma mei he ‘Ene ‘Afio ‘i he‘ene hoko mai.