Read KO E TOH TAPU KATOA TONGA Sioné 1 4 Bible Online

Sioné 1 4 - KO E TOH TAPU KATOA TONGA bible

Sioné 1 4

¹SI‘I ‘ofa‘anga, ‘oua te mou tui ki he laumālie fuli pē, ka mou sivi pe ‘a e ngaahi laumālie pe ‘oku mei he ‘Otua ia: he ‘oku tokolahi ‘a e kau palōfita loi kuo ‘alu atu ki māmani.

²Ko eni ia ‘a e me‘a te mou ‘ilo ai ‘a e Laumālie ‘o e ‘Otua: ‘Ilonga ha laumālie ‘oku fakamo‘oni ‘a Sīsū Kalaisi mo ‘ene ha‘u ‘i he kakano, ‘oku mei he ‘Otua ‘a e laumālie ko ia.

³Pea ‘ilonga ha laumālie ‘oku ‘ikai ke fakamo‘oni ‘a Sīsū, ‘oku ‘ikai mei he ‘Otua ‘a e laumālie ko ia: pea ko e laumālie ia ‘o Fiekalaisi, ‘a ia kuo mou fanongo ‘oku tu‘unuku mai; ‘io, na‘a mo ‘eni kuo ‘i māmani.

⁴Si‘i fānau, ‘oku mei he ‘Otua ‘a kimoutolu, pea kuo mou ikuna ‘a kinautolu: koe‘uhi ko ia ‘oku ‘iate kimoutolu ‘oku mā‘olunga ‘iate ia ‘oku ‘i māmani.

⁵Ko kinautolu ko e tupu mei māmani: ko hono ‘uhinga ia ‘oku fakaemāmani ‘enau lea, pea ‘oku tokanga ‘e māmani kiate kinautolu.

⁶Ko kimautolu ko e tupu mei he ‘Otua: ko ia ‘oku ne ‘ilo‘i ‘a e ‘Otua ‘oku ne tokanga kiate kimautolu; ko ia ‘oku ‘ikai mei he ‘Otua ‘oku ‘ikai te ne tokanga kiate kimautolu. Ko e me‘a ko ia ‘oku tau ‘ilo mei ai ‘a e laumālie ‘a ia ko e koto mo‘oni, mo e laumālie ‘a ia ko e koto fakahē.

⁷Si‘i ‘ofa‘anga, ke tau fe‘ofa‘aki mu‘a: he ko ‘ofa ko e tupu mei he ‘Otua ia; pea ko ia kotoa pē ‘oku ‘ofa kuo fanau‘i ia mei he ‘Otua, pea ‘oku ne ‘ilo‘i ‘a e ‘Otua.

⁸Ko ia ‘oku ‘ikai te ne ‘ofa, kuo ‘ikai te ne momo‘i ‘ilo‘i ‘a e ‘Otua; he ko e ‘Otua ko e ‘ofa.

⁹Ko eni ia ‘a e me‘a kuo fakahā ai ‘a e ‘ofa ‘a e ‘Otua ‘iate kitautolu, ‘a e fekau atu ki māmani ‘e he ‘Otua hono ‘Alo tofu-pē-taha-ne-fakatupu, koe‘uhi ke tau mo‘ui ‘iate ia.

¹⁰Ko eni ia ‘a e me‘a ‘oku ‘i ai ‘a ‘ofa, ‘o ‘ikai ko e pehē na‘a tau feia ha ‘ofa ki he ‘Otua ‘e kitautolu, ka ko ‘ene ‘ofa‘i kitautolu ‘e he ‘Ene ‘Afio, mo ne fekau atu hono ‘Alo mo‘o fakatupuhōifua‘anga koe‘uhi ko ‘etau ngaahi hia.

¹¹Si‘i ‘ofa‘anga, kapau leva na‘e pehē ‘a e ‘ofa ‘a e ‘Otua. kiate kitautolu, pea ko kitautolu foki ‘oku totonu ke tau fe‘ofa‘aki.

¹²Ko e me‘a ki he ‘Otua, kuo te‘eki ke mātā ‘e ha taha ‘i ha taimi. Kapau te tau fe‘ofa‘aki, ‘oku nofo ma‘u ‘a e ‘Otua ‘iate kitautolu, pea ko e ‘ofa kiate ia ‘oku kakato ‘iate kitautolu.

¹³Ko eni ia ‘a e me‘a ‘oku tau ‘ilo ai ‘oku tau nofo ma‘u ‘i he ‘Ene ‘Afio mo ‘Ene ‘Afio ‘iate kitautolu, koe‘uhi kuo ne foaki kiate kitautolu mei hono Laumālie.

¹⁴Pea kuo mau siofia, pea ‘oku mau fakahā, Kuo fekau mai ‘e he Tamai hono ‘Alo mo‘o Fakamo‘ui ‘o māmani.

¹⁵‘Ilonga ‘a ia kuo ne fakamo‘oni ko Sīsū ko e ‘Alo ‘o e ‘Otua, ‘oku nofo ma‘u ‘a e ‘Otua ‘iate ia mo ia ‘i he ‘Otua.

¹⁶Pea ko kitautolu kuo tau ‘ilo mo‘oni, pea kuo tau tui ki he ‘ofa ‘a e ‘Otua ‘iate kitautolu. Ko e ‘Otua ko e ‘ofa: pea ko ia ‘oku nofo ma‘u ‘i he ‘ofa, ‘oku ne nofo ma‘u ‘i he ‘Otua, pea ‘oku nofo ma‘u ‘a e ‘Otua ‘iate ia.

¹⁷Ko e me‘a ko eni ko e fakahaohaoa ‘o e kau ‘a ‘ofa mo kitautolu, ‘a ‘etau lotolahi ‘i he ‘aho ‘o e Fakamāu: he hangē ko ‘Ene ‘Afio ‘a‘ana, ‘oku pehē mo kitautolu ‘i he maama ko eni.

¹⁸‘Oku ‘ikai ha manavahē ‘ia ‘ofa: kaekehe ko e ‘ofa haohaoa ‘oku ne kapusi ‘a e manavahē: he ‘oku ‘i ai ha tautea ‘i he manavahē. Ka ko ia ‘oku manavahē kuo te‘eki ke fakahaohaoa ia ‘i he ‘ofa.

¹⁹‘Oku tau ‘ofa ‘e kitautolu, koe‘uhi na‘e tomu‘a ‘ofa ‘e he ‘Ene ‘Afio kiate kitautolu.

²⁰Kapau ‘e pehē ‘e ha taha, ‘oku ou ‘ofa ki he ‘Otua; ‘osi, ‘oku ne fehi‘a ki hono tokoua, ko e loi ia: he ko ia ‘oku ‘ikai te ne ‘ofa ki hono tokoua, ‘a ia kuo ne māta‘i, tala‘ehai ‘oku ne lava ke ‘ofa ki he ‘Otua, ‘a ia kuo te‘eki ke ne māta‘i?

²¹Pea ko eni ia ‘a e tu‘utu‘uni ‘oku tau ma‘u mei he ‘Ene ‘Afio, Ke ‘ilonga ‘a ia ‘oku ‘ofa ki he ‘Otua, ke ne ‘ofa foki ki hono tokoua.