Read KO E TOH TAPU KATOA TONGA Sioné 1 3 Bible Online

Sioné 1 3 - KO E TOH TAPU KATOA TONGA bible

Sioné 1 3

¹KAPAU ‘oku mahino ko e ma‘oni‘oni ‘a ‘Ene ‘Afio, ‘oku mou ‘ilo leva, ko ia kotoa pē ‘oku fai mā‘oni‘oni kuo fanau‘i mei he ‘Ene ‘Afio.

²Vakai ā ki hono fakaofo ‘o e ‘ofa kuo foaki mai ‘e he Tamai, he ko e fai ke ui kitautolu ko e fānau ‘a e ‘Otua, ‘a ia foki kuo tau ‘i ai. Ko hono ‘uhinga ia ‘oku ‘ikai ke ‘ilo kitautolu ‘e māmani, koe‘uhi na‘e ‘ikai te nau ‘ilo ‘a ‘Ene ‘Afio.

³Si‘i ‘ofa‘anga, na‘a mo ‘eni ko e fānau ‘a e ‘Otua ‘a kitautolu; pea kuo te‘eki si‘i fakahā mai, pe ko e hā te ta hoko ki ai ‘amui: ‘oku tau ‘ilo pē, ka toki fakahā ia, te tau tatau mo ‘Ene ‘Afio, he te tau mamata kiate ia ‘i hono anga totonu. Pea ko ia kotoa pē ‘oku ‘i ai ‘a e ‘amanaki ko eni, tu‘u ‘i he ‘Ene ‘Afio, ‘oku ne fakama‘a ‘e ia ia, ‘o hangē ‘oku ma‘a ‘a ‘Ene ‘Afio.

⁴Ko ia kotoa pē ‘oku fai angahala ‘oku ne maumau foki ‘a e lao: ‘io, ko e angahala ko e maumau lao ia.

⁵Pea ‘oku mou ‘ilo na‘e fakae‘a mai ‘a ‘Ene ‘Afio ke ne ‘ave ‘a e ngaahi angahala;[3] pea ‘oku ‘ikai ha angahala ‘iate ia.

⁶Ko ia kotoa pē ‘oku nofo ma‘u ‘i he ‘Ene ‘Afio, ‘oku ‘ikai te ne fai angahala: ko ia kotoa pē ‘oku angahala kuo te‘eki te ne mamata ki he ‘Ene ‘Afio, ‘uma‘ā ha‘ane ‘ilo‘i mo‘oni ia.

⁷Si‘i fānau, ke ‘oua na‘a takihē‘i kimoutolu ‘e ha taha: ko ia ‘oku fai mā‘oni‘oni, ko e mā‘oni‘oni ia, ‘o hangē foki ‘oku mā‘oni‘oni ‘a ‘Ene ‘Afio.

⁸Ko ia ‘oku fai angahala ko e tupu-mei-he-tēvolo ia; he ko e Tēvolo ko e fai angahala ia mei he kamata ‘anga. Ko hono ‘uhinga ia na‘e fakae‘a ai ‘a e ‘Alo ‘o e ‘Otua, koe‘uhi ke ne holoki ‘a e ngaahi ngāue ‘a e Tēvolo.

⁹Ko ia kotoa pē kuo fanau‘i mei he ‘Otua, ‘oku ‘ikai ke fai angahala; koe‘uhi ‘oku nofo ma‘u ‘iate ia ‘a e tenga ‘o ‘Ene ‘Afio: pea tala‘ehai ‘oku ne lava ke angahala, he kuo fanau‘i ia mei he ‘Otua.

¹⁰Ko e me‘a ko ia ‘oku mahino ai ‘a e fānau ‘a e ‘Otua pea mo e fānau ‘a e Tēvolo: ko ia ‘oku ‘ikai ke fai mā‘oni‘oni ‘oku ‘ikai mei he ‘Otua ia, kae‘uma‘ā ‘a ia ‘oku ‘ikai ke ‘ofa ki hono tokoua.

¹¹He ko eni ia ‘a e fekau na‘e tala kiate kimoutolu mei he kamata‘anga.

¹²Ke tau fe‘ofa‘aki. He ko e pehē koā ke tau hangē ko Keini ‘a ia ko e tupu-mei-he-Fili, ‘o ne tāmate‘i hono tokua. Pea ko e hā hono ‘uhinga ‘o ‘ene Tāmate‘i? Koe‘uhi pē na‘e kovi ‘ene ngaahi ngāue ‘a‘ana, kae totonu ‘a hono tehina.

¹³‘Oua te mou ofo, kāinga, ‘i he fehi‘a ‘a māmani kiate kimoutolu.

¹⁴‘Oku tau ‘ilo kuo tau hiki mei he mate ki he mo‘ui, he ‘oku tau ‘ofa ki he kāinga lotu. Ko ia ‘oku ‘ikai ke ‘ofa ‘oku ne ‘i he mate ai pē.

¹⁵Ko ia ‘oku ne fehi‘a ki hono tokoua ko e tāmate-tangata ia: pea ‘oku mou ‘ilo, ‘ilonga ha tāmate-tangata, ‘oku ‘ikai te ne ma‘u ‘a e nofo‘i ia ‘e he mo‘ui ta‘engata.

¹⁶Ko e me‘a ko eni ‘oku tau ‘ilo mo‘oni ai ki he ‘ofa, ‘a e li‘aki ‘ene mo‘ui ‘e he ‘Ene ‘Afio koe‘uhi ko kitautolu: pea ko kitautolu foki, ‘oku totonu ke tau li‘aki ‘etau mo‘ui koe‘uhi ko e kāinga.

¹⁷Ka ‘ilonga ‘a ia ‘oku ne ma‘u ‘a e me‘a ‘o māmani, mo ne sio ki hono tokoua ‘oku ne masiva, ka ne ta‘ofi hono fatu meiate ia, pea ‘oku nofo fēfē ‘i he toko taha ko ia ‘a e ‘ofa ki he ‘Otua?

¹⁸Si‘i fānau, ‘oua na‘a tau ‘ofa ‘aki ha lea pē, ‘uma‘ā ‘aki hotau ‘elelo pē; ka tau fai ‘i ngāue mo fai ‘i mo‘oni ‘etau ‘ofa.

¹⁹Ko e me‘a ko ia te tau ‘ilo ai ‘oku tau mei he Mo‘oni, pea te tau fakanonga ‘aki hotau loto ‘i he ‘ao ‘o ‘Ene ‘Afio.

²⁰He kapau ‘oku fakahalaia kitautolu ‘e hotau loto, ko hono ‘uhinga he ‘oku lahi ‘a e ‘Otua ‘i hotau loto, pea ‘oku ne mea‘i ‘a e me‘a kotoa pē.

²¹Si‘i ‘ofa‘anga, kapau ‘oku ‘ikai ke fakahalaia kitautolu ‘e hotau loto, ‘oku tau loto lahi ‘i he feangai mo e ‘Otua.

²²Kae‘uma‘ā, ‘ilonga ha me‘a ‘oku tau kole ki ai, ‘oku tau ma‘u meiate ia, koe‘uhi ‘oku tau tauhi ‘ene ngaahi tu‘utu‘uni, pea ‘oku tau fai ‘a e ngaahi me‘a ‘oku ne hōhō‘ia ai.

²³Pea ko eni ia ‘a e tu‘utu‘uni ‘a ‘Ene ‘Afio, ke tau tui ki he huafa ‘o hono ‘Alo ko Sīsū Kalaisi, pea ke tau fe‘ofa‘aki ‘o hangē ko e tu‘utu‘uni na‘a ne tuku mai.

²⁴Pea ko ia ‘oku ne tauhi ‘ene ngaahi tu‘utu‘uni ‘oku ne nofo ma‘u ‘i he ‘Ene ‘Afio, pea mo ‘Ene ‘Afio ‘iate ia. Pea ko eni ia ‘a e me‘a ‘oku tau ‘ilo ai ‘oku ne nofo‘ia kitautolu, koe‘uhi ko e laumālie kuo ne foaki mai.