Read KO E TOH TAPU KATOA TONGA Sioné 1 5 Bible Online

Sioné 1 5 - KO E TOH TAPU KATOA TONGA bible

Sioné 1 5

¹KO ia kotoa pē ‘oku tui ko e Mīsaia ‘a Sīsū, kuo fanau‘i ia mei he ‘Otua: pea ko ia kotoa pē ‘oku ‘ofa kiate ia na‘e fanau‘i ‘oku ne ‘ofa foki kiate ia kuo fanau‘i mei he ‘Ene ‘Afio.

²Ko e me‘a ko eni ‘oku tau ‘ilo ai ‘oku tau ‘ofa ki he fānau ‘a e ‘Otua, ‘oka tau ka ‘ofa ki he ‘Otua, mo fai ki he‘ene ngaahi tu‘utu‘uni.

³Ko eni ia ‘a e ‘ofa ki he ‘Otua, ‘a ‘etau tauhi ki he‘ene ngaahi tu‘utu‘uni.

⁴Pea ‘oku ‘ikai ke fakamafasia ‘ene ngaahi tu‘utu‘uni, koe‘uhi ko ia kotoa pē kuo fanau‘i mei he ‘Otua ‘oku ne ikuna ‘a māmani: pea ko eni ia ‘a e fo‘i ikuna ne ne ikuna ‘a māmani, ‘a ‘etau tui.

⁵Ko hai ia ‘oku ikuna ‘a māmani? ‘ikai ko ia pē ‘oku ne tui ko Sīsū ko e ‘Alo ‘o e ‘Otua?

⁶Ko eni ia ‘a e toko taha na‘e fou mai ‘i he vai mo e ta‘ata‘a, ‘a Sīsū Kalaisi;

⁷‘o ‘ikai ‘i he vai pē, ka ‘i he vai mo e ta‘ata‘a foki; pea ko e Laumālie ia ‘oku fakamo‘oni, he ko e Laumālie ko e mo‘oni ia.

⁸He ‘oku tolu ‘a e fakamo‘oni, ko e Laumālie mo e vai mo e ta‘ata‘a; pea ‘oku taha ‘a e fakamo‘oni ‘a e tolu ko ia.

⁹Kapau ‘oku tau tali ‘a e fakamo‘oni ‘a e kakai, ka ‘oku lahi hake ‘a e fakamo‘oni ‘a e ‘Otua: pea ko eni ia ‘a e fakamo‘oni ko ia ‘a e ‘Otua, ‘a e fakamo‘oni kuo ne fai ki hono ‘Alo.

¹⁰Ko ia ‘oku tui pīkitai ki he ‘Alo ‘o e ‘Otua ‘oku ne ma‘u ‘i hono loto ‘a e fakamo‘oni ko ia: ko ia ‘oku ‘ikai te ne tui ki he ‘Otua kuo ne tuku ko e loi ‘a ‘Ene ‘Afio; koe‘uhi ko e ‘ikai te ne tui ki he fakamo‘oni kuo fai ‘e he ‘Otua ki hono ‘Alo.

¹¹Pea ko eni ia ‘a e fakamo‘oni, Kuo foaki ‘e he ‘Otua kiate kitautolu ‘a e mo‘ui ta‘engata, pea ko e mo‘ui ko ia ‘oku tu‘u ‘i hono ‘Alo.

¹²Ko ia ‘oku ne ma‘u ‘a e ‘Alo ‘oku ne ma‘u ‘a e mo‘ui; ko ia ‘oku ‘ikai te ne ma‘u ‘a e ‘Alo ‘o e ‘Otua ‘oku ‘ikai te ne ma‘u ‘a e mo‘ui.

¹³Ko e ngaahi me‘a ko eni kuo u tohi atu kiate kimoutolu, koe‘uhi ke mou ‘ilo ‘oku mou ma‘u ‘a e mo‘ui ta‘engata, ‘io, ‘a kimoutolu ‘oku tui pīkitai ki he huafa ‘o e ‘Alo ‘o e ‘Otua.

¹⁴Pea ko eni ia ‘etau lotolahi ‘i he feangai mo ‘Ene ‘Afio; ka tau ka kole ha me‘a ‘i he funga ‘o hono finangalo ‘oku ne tokanga kiate kitautolu:

¹⁵pea kapau leva ‘oku tau ‘ilo ‘oku ne tokanga kiate kitautolu neongo pe ko e hā ‘etau kole ‘oku fai, ‘oku tau ‘ilo ‘oku tau ma‘u ‘a e ngaahi me‘a kuo tau kole.

¹⁶Kapau ‘e ‘ilo ‘e ha taha ‘a hono tokoua ‘oku ne fai ha angahala ‘oku ‘ikai tonu ki he mate, te ne kole, pea te ne tuku kiate ia ha mo‘ui, ‘io, kiate kinautolu ‘oku fai angahala kae ‘ikai tonu ki he mate. ‘Oku ‘i ai ha angahala ‘oku tonu ki he mate: ‘oku ‘ikai te u pehē ke ne ala‘aki kole koe‘uhi koe angahala ko ia.

¹⁷‘Ilonga ha fai ta‘etotonu ko e angahala ia, pea ‘oku ‘i ai ha angahala ‘oku ‘ikai tonu ki he mate.

¹⁸‘Oku tau lāu‘ilo pē, ‘ilonga ‘a ia kuo fanau‘i mei he ‘Otua, ‘oku ‘ikai te ne angahala; kaekehe, ko ia ne fanau‘i mei he ‘Otua ‘oku tauhi ia ‘e he me‘a ko ia, pea ‘oku ‘ikai ala kiate ia ‘e he Fili.

¹⁹‘Oku tau lāu‘ilo ko e tupu mei he ‘Otua ‘a kitautolu, pea ko hono kotoa ‘o māmani ‘oku ‘i he nima ‘o e Fili.

²⁰Kae‘uma‘ā ‘oku tau lāu‘ilo kuo ha‘u ‘a e ‘Alo ‘o e ‘Otua, pea Kuo ne tuku mai ha mafai ke tau ‘ilo ‘a e Toko Taha Mo‘onia, pea ‘oku tau tu‘u ‘i he Toko Taha Mo‘onia, he‘etau tu‘u ‘i hono ‘Alo ko Sīsū Kalaisi, Ko eni ia ‘a e ‘Otua Mo‘onia, pea ko e mo‘ui ta‘engata.

²¹Si‘i fānau, ta‘ofi kimoutolu mei he tauhi ‘aitoli.